Dva hady tamu «Biełaruskija naviny» šmat pisali pra dziŭnuju śmierć u Niderłandach 26-hadovaj biełaruski Kaciaryny Chaniak.
Jaje cieła znajšli pad łožkam 4-hadovaj dački, zamuravanaje ŭ skryniu z budaŭničymi sumiesiami.
Siońnia stała viadoma, što sudova-miedycynskaja ekśpiertyza pa fakcie śmierci biełaruski zavieršana.
Minčanka Kaciaryna Chaniak 1981 hoda naradžeńnia źjechała ŭ Niderłandy i vyjšła tam zamuž za miascovaha žychara Roberta Jana Brokiela, ź jakim jany byli znajomyja z 2001 hoda.
Niderłandskaja presa raniej pisała, što Chaniak pryjechała ŭ bielhijski Antverpien pracavać u adnym z publičnych damoŭ, a Brokiel byŭ jaje klijentam. Taksama abmiarkoŭvałasia, što sužency mieli svabodnyja adnosiny. Ale biełaruskija svajaki siamji hetyja fakty Kacinaj bijahrafii admaŭlali: pavodle ich słovaŭ, u Bieniluks jana jeździła adpačyvać.
Pa apoviedach najlepšaj niderłandskaj siabroŭki Kaci, u kancy lutaha 2007 hoda jana adpraviła joj sms pra toje, što «muž sprabuje jaje zabić», padazrajučy, što ŭ jaje jość u Biełarusi kachanak. Taksama ŭ paviedamleńni havaryłasia, što jana z dačkoj źjazdžaje ŭ Minsk. U paźniejšaj telefonnaj razmovie Kacia paviedamiła, što ŭžo znachodzicca ŭ aeraporcie kala Brusiela.
Apošniaje sms, jakoje atrymała siabroŭka, było aptymistyčnym: «Dabrałasia dobra, chutka stelefanujemsia». Bolš ad Kaci ničoha nie čuli, u Minsk jana nie pryjechała.
U lipieni 2007 hoda siamja źviarnułasia z zajavaj ab źniknieńni Kaci ŭ Maskoŭskaje RUUS Minska. Zatym infarmacyja pastupiła ŭ Nacyjanalnaje centralnaje biuro Interpoła, jakoje pa svaich kanałach padklučyłasia da vyśviatleńnia abstavinaŭ źniknieńnia žančyny.
Siostry Kaci telefanavali Robertu Janu -- im jon raspaviadaŭ, što Kacia źjechała ŭ Amsterdam, dzie jon zdymaje joj kvateru, śćviardžaŭ, što dapamahaje joj hrašyma. Na pytańnie, čamu jana nie maje znosiny sa svajakami, adkazvaŭ: nie choča. Pry hetym u siabie na radzimie, naprykład, u dziciačym sadku dački Nikol, kazaŭ, što jahonaja žonka źjechała na radzimu, u Minsk.
Pavodle infarmacyi niderłandskaj presy, u krasaviku 2007 hoda Brokiel źviarnuŭsia ŭ palicyju z prośbaj adšukać jaho žonku. U śniežni 2007 hoda Robert Jan razam z dačkoj i novaj siabroŭkaj (ci nianiaj?) pierajechaŭ u amierykanski štat Fłaryda.
Pareštki Kaci byli znojdzienyja 18 lutaha 2008 palicyjaj u domie ŭ horadzie Baarle-Nasaŭ, što mieścicca prosta na miažy Niderłandaŭ i Bielhii, u horadzie, dzie žančyna žyła z mužam i dačkoj.
Cieła znachodziłasia ŭ skryni, było zalita budaŭničaj sumieśsiu i było pad padłohaj pad łožkam 4-hadovaj dački sužencaŭ. Pakolki jano było znojdziena ŭ toj častcy doma, jakaja raźmiaščajecca ŭ Bielhii, rasśledavańnie było pieradadziena bielhijskim uładam.
27 lutaha 2008 Robert Jan pa patrabavańni palicyi Niderłandaŭ razam z dačkoj viarnuŭsia z amierykanskaha štata Fłaryda, kab paŭstać pierad pravasudździem. Z samaha pačatku jon kazaŭ pra svaju nievinoŭnaść. Siońnia jon volny, ale zastajecca hałoŭnym padazravanym u zabojstvie biełaruski.
Niderłandski biźniesmen maje ŭ Bielhii i Niderłandach vielmi sumnieŭnuju reputacyju. Jon ŭłaśnik bardelaŭ i padazravaŭsia va ŭchileńni ad vypłaty padatkaŭ.
U Brokiela dva advakaty -- bielhijski i hałandski, abodva viadomyja i vysokaapłatnyja. Žurnalisty padazrajuć, što pasłuhi jurystaŭ apłačvaje siamja jaho novaj siabroŭki -- raniej jon pracavaŭ na hetuju siamju ŭ Bielhii, dzie jany trymajuć sietku bardelaŭ, a taksama źviazanyja z mafijaj i narkotykami.
Ad samaha pačatku słabym bokam abvinavačvańnia była składanaść paćvierdžańnia hvałtoŭnaj hibieli biełaruski. Ad samaha pačatku było składana dakazać, što cieła, znojdzienaje ŭ skryni z budaŭničaj sumieśsiu, naležyć Kaci. Identyfikacyi dapamahli jaje asabistyja rečy (hadzińnik, łancužki, upryhožvańni), a taksama hrudnyja impłantaty i zuby, jakija jana niezadoŭha da hibieli pratezavała. Vysnovy paćvierdziŭ i analiz DNK.
Pakolki śledstva ŭ naležny termin nie ŭstanaviła pryčyny śmierci biełaruski, padazravany Robert Jan byŭ vyzvaleny biez abmiežavańnia pierasoŭvańnia.
Jak paviedamlaje 22 vierasienia 2010 bielhijskaja Gazet van Antwerpen, da sudova-miedycynskaj ekśpiertyzy pa fakcie śmierci Kaciaryny Chaniak byli pryciahnutyja ekśpierty ź Vialikabrytanii, Hiermanii i ZŠA, ale da jakich vysnovaŭ jany pryjšli -- pakul nieviadoma.
Čakajecca, što ŭ pačatku listapada projdzie pieršaje za dva hady dasudovaje słuchańnie.
Pakul nie viadoma, ci budzie pradjaŭlenaje abvinavačvańnie ŭ zabojstvie Robertu Janu Brokiel. Jon pa-raniejšamu nie pryznaje svajoj viny i nastojvaje, što, pavodle jahonaj infarmacyi, žonka źjechała ŭ Miensk.
Apošni čas biźniesmen žyŭ i pracavaŭ u Bielhii, a dačka Nikol -- u jaho baćkoŭ u Niderłandach, u jaje hramadzianstva heta krainy.
Bielhijskija žurnalisty paviedamlajuć, što Brokielu pahražaje da 30 hadoŭ turmy za zabojstva. Kali dokazaŭ taho, što Kacia była zabitaja i zabitaja mienavita svaim mužam budzie niedastatkova, Robiert Jan moža atrymać da hodu turemnaha źniavoleńnia za zachoŭvańnie cieła ŭ svaim domie.
