Lidar kampanii «Havary praŭdu!» Uładzimir Niaklajeŭ raźličvaje damovicca z astatnimi demakratyčnymi pretendentami na pasadu prezidenta ab vyłučeńni adzinaha kandydata.
Pra heta jon paviedamiŭ u intervju BiełaPAN.
«Zrazumieła, što šmatkviećcie z 17 inicyjatyŭnych hrup ablacić. Realna, akramia Łukašenki,
mohuć pradoŭžyć udzielničać u vybarčaj kampanii ŭ jakaści kandydata ŭ prezidenty Niaklajeŭ, Sańnikaŭ, Ramančuk i Kastusioŭ. Heta maksimum»,
— skazaŭ jon.
Niaklajeŭ ličyć, što pieramoŭny praces ab adzinym kandydacie pačniecca da zaviaršeńnia zboru podpisaŭ. «Užo ŭ druhoj pałovie zboru podpisaŭ budzie vidać, chto jość chto. Pryčym pačniecca ruch nasustrač adzin adnamu najpierš tych, chto nie budzie nabirać nieabchodnuju kolkaść podpisaŭ. Kab trymać marku, zachavać tvar, mienavita jany buduć ruchacca da abjadnalnaha pracesu, choć ciapier byccam pra jaho i nie havorać», — skazaŭ jon.
Niaklajeŭ adznačyŭ, što viadzie pieramovy «z usimi».
«I nielha skazać, što hetyja pieramovy zusim nie praduktyŭnyja», — padkreśliŭ jon.
«Kali pačniecca rehistracyja kandydataŭ, Łukašenku budzie nad čym padumać, — skazaŭ Niaklajeŭ. — I heta budzie niezaležna ad taho, źbiare chto realnyja 100 tysiač podpisaŭ ci nie. Ułady prosta mohuć uklučyć na karyść zručnaha joj kankurenta proźvišča z telefonnaj knihi, i nichto na heta ŭ Centrvybarkamie nie źviernie ŭvahi».
Pavodle mierkavańnia Niaklajeva, navat kali apazicyja nie abiare adzinaha kandydata, ale choć by vyjdzie na realnuju mahčymaść jaho vyłučeńnia, u Łukašenki buduć źviazanyja ruki. «Jon nie budzie viedać, što zrobić taki kandydat. Rašeńnie, jakoje moža pryniać adziny kandydat, moža być vielmi niečakanym dla ŭład», — miarkuje jon.
Niaklajeŭ taksama skazaŭ, što, kali jamu ŭ rehistracyi budzie admoŭlena, jon padtrymaje inšaha demakratyčnaha kandydata ŭ prezidenty.
