31 maja ministr infarmacyi Aleh Pralaskoŭski vypisaŭ papiaredžańnie haziecie «Nardnaja vola». Pryčynaj stałasia publikacyja ŭ vydańni ŭspaminaŭ Illi Kopyła «Niabyšyna. Vajna».
Paśla zaklučeńnie Instytutu historyi Nacyjanalnaj akademii navuk, Ministerstva infarmacyi ćvierdzić, što šerah pryviedzienych u publikacyjach histaryčnych źviestak nie adpaviadaje rečaisnaści.
«Raspaŭsiudžvańnie niepraŭdzivaj infarmacyi, jakaja dyskredytuje partyzanski ruch u Biełarusi, dziejańni Čyrvonaj Armii ŭ pieryjad Vialikaj Ajčynnaj vajny, stała pryčynaj praviadzieńnia hramadzianami pikietaŭ, a taksama inšych prajavaŭ niehatyŭnaj hramadskaj reakcyi», — pišacca ŭ zaklučeńni.
U krasaviku redakcyju haziety pa čarzie pikietavali vieterany, a taksama aktyvisty BRSM. Jany aburalisia publikacyjaj Kopyła, jakaja nibyta «ačarniaje partyzanski ruch»
Pieršaje papiaredžańnie «Narodnaja vola» atrymała ŭ listapadzie za publikacyju lista Ihara Drako, dzie Ministerstva pabačyła «zakliki da ekstremisckaj dziejnaści».
U studzieni hazieta atrymała papiaredžańnie za niapravilny pieralik hazietnych šapikaŭ, dzie možna padpisacca na «Narodnuju volu» pa lhotnaj canie.
Treciaje papiaredžańnie nijak nie pavinna paŭpłyvać na pracu redakcyi, bo hazietu mahli začynić jašče paśla druhoha papiaredžańnia.
«Vyrašyli, što ŭ haziecie damo adkaz Pralaskoŭskaha, kab chiby byli vypraŭlenyja.
Ja ni z čym hetaje papiaredžańnie źviazvać nie chaču, dla mianie hałoŭnaje vydać novy numar haziety. Zachočuć začynić vydańnie — chaj začyniajuć. Moža čytačy potym vyrašać začynić tych ludziej, što začyniali hazietu», — kaža hałoŭny redaktar «Narodnaj voli» Iosif Siaredzič.
Tekst papiaredžańnia apublikavany na sajcie BAŽ.
