U redakcyjnym artykule pad takoj nazvaj upłyvovaje rasiejskaje vydańnie «Viedomosti» analizuje perspektyvy novaj rasiejskaj palityki adnosna Biełarusi.

Prapanujem vašaj uvazie poŭny tekst artykułu ŭ pierakładzie na biełaruskuju movu.

«Na pieršy pohlad, padstava dla čarhovaha abvastreńnia adnosinaŭ pamiž Rasiejaj i Biełaruśsiu — drobnyja prydzirki. Dźmitry Miadźviedzieŭ pakryŭdziŭsia, što Alaksandr Łukašenka nia vykanaŭ abiacańnia pryznać niezaležnaść Abchazii i Paŭdniovaj Asetyi, biełaruski prezydent, u svaju čarhu, zajaviŭ, što ničoha nie abiacaŭ, a kali i abiacaŭ, to ŭ abmien na „nivelavańnie nastupstvaŭ“ u adnosinach z EZ, ZŠA i SND, jakoha nie dačakaŭsia. Kreml pahražaje apublikavać stenahramu słoŭ Łukašenki, sustreča dvuch prezydentaŭ na samicie ADKB u Jerevanie pad pytańniem.

Zdavałasia b, čaho asablivaha? Pryznali Abchaziju i Paŭdniovuju Asetyju tolki Rasieja, Naŭru, Nikarahua i Venesueła. Nievierahodna družalubny Maskvie ŭkrainski prezydent Viktar Janukovič nie źbirajecca hetaha rabić, i nichto jaho za heta nia łaje.

Na spravie prydzirka vielmi symbaličnaja. Režym Łukašenki doŭhija hady razhladaŭsia Maskvoj u jakaści asnoŭnaha sajuźnika ŭ baraćbie z „varožym Zachadam“ i ŭ hetaj jakaści atrymlivaŭ palityčnuju i ekanamičnuju padtrymku. Va ŭmovach idealahičnaha supraćstajańnia pamiž ZŠA i EZ, z adnaho boku, i Rasiejaj — z druhoha, „buferny“ Łukašenka atrymlivaŭ mahčymaść hulać na supiarečnaściach, handlujučy lajalnaściu. Jon tak dobra navučyŭsia manipulavać svaim najbujniejšym susiedam, što pieratvaryŭsia dla Maskvy ŭ pastajanny zubny bol.

Tak što ŭ Maskvie napeŭna zadumvalisia ab kiravanaj „kalarovaj revalucyi“ ŭ Biełarusi, prymierkavanaj da vybaraŭ i praviedzienaj na „našu“ karyść. „Voś byŭ by hodny adkaz na niedružalubnyja revalucyi ŭ Hruzii i va Ŭkrainie“ — ciažka ŭjavić, što hetaja pryvabnaja dumka nikoli nie naviedała rasiejskich palitykaŭ. Ale heta niebiaśpiečny šlach. Nieviadoma, jakoha monstra možna sparadzić, padtrymaŭšy na vybarach jakoha-niebudź niepradkazalnaha lidera, usio palityčnaje majsterstva jakoha źviadziecca da taho, kab pieraciahnuć na siabie rasiejskija pieradvybarčyja hrošy.

Pakul sprava abmiažoŭvajecca niepryhožaj infarmacyjnaj vajnoj — u Rasiei pakazali seryjał „Chrosny baćka“, u jakim Łukašenku, faktyčna, abvinavačvajuć va ŭstalavańni dyktatury i pryvodziać psychaneŭralahičny dyjahnaz. Prapahandysckaja kampanija, nakiravanaja na biełaruskaha vybarščyka, miarkujučy pa ŭsim, śviedčyć ab tym, što Maskva robić staŭku na źmienu biełaruskaha prezydenta, ale imkniecca abyścisia biaz tankaŭ i hazavaj zahłuški.

Samo pa sabie žadańnie nie vykarystoŭvać ciažkich srodkaŭ možna tolki vitać, bo heta „miakkaja siła“, upłyŭ biaz hvałtu.

Atrymlivajecca, praŭda, što rasiejskaja „miakkaja siła“ adroźnivajecca kiepskim hustam, charakternym dla krain, dzie infarmacyjnyja systemy kantralujucca dziaržavaj.
Małavierahodna, što źmiena prezydenta ŭ Biełarusi adbudziecca na bližejšych vybarach (pačatak 2011 h.), zanadta nizkija rejtynhi ŭ vierahodnych kandydataŭ ad apazycyi.
Ź inšaha boku, u Łukašenki niama vopytu vybaraŭ va ŭmovach rezka nehatyŭnaha infarmacyjnaha fonu z boku Rasiei.

Napeŭna, u jaho jość jašče mahčymaść kupić lajalnaść Kramla, ale ź vidavočnaj porcyjaj prynižeńnia i na karotki termin (heta značyć damoviŭšysia ab chutkim sychodzie na prymalnych umovach).

Napeŭna, jość u Łukašenki i mahčymaść źmiakčyć režym i čarhovy raz pastukaŭsia ŭ Eŭropu — heta, u pryvatnaści, niasie ryzyki sudovaha pieraśledu z boku paciarpiełych ad režymu.

Miž tym, u Rasii adnosiny z Zachadam paśla „pierazahruzki“ palepšylisia, Maskva navat abviaściła ab prazachodnim raźvićci svajoj źniešniaj palityki. Stratehičnaja rola Biełarusi jak tranziciora enerharesursaŭ źniziłasia z prychodam da ŭłady va Ŭkrainie Janukoviča. Samy čas vučycca pravilna vykarystoŭvać „miakkuju siłu“, dziejničać z rozumam, nie stvarajučy novych padstavaŭ dla nianaviści da Rasiei.

Asabistyja kryŭdy — a ich u rasiejskaha premjera i prezydenta na Łukašenku nazapasiłasia šmat — mohuć padšturchoŭvać Kreml da žorstkim metadaŭ, ale heta spakusy, jakija možna pieraadoleć. Najvažniejšy sajuźnik Rasiei ŭ Biełarusi — heta biełaruskaje hramadztva. Jaho nielha stracić».

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?