Minsk ź vizitam naviedaŭ Jeŭrakamisar pa pytańniach pašyreńnia i Jeŭrapiejskaj palitycy dobrasusiedstva Štefan Fiule.
Jon nastupnik Bienity Fierera‑Valdnier, jakaja taksama pryjazdžała ŭ Biełaruś roŭna hod tamu. Paśla toj pajezdki ŭ aeraporcie było hučna abvieščana, što vizit jeŭrakamisara stanie novaj viachoj u dačynieńniach Jeŭropy i aficyjnaha Minska. Prajšło ŭžo bolš za 12 miesiacaŭ, a istotnych zruchaŭ usio jašče nie nazirajecca.
Najpierš Fiule jašče ŭ čaćvier mieŭ sustreču ź liderami apazicyi i hramadskimi liderami. Sustreča adbyvałasia pozna ŭviečary ŭ haścinicy «Jeŭropa». Prykładna a 11 hadzinie supracoŭniki hatelu kazali, što ŭdzielniki sustrečy jašče jaduć desiert.
A ŭžo ŭ piatnicu spadar Fiule sustrakaŭsia z pradstaŭnikami ŭłady. A apošnim punktam vizitu značyłasia pres‑kanfierencyja. «Čamu ŭsie takija surjoznyja?» — adrazu pa‑rasijsku pažartavaŭ Štefan Fiule. Razam ź im taksama źjavilisia pasły Litvy i Šviecyi Edminas Bahdonas i Stefan Eryksan.
Žurnalisty pacikavilisia ŭ jeŭračynoŭnika, jakija ŭražańni zrabiŭ na jaho Alaksandr Łukašenka. «Adzinaje, što ja skažu — razmova była vielmi ščyraja. I nie tolki pry ŭklučanych kamierach, ale i kali žurnalistaŭ paprasili pakinuć pamiaškańnie».
Napiaredadni lider Ruchu «Za Svabodu» Alaksandr Milinkievič prasiŭ Fiule padniać na pieramovach ź biełaruskim lideram pytańnie palitviaźniaŭ, u pryvatnaści Mikałaja Aŭtuchoviča. «Nie budu pierakazvać našu razmovu, ale hetaje pytańnie niekalki razoŭ paŭstavała».
U Štefana Fiule ŭžo było niekalki padrychtavanych punktaŭ pramovy.
Pa‑pieršaje,
Biełaruś i Jeŭrasajuz mohuć rabić bolš u palitycy dobrasusiedstva i raźvićcia adnosin.Biełarusi praciahvaje źjaŭlacca adzinaj krainaj «Uschodniaha partniorstva», jakaja nie maje dvuchbakovych dačynieńniaŭ ź ES. Na dumku Fiule, patencyjał «Uschodniaha partniorstva» vykarystoŭvajecca našaj krainaj tolki na 10‑20%. «Vieru, što situacyja moža źmianicca, kali my padtrymajem šlach reformaŭ u Biełarusi».
Pa‑druhoje,
dyjałoh mahčymy tolki pry vykanańni bazavych kaštoŭnaściaŭ demakratyi i pravoŭ čałavieka.I tut vyznačalnaja rola budzie naležyć prezidenckim vybaram. «Vybary — heta demakratyčnaja piačatka na mižnarodnym pašparcie Biełarusi», — adznačyŭ jeŭrakamisar. Jašče było nahadanaje pra nieabchodnaść admieny śmiarotnaha pakarańnia.
Pa‑treciaje,
užo siońnia Jeŭrasajuz praktyčna raspracavaŭ tak zvanuju Darožnuju mapu dla reformaŭ u Biełarusi.Hety dakumient nazyvajecca «sumiesny pramiežkavy płan». U vieraśni ci kastryčniku jaho abmiarkujuć lidery krain ES.
Pa‑čaćviortaje,
u Brusieli padrychtavanaja prapanova ab sproščvańni vizavaha režymu dla hramadzian Biełarusi. Fiule spadziajecca, što praces pieramovaŭ pačniecca jašče sioleta.
Fiule kaža, što ŭ 2008 hodzie Brusiel atrymaŭ ad Minsku dastatkova šmat pazityŭnych sihnałaŭ nakont situacyi z pravami čałavieka.
«Palapšeńnia ciapier niama, a kali niejki ruch jość, to nazad», — zaznačyŭ čynoŭnik.
Jon zapeŭniŭ, što vizit nie źviazany z paharšeńniem‑biełaruska rasijskich dačynieńniaŭ. «My prapanoŭvajem Minsku rozny tavar. Niama ničoha kiepskaha ŭ rasšyranych stasunkach Biełarusi i z Maskvoj, i z Brusielem».
Hiunter Fiule pryznajecca, što źjaždžaje ź Biełarusi z mnostvam uražańniaŭ. Ci stanie vizit čecha ŭ Minsk «novaj viachoj» dačynieńniaŭ pakaža čas.
