Sud Centralnaha rajona Mienska vynies prysud hramadzianinu Turcyi, jaki arhanizoŭvaŭ seks-tury ŭ biełaruskuju stalicu.
Mužčynu zatrymali ŭ śniežni 2009 hoda supracoŭniki padraździaleńniaŭ pa narkakantroli i procidziejańni handlu ludźmi Centralnaha RUUS, HUUS Minharvykankama i MUS Biełarusi. Turak byŭ źviazany z adnoj z turystyčnych firmaŭ. Karystajučysia suviaziami ŭ hetym biźniesie, jon arhanizoŭvaŭ dla turystaŭ pikantnuju prahramu, u jakuju ŭvachodziła akazańnie intymnych pasłuh prastytutkami.
Na zdymnych kvaterach, a taksama ŭ numarach darahich hatelaŭ ładzilisia sustrečy ź minskimi putanami. Cana dla klijentaŭ składała, jak praviła, kala $150 u hadzinu. Turecki hramadzianin atrymlivaŭ $ 50—80 "kamisijnych". Bolšaja častka jaho klijentaŭ — hości z Turcyi.
U vyniku sud pryznaŭ hramadzianina hetaj krainy vinavatym u ździajśnieńni złačynstva, jakoje praduhledžana art.171 KK Biełarusi, jaki datyčyć prastytucyi, i prysudziŭ da siami hadoŭ pazbaŭleńnia voli z kanfiskacyjaj majomaści.
Heta nie pieršy padobny sudovy praces za apošni čas. Inšaha tureckaha hramadzianina zatrymali ŭ biełaruskaj stalicy ŭ traŭni 2009 hoda. Savieckim RUUS Minska ŭ dačynieńni da jaho taksama była raspačataja kryminalnaja sprava pa art. 171. Jon dziejničaŭ praktyčna pa toj ža schiemie: pracujučy ŭ turfirmie, arhanizoŭvaŭ seks-tury. Rascenki i "kamisijnyja" byli anałahičnymi. Sud tady taksama daŭ vinavatamu 7 hadoŭ turmy.
