U Biełarusi pryniaty zakon «Ab psichałahičnaj dapamozie».

Šmat havaryłasia ab tym, što jon nakiravany suprać šarłatanaŭ, jakija durać hałavu davierlivym hramadzianam, — usialakich varažbitak, miedyumaŭ, aŭtaraŭ ułasnych mietodyk dušeŭnaha azdaraŭleńnia i h.d. Ale nasamreč sens zakona značna hłybiejšy.

Tearetyčna čałaviek niasie svaje tajamnicy pa troch adrasach — u carkvu, da doktara i da psichołaha (psichaanalityka, psichaterapieŭta, nazavicie jak zaŭhodna). Tajna spoviedzi dla ŭsich kanfiesij śviataja, bo simvalična spoviedź aznačaje znosiny čałavieka nie sa śviatarom, a z Boham. Raskryćcio tajamnicy spoviedzi pa carkoŭnych zakonach ciahnie za saboj pazbaŭleńnie sanu. Chacia što da pravasłaŭja, tut treba zrabić istotnuju ahavorku. Pavodle Poŭnaha pravasłaŭnaha bahasłoŭskaha encykłapiedyčnaha słoŭnika, «ciapier usio skazanaje na spoviedzi zachoŭvajecca ŭ tajamnicy, za vyklučeńniem takich vypadkaŭ, kali ŭtojvańnie pahražaje niebiaśpiecy manarcha, impieratarskamu domu abo dziaržavie». Tłumačyć hety pastułat, pahadziciesia, možna šyroka.

Tym nie mienš, u KPK zamacavana, što śviatary nie mohuć być dapytanyja pra abstaviny, jakija stali im viadomyja sa spoviedzi. Dakładna hetak ža doktar biez zhody asoby, jakaja źviarnułasia pa miedycynskuju dapamohu, nie moža być dapytany pa abstavinach, jakija składajuć pradmiet lekarskaj tajamnicy.

A voś psichołahi nie tolki mohuć być dapytanyja — ich prosta abaviazali danosić. Tak, artykuł 15 zakona kaža: «Psichołahi abaviazanyja paviedamlać u pravaachoŭnyja orhany infarmacyju, jakaja składaje prafiesijnuju tajamnicu, kali jana źmiaščaje źviestki ab ździejśnienym asabliva ciažkim złačynstvie albo ab padrychtoŭcy ciažkaha i asabliva ciažkaha złačynstva».

Naturalna, biełarusy buduć spasyłacca na toje, što taki suśvietny dośvied. Heta niapraŭda. Suśvietnaja praktyka takaja, što psichołah, dakładna hetak ža, jak lekar, nie moža i tym bolš nie abaviazany vydavać prafiesijnuju tajamnicu. Za vyklučeńniem tych vypadkaŭ, kali jamu stała viadoma, što pacyjent ujaŭlaje pahrozu dla žyćcia i zdaroŭja inšych ludziej. Heta značyć, kali klijent raskazvaje psichołahu pra žadańnie ci namier kaho-niebudź zabić ci pakalečyć.

U nas bolšaść psichołahaŭ pracuje ŭ škołach. I našyja naiŭnyja dzietki čaściakom raskazvajuć dobrym ciociam šmat cikavaha ab chatnich spravach. Ciapier hetaja samaja ciocia, pačuŭšy ad dziciatka, što jaho tata ŭčora pahražaŭ prybić susieda, abaviazanaja budzie imčać z dakładam u milicyju. Tamu što ŭ najaŭnaści infarmacyja «ab padrychtoŭcy ciažkaha złačynstva».

Biełaruski zakon ab psichałahičnaj dapamozie, jaki Alaksandr Łukašenka padpisaŭ 1 lipienia, akazaŭsia taki, što psichołahaŭ lepš aścierahacca.
Tamu što zhodna ź im usio skazanaje na pryjomie ŭ psichaterapieŭta moža być vykarystana suprać vas. Ništo nie moža zastacca tajamnicaj śpiecyjalista, da jakoha vy źviarnulisia pa dapamohu, kali budzie zapyt «kampietentnych orhanaŭ» u suviazi z praviadzieńniem papiaredniaha rasśledavańnia abo sudovym razhladam. Zakon ciapier abaviazvaje psichołahaŭ raskazać pra vas usio «daśledčykam čałaviečych zahanaŭ i duš», jakija nosiać pahony.
Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?