U Mścisłavie rychtujucca da «Rycarskaha festu-2010». Śviata siaredniaviečnaj kultury adbudziecca 24–25 lipienia.

Staražytny Mścisłaŭ budzie prymać rycaraŭ i ich pryhožych dam treci hod zapar. U feście voźmuć udzieł bolš za dva dziasiatki rycarskich kłubaŭ. Akunucca va ŭmoŭny, ale hieraičny i niezabyŭny śviet siaredniaviečnaj kultury zaprašajucca ŭsie!

Prahrama «Rycarskaha festu-2010» raznastajnaja. Jon pačniecca ranicaj ŭ pravasłaŭnym chramie Alaksandra Nieŭskaha i katalickim Karmielickim kaściole malebnami ŭ honar voinaŭ-mścisłaŭcaŭ, jakija zahinuli za Ajčynu na poli bitvy. Potym — śviatočnaje teatralizavanaje šeście, jakoje ačolić na kani sam karol Jahajła! Tradycyjna adbudziecca navukova-praktyčnaja kanfierencyja, pryśviečanaja historyi Mścisłava. Amatary rodnaj historyi mohuć naviedać u časie festu znakamityja na ŭsiu Biełaruś słavutaści Mścisłaŭščyny. Naprykład, usiaho za 3 tysiačy rubloŭ možna trapić na ekskursiju pa kalehiumie ijezuickaha manastyra, dzie budzie razhornutaja muziejnaja vystava. A pobač budzie pracavać «Mścisłaŭski sklapok», dzie možna aśviažycca — pradehustavać vinnyja i biezałkaholnyja napoi.

Dla ŭdzielnikaŭ i haściej «Rycarskaha festu» budzie hatavać siaredniaviečnaja kuchnia. U haradskim parku zapracuje Horad majstroŭ. Na śviacie vystupiać «Pieśniary», roznyja biełaruskija hurty, vohnienny cyrk. Budzie łaziernaje šou i fiejervierk. Siaredniaviečnaja dyskateka poźnim subotnim viečaram zaprašaje moładź, a bilet na jaje kaštuje 1200 rubloŭ.

Na Zamkavaj hary buduć prachodzić rycarskija turniry. Uvachod na ich płatny: praŭda, bilety kaštujuć zusim niadoraha. Kab trapić na turniry miečnikaŭ i łučnikaŭ, treba zapłacić 1100 rubloŭ, a kab nazirać na roznymi buhurtami — 1500 rubloŭ.

Pra načleh i charčavańnie haściam «Rycarskaha festu» rajać pakłapacicca zahadzia. Žyć možna navat ŭ spalnych karpusach staražytnaha ijezuickaha manastyra, na terytoryi jakoha budzie pracavać i mini-kafe. Dadatkovuju infarmacyju atrymajcie ŭ adździele kultury Mścisłaŭskaha rajvykankama (02240)20967.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?