Biełaruś pavinna pavyšać udzielnuju vahu ŭ eksparcie vysokatechnałahičnych tavaraŭ z vysokaj dabaŭlenaj vartaściu. Ab hetym zajaviŭ siońnia žurnalistam ministr ekanomiki Biełarusi Mikałaj Snapkoŭ.
«Naša zadača — pavyšeńnie ŭdzielnaj vahi ŭ eksparcie vysokatechnałahičnych tavaraŭ, na heta nastrojena ŭsia piacihodka», — skazaŭ Mikałaj Snapkoŭ, dadaŭšy, što «inavacyi pavinny być u poŭnym sensie słova». «Heta mahčyma tady, kali jość novy pradukt, novaja pasłuha, ukaranionaja i daviedzienaja da spažyŭca», — ličyć jon.
Ministr adznačyŭ, što Suśvietny bank rekamienduje Biełarusi pryniać miery pa pavyšeńniu ŭdzielnaj vahi ŭ eksparcie vysokatechnałahičnaj pradukcyi. «Heta adna z samych aktualnych rekamiendacyj», — skazaŭ jon. Tendencyja, jakuju vyznačyŭ Suśvietny bank, śviedčyć ab tym, što ŭ Biełarusi «idzie źnižeńnie doli vysokatechnałahičnych tavaraŭ z vysokaj dabaŭlenaj vartaściu ŭ eksparcie». Heta źviazana z tak zvanym sindromam siaredniaha dachodu. «U našaj krainie dachod siaredni, ale my nie takija vysokatechnałahičnyja, jak zachodnija krainy, i ŭ nas davoli vyšejšy dachod, čym u azijackich krainach, — rastłumačyŭ Mikałaj Snapkoŭ. — Takim čynam, my traplajem u klin, kali nas z rynku vysokatechnałahičnych tavaraŭ vybivajuć».
U suviazi z hetym raźvićcio navuki, nabližeńnie jaje da vytvorčaści nabyvaje pieršaradnaje značeńnie dla Biełarusi. «Nieabchodna stvarać novy tavar, jaki budzie zapatrabavany pierš za ŭsio na ŭnutranym rynku, tady jon budzie zapatrabavany, jak pakazała praktyka, i na źniešnim rynku», — padkreśliŭ ministr ekanomiki.
