Novaja stužka «Rycar dnia» z Tomam Kruzam i Kemieran Dyjaz. Pryhodnicki bajavik ci rekłama ispanskich kurortaŭ?
Samaje hałoŭnaje - za ich śpinami. Tom Kruz i Kemieran Dyjaz
«Rycar dnia» (kamiedyja/trymcieńnik, ZŠA, 125 chv., rež. Džejms Menhołd).
1. Letnija pryhody Kemieran i Toma
Što rabić kali tvaja kraina straciła vysokaje druhoje miesca pa ŭzroŭni turystyčnaj naviedvalnaści? Što rabić, kali tvoj kurortny brend imkliva hublaje kaštoŭnaść, a patencyjny klijent pierajazdžaje na bolš tannyja kurorty?
Adkaz adzin — zaprasić da siabie Kemieran Dyjaz i Toma Kruza i zdymać ź ich udziełam film. U minułym hodzie haradskija ŭłady Sievilji, Kadysa dy inšych ispanskich haradoŭ zrabili ŭsio, kab zachvocić halivudskich režysioraŭ vykrucić svoj siužet takim manieram, kab aktorka z samaj šalonaj uśmieškaj u Halivudzie razam ź viečna junym krasunom prakaciłasia mienavita pa ich vuzkich vułkach. Ačapili paŭhorada, vyłučyli hrošy z haradskoha biudžeta na zdymki.
Čamu Denielu Krejhu, vykanaŭcu roli Džejmsu Bonda, — možna, a Tomu Kruzu — dyk nie? Kruzu ž nie pryvykać zdymacca ŭ parabondaŭskich filmach, kštałtu «Misija nievykanalnaja», dzie jon hetak ža vysokamastacka ŭciakaje i vysokatechnałahična adstrelvajecca. Dzie jon hetak ža, jak i Krejh nakručvaje kiłamietry pa vulicach suśvietnych stalic i schavana rekłamuje handlovyja brendy. Siužet «Rycar dnia» nahadvaje epapieju pra ahienta 007: jon —špijon, jana — jahonaja spadarožnica. Hałavakrutnaja pahonia pa najnoŭšaje vynachodstva, jakoje moža pieraharnuć śviet. Suprać ich – zvyčajnyja złydni i piarevaratni ŭ pahonach, jeŭrapiejskaja mafija va ŭsim svaim atrutnym bujańni. I na fonie — tut my padychodzim da samaj hałoŭnaj častki — haradskija krajavidy Sievilji razam ź siaredniaviečnymi kamianicami i karydaj, što dadajuć da pryhodaŭ žadany šarm i abjom.
Pakul pradusary spadziajucca, što stužka «Rycar dnia» zrobicca kasarobam, ułady ŭ Ispanii ciešać siabie dumkaj, što ŭžo pa chutkim časie pryvabiać u adviedki proćmu turystaŭ. Spryjajučy halivudnikam, municypalnyja ŭrady nie chavajuć, što vyłučajuć svaje hrošy nie praz svaju luboŭ da mastactva, a praz svaju prychilnaść da turystaŭ i ich hamancoŭ.
«Usie hetyja namahańni zroblenyja adno palepšyć turystyčny imidž horada, kab u śviecie pabačyli vabnoty našaha horada», — skazaŭ Bruna Harsija, adkazny za turyzm u meryi hordada Kadysie.
 Kadry sa stužki "Viki, Kryścina, Barsełona" |
2. Vysokamastacki rekłamny rolik
Amierykancam taki hiešeft taksama daspadoby. Dy dla ich niebieskaryślivyja zdymki na vyjaznoj natury — heta bitaja daroha. Voś Vudzi Alen u 2008 hodzie nie pasaromieŭsia i na svaju mieładramu «Viki, Kryścina, Barsiełona» uziaŭ finansavańnie naprastki z haradskoha biudžetu Barsiełony. Usie atrymali svajo: Alen źniaŭ čarhovuju talenavitaść, a Barsiełona znoŭ pryciahnuła da svaich histaryčnych słavutaściaŭ uvahu.
Tom Kruz i Kemieran Dyjaz taksama šmat ščyravali na pramocyi svajho filma (horada?). Padčas niadaŭniaj premjery ŭ Sievilji jany vyrašyli padahreć žarści. Kruz asabista sieŭ na matacykł i ź vietrykam pradefilavaŭ pa pakručastych vułkach, a Kemieron Dyjaz, nie raŭnujučy jak u filmie «Vanilnaje nieba», sieła za styrno honačnaj mašyny i na pavyšanych chutkaściach pakatała žurnalistaŭ.
 Kadry sa stužki "Uładar Piarścionkaŭ" |
U Ispanii, krainie, dzie turystyčnaja naviedvalnaść źniziłasia za apošni hod na try pracenty, vielmi dobra pamiatajuć praśvietły prykład Novaj Ziełandyi, kali paśla epičnych scenaŭ tryłohii «Uładar Piarścionkaŭ» turahienctvy ŭsiaho śvietu raptam pryhadali pra isnavańnie hetaha zacišnaha kraja. Pakul turysty dajuć pieravahu tańniejšym kurortam Mižziemnamorja i Adryjatyki, «Rycar dnia» nanosić markietynhavy udar u adkaz, i nahadvaje, chto hałoŭny ŭ turystyčnym biznesie Jeŭropy. A kab stužka zusim nie vyhladała, jak ahitka ispanskaha turprama, niekatoryja sceny «Rycara dnia» zdymali ŭ zaśniežanym Zalburhu. Dla hłybiejšahu kantrastu.
Kali ŭ mižčaśsie vy zasumavali pa Bondu, jahonych vyštałconych pahoniach i aksesuarach — «Rycar dnia» stužka dla vas. I dobraja nahoda ŭzvažyć svoj adpačynak u Ispanii.
Samaje hałoŭnaje — heta chvost, to bok fon!
