U aŭtorak 15 červienia ŭ Minskim abłasnym sudzie (Śviardłova, 3) adbudziecca razhlad pratestu prakuratury Minskaha rajonu na apraŭdalny prysud Ivanu Michajłavu. Pasiedžańnie pačniecca a 10-j hadzinie.
Nahadajem, što 31 traŭnia sud Minskaha rajonu apraŭdaŭ Ivana Michajłava, jaki praz relihijnyja pierakanańni admaŭlaŭsia słužyć u vojsku.1 lutaha hety samy sud pryznaŭ Ivana vinavatym va ŭchileńni ad vajskovaj słužby i prysudziŭ jaho da 3 miesiacaŭ źniavoleńnia. Kali da kanca adbyvańnia pakarańnia zastałosia zusim ničoha, kalehija Minskaha abłasnoha suda admianiła raniejšaje rašeńnie i pryznačyła novy razhlad spravy.
«My źviazvajem dziejańni prakuratury ź niežadańniem vypłacić Michajłavu kampiensacyju za niezakonny aryšt», — raspavioŭ «NN» kaardynatar kampanii «Za alternatyŭnuju hramadzianskuju słužbu» Michaś Paškievič. Jon ličyć, što apraŭdalnyja prysudy ŭ dačynieńni da Ivana Michajłava i Źmitra Smyka bjuć pa aŭtarytecie prakuratury, vyjaŭlajučy adpaviednuju jakaść jaje pracy. U vypadku ź Michajłavym staić jašče i pytańnie kampiensacyi za maralnyja i fizičnyja straty ŭ vyniku trochmiesiačnaha aryštu. «Ivan pakul nie vystaviŭ niejkich kankretnych pretenzij, jale jon pra heta dumaje», — paviedamiŭ M. Paškievič. Pa jaho słovach, dakładna viadoma, što svoj pratest prakuratura ŭniasie i na apraŭdalny vierdykt Homielskaha abłasnoha suda, datyčny Z. Smyka.
