ES raspracuje časovy płan strukturnaha dyjałohu ź Biełaruśsiu 1

U pačatku vosieni na razhlad krain Jeŭrasajuza budzie pradstaŭleny sumiesny časovy płan dla strukturnaha dyjałohu ES ź Biełaruśsiu ŭ śfiery palityki i ekanomiki. Pra heta paviedamiŭ žurnalistam jeŭrakamisar pa pytańniach pašyreńnia i Jeŭrapiejskaj palitycy dobrasusiedstva Štefan Fiule paśla pieramoŭ ź ministram zamiežnych spraŭ Biełarusi Siarhiejem Martynavym 9 lipienia ŭ Minsku.

Pavodle słoŭ Fiule, padčas siońniašnich pieramoŭ u MZS płan abmiarkoŭvaŭsia «uvohule i cełym». Dyskusii pamiž Biełaruśsiu i ES buduć praciahvacca, skazaŭ jeŭrakamisar. Jon zaznačyŭ, što hety dakumient nie ź`iaŭlajecca jurydyčna abaviazkovym. «Heta palityčnaje pahadnieńnie, jakoje stanie nieabchodnaj bazaj dla raźvićcia dvuchbakovych adnosin», — zajaviŭ Fiule.

Jeŭrakamisar taksama zaznačyŭ, što ŭ dakumiencie — svojeasablivaj «darožnaj karcie» — buduć zamacavanyja abaviazacielstvy jak Biełarusi, hetak i ES. Pry hetym Fiule zajaviŭ: hety płan «nie ź`iaŭlajecca abchodnym šlacham» adsutnaj dahavorna-pravavoj bazy dla supracoŭnictva Biełarusi ź ES. «Šlach pa jaje stvareńni hety płan dazvolić nam prajści razam», — skazaŭ jon.

U svaju čarhu Siarhiej Martynaŭ udakładniŭ, što tekst sumiesnaha pramiežkavaha płana nie abmiarkoŭvaŭsia padčas siońniašnich pieramoŭ, nad im jašče pracuje Jeŭrakamisija. Pavodle słoŭ ministra, baki abmierkavali «ahulnyja padychody». Jon adznačyŭ aktualnaść zadačy pabudovy dahavorna-pravavoj bazy pamiž Biełaruśsiu i ES. Baki, udakładniŭ Martynaŭ, «viaduć papiarednija razmovy» pa pahłybleńni ab partniorstvie i supracoŭnictvie. «Vidavočna, dla hetaha nam treba prajści peŭny šlach», — dadaŭ kiraŭnik MZS.

Na vynikovaj pres-kanfierencyi Štefan Fiule zajaviŭ, što pry składańni pramiežkavaha płana reform pamiž ES i Biełaruśsiu budzie ŭličana mierkavańnie nie tolki ŭład, ale taksama hramadzianskaj supolnaści i apazicyi Biełarusi.

«Nie pamiataju krainy, dzie b pohlady ŭład, hramadzianskaj supolnaści i apazicyi poŭnaściu supadali. U Minsku jany razychodziacca pa mnohich pytańniach», — padkreśliŭ jeŭrakamisar.

Fiule paviedamiŭ, što padčas vizitu ŭ Minsk sustreŭsia nie tolki z prezidentam Alaksandram Łukašenkam, kiraŭnikom MZS Siarhiejem Martynavym i vice-prem`ieram Andrejem Kabiakovym, ale i z supracoŭnikami pasolstvaŭ krain ES, a taksama pradstaŭnikami hramadzianskaj supolnaści i apazicyi. «Usio heta nieabchodna dla lepšaha razumieńnia situacyi tut i abmierkavańnia našych prapanoŭ», — pierakanany jon.

Jeŭrakamisar taksama ličyć, što ŭ ramkach palityki ES možna zrabić bolš pa raźvićci adnosin ź Biełaruśsiu, kab respublika mahła ŭ poŭnaj miery vykarystoŭvać uvieś patencyjał, jaki dajecca ŭ ramkach palityki «Uschodniaje partniorstva».

«Ciapier hety patencyjał skarystany tolki na 10%, nie bolš. Vieru, što situacyja moža źmianicca, kali my praciahniem padtrymku Biełarusi na šlachu reform», — zajaviŭ Fiule.

Pry hetym jon padkreśliŭ, što raźvićcio adnosin pavinna być zasnavana na takich fundamientalnych kaštoŭnaściach, jak demakratyja, pravy čałavieka i viaršenstva zakona.

Maryna Rachlej, BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH