Nastaŭnica dziejničała zhodna Instrukcyi ab paradku farmiravańnia kultury vusnaj i piśmovaj movy.

Nastaŭnik prymusiŭ baćkoŭ zamianić dziońnik dziciaci tamu, što jany zapoŭnili jaho na biełaruskaj movie.

Hetaja historyja adbyłasia z treciakłaśnikam adnoj z himnazij Hrodna. Tata z synam kupili dziońnik, vydadzieny na biełaruskaj movie, razam zapoŭnili jaho na «rodnaj movie». Nastaŭnica, ubačyŭšy nieparadak, paprasiła kupić novy i padpisać jaho pa-rasijsku.

— Na moj pohlad, ja dziejničaŭ łahična: na jakoj movie nadrukavany, na takoj i zapaŭniajem. Ale nastaŭnik śćviardžaŭ, što ŭ viadzieńni dakumientaŭ pavinna być adzinstva: raz mova navučańnia ŭ škole rasijskaja, značyć, i zapisy ŭ dziońniku pavinny być pa-rasijsku rukoj dziciaci.
Bo pry pieršaj ža praviercy dziońnikaŭ administracyja škoły ci kamisija z rajonnaha adździeła adukacyi zrobić strohuju zaŭvahu, —raspaviadaje Valeryj, baćka chłopčyka.

U vyniku siamja patrabavańniu padparadkavałasia, ale asadak zastaŭsia.

Baćki ŭpeŭnieny: takim staŭleńniem u dziaciej adbivajecca cikavaść da movy, bo ŭ dziciaci adkłałasia ŭ hałavie: «mova» heta drenna, z-za jaje adny prablemy.
Nie zrazumieli jany i taho, navošta tady ŭ našaj krainie drukujuć dakumienty na biełaruskaj, kali zapaŭniać ich na hetaj movie nielha. Darečy, «brakavany» dziońnik im pakul nie viarnuli.

Pa zakonie nastaŭnik mieŭ racyju. Zavuč pačatkovych kłasaŭ zhadanaj himnazii paćvierdziła, što

piedahoh dziejničaŭ zhodna Instrukcyi ab paradku farmiravańnia kultury vusnaj i piśmovaj movy. U joj havorycca, što ŭsia školnaja dakumientacyja pavinna vieścisia na asnoŭnaj movie vykładańnia, a heta rasijskaja.
Pavodle jaje słoŭ, «u takim ža stanoviščy znachodziacca i nastaŭniki, jakija viaduć zapisy na rasijskaj movie ŭ kłasnych žurnałach, vydadzienych na «rodnaj movie». Ale kali b patryjatyčny tata nastajaŭ, dla jaho syna, mahčyma, zrabili b vyklučeńnie. Praŭda, na piednaradzie pierš zadumalisia b, ź jakimi ciažkaściami sutykniecca kłas. Bo dyktavać treciakłaśnikam chatniaje zadańnie pryjdziecca pa čarzie na dvuch movach, a heta doŭha i budzie błytać dziaciej.

U adździele adukacyi Leninskaha rajona spačatku aburylisia: «u nas ža dźviuchmoŭje, dzicia moža zrabić vybar». Zatym zazirnuli ŭ papiery: «pa Instrukcyi pisać pa-biełarusku nie naležyć». «Ale na praktycy my b zrazumieli nastroj siamji i rabić zaŭvahu škole nie stali b», — skazała namieśnik načalnika RHA Aksana Tarasievič.

Voś i atrymlivajecca, što ŭ teoryi ŭ nas dźvie dziaržaŭnyja movy, a na praktycy padtrymka adnoj ź ich całkam zaležyć ad pohladaŭ kankretnaha piedahoha abo čynoŭnika.

«Zakon nie moža ŭličyć usie situacyi, tamu padobnyja vypadki treba raźbirać jak vyklučnyja i na karyść vučnia, bo ŭ krainie dźviuchmoŭje»,
— patłumačyła hałoŭny inśpiektar upraŭleńnia ahulnaj siaredniaj adukacyi Ministerstva adukacyi Iryna Kirynovič. Zatym raschvalavana kinuła: «drukujuć na biełaruskaj, kab choć tak nie advykli ad rodnaj movy», i adpraviła pa kamientary da načalnika. Ale na praciahu troch dzion zastać jaho ja nie zmahła. U vyniku dasłała ŭ Ministerstva adukacyi aficyjny zapyt. Nie paźniej čym praź miesiac nam pavinny adkazać, čamu ž pisać na biełaruskaj u školnych dakumientach nielha.
Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?