«Dynama» Kijeŭ — BATE Barysaŭ — 2:2 11

U pieršym matčy Lihi Jeŭropy BATE krychu nie chapiła, kab vyjhrać u haściach.

Fota Reuters.

U pieršym matčy hrupavoha turniru Lihi Jeŭropy barysaŭski BATE i kijeŭskaje «Dynama» zhulali žyvieńkuju, dynamičnuju, viasiołuju ničyju — 2:2. Hulnia prajšła ŭ Kijevie, na stadyjonie imia Valeryja Łabanoŭskaha (pačałasia, a 20-j).

Składy kamandaŭ:

Dynama: M.Koval, Bietao, Jarmolenka, Mileŭski, Michalik, Husieŭ (Harmaš, 57), Mahrao (Al-Kadury, 79), R.Jaromienka, Chačerydzi, Ninkavič, Leandra Ałmiejda (Andre, 74).

hałoŭny trenier Valeryj Hazajeŭ.

BATE: Vieramko, Lichtarovič (D.Baha, 38), Šytaŭ, Jurevič, Bresan (Vaładźko, 77), Niachajčyk, Radźkoŭ, Paŭłaŭ (Skavyš, 64), Bardačoŭ, Radzivonaŭ, Alachnovič.

hałoŭny trenier Viktar Hančarenka.

Hały: Radzivonaŭ (3), Mileŭski (34), R. Jaromienka (44), Niachajčyk (53-ja).

Papiaredžańni: Bardačoŭ (12), Šytaŭ (29), Michalik (63), Chačerydzi (75).

***

BATE užo na 3-j chvilinie adkryŭ lik. Pravaliłasia abarona «Dynama», i Vital Radzivonaŭ svoj šanc nie upuściŭ. Na 13-j chvilinie za znos Bardačovym Husieva ŭ varoty Vieramko byŭ pryznačany pienalci, ale ŭradženiec Minska Arciom Mileŭski nie zdoleŭ pierajhrać biełaruskaha hałkipiera.

Mileŭski zabiŭ, ale na 34-j chvilinie, kali mocna pamyliŭsia Ihar Šytaŭ, dumajučy, što ŭkrainski futbalist zabieh u afsajd. Pry kancy pieršaha tajma haspadary vyjšli napierad (Jaromienka), ale ŭžo ŭ druhim tajmie BATE lik zraŭniaŭ: z vuhła štrafnoj miač u pravy kut varot pakłaŭ Pavieł Niachajčyk.

Praź niekalki chvilin Alaksandr Jurevič dalnim udaram pa varotach (mietraŭ z 30-ci) ledź nie vyvieŭ BATE napierad. Vyručyŭ 18-hadovy hałkipier «Dynama» Maksim Koval.

Abiedźvie kamandy pamylalisia i ŭ atacy, i asabliva ŭ abaronie i pry lepšaj realizacyi — a časam i šancavańni! — kančatkovy lik hulni moh być značna bolšym. Matč atrymaŭsia vielmi dynamičnym i vidoviščnym. Biełarusy łavili ŭkraincaŭ na kontratakach,

tak za niekalki chvilin da kanca sustrečy Maksim Skavyš ledź nie pastaviŭ tłustuju kropku.

Znoŭ nie pašancavała.

U druhim matčy našaj hrupy, što prajšoŭ u Ałkmaary, čempijon Hałandyi «AZ» pierajhraŭ małdoŭski «Šeryf»,

jaki ŭznačalvaje biełaruski śpiecyjalist Andrej Saśnicki, ź likam — 2:1 (Hudmundsan, 14, Jalens, 83 — Ektar Marena, 68-aŭtahoł).

Stanovišča kamandaŭ: AZ — 3, Dynama, BATE — 1, Šeryf — 0.

Praz dva tydni, 30 vieraśnia, u Minsku sustrenucca BATE i AZ. Pačatak hulni ŭ 22:05.

U Ciraspali ŭ hety dzień zhulajuć «Šeryf» i «Dynama». Kijaŭlanie pryjeduć u Minsk 2 śniežnia.

***

U hrupie «A» poznanski «Lech» u Turynie zhulaŭ uničyju z «Juvientusam» — 3:3. Hierojem matču staŭ forvard polskaha kłuba Arciom Rudnieŭ, što zrabiŭ chiet-tryk. Siarhiej Kryviec pravioŭ uvieś matč i 74-j chvilinie zarabiŭ žoŭtuju kartku. U toj ža hrupie «ManSici» vyjhrali ŭ haściach u «Zalcburha» — 2:0.

U hrupie «G» pieciarburhski «Zienit» vyjhraŭ u haściach u bielhijskaha «Anderlechta» 3:1 (i tut u matčy byŭ chiet-tryk — Alaksandr Kieržakoŭ). Varoty rasijskaha kłuba baraniŭ hałkipier zbornaj Biełarusi Jury Žaŭnoŭ.

AH

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH