6 červienia ŭ Minsku adbudziecca pracesija z nahody ŭračystaści Najśviaciejšaha Cieła i Kryvi Chrysta (Božaje Cieła), što tradycyjna adznačajecca ŭ čaćvier paśla ŭračystaści Najśviaciejšaj Trojcy na ŭspamin taho dnia, kali Isus na Apošniaj Viačery ŭ Vialiki Čaćvier ustanaviŭ Eŭcharystyju.

Tradycyjna pracesija raspačniecca celebracyjaj śviatoj Imšy ŭ 9.00 kala kaścioła Najśviaciejšaj Trojcy (sv. Rocha) na Załatoj Horcy (pr. Niezaležnaści, 44a). Pracesija, jakaja sfarmirujecca na vulicy Kazłova, projdzie pa tratuary praśpiekta Niezaležnaści, pa vulicach Biersana, Vaładarskaha, Internacyjanalnaj i zavieršycca kala archikatedralnaha kaścioła Imia Najśviaciejšaj Panny Maryi (pł. Svabody, 9).

Padčas šeścia, jakoje raspačniecca ad kaścioła Najśviaciejšaj Trojcy prykładna ŭ 10.30, praduhledžany čatyry prypynki‑stacyi: pieršaja stacyja na płoščy Pieramohi, dzie adbudziecca malitva z nahody 65‑hodździa Pieramohi ŭ Vialikaj ajčynnaj vajnie, druhaja — na Kastryčnickaj płoščy, treciaja — na płoščy Niezaležnaści, čaćviortaja — na płoščy Svabody.

Padčas kožnaj stacyi manstrancyja z Najśviaciejšym Sakramentam budzie źmiaščacca na pryhoža azdoblenym tronie, padrychtavanym viernikami peŭnych parafij, budzie čytacca ŭryvak ź Jevanhiella, a zatym śviatar pramović hamiliju. Padčas kožnaj stacyi prysutnym budzie ŭdzialacca błahasłaŭleńnie Najśviaciejšym Sakramentam.

Pierad zaklučnym błahasłaŭleńniem vierniki praśpiavajuć himn «Te Deum» («Ciabie, Boha, prasłaŭlajem»), a zavieršyć uračystaść śpieŭ himna «Mahutny Boža».

U pracesii prymuć udzieł dzieci minskich parafij, jakija sioleta pryniali Pieršuju śviatuju Kamuniju, a taksama pradstaŭniki roznych malitoŭnych hrup i ruchaŭ. Uračystaść pracesii buduć nadavać charuhvy i abrazy z vyjavami śviatych.

Padčas šeścia budzie razdavacca pitnaja vada. Pracesiju budzie supravadžać mašyna z hučnahavarycielem, što dazvolić duchavienstvu i viernikam prymać aktyŭny ŭdzieł u śpievach i malitvach.

Płanujecca, što zavieršycca pracesija ŭ 14.00.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?