Siońnia startuje novy etap vybarčaj kampanii — zbor podpisaŭ u padtrymku vyłučeńnia kandydataŭ u prezidenty Biełarusi. Jon budzie doŭžycca pa 29 kastryčnika ŭklučna.

Na sustrečy z žurnalistami 28 vieraśnia staršynia Centrvybarkama Lidzija Jarmošyna zajaviła, što «dla zboru podpisaŭ pa vyłučeńni kandydataŭ u prezidenty stvarajucca maksimalna zručnyja ŭmovy».

«Z honaram mahu skazać, što rašeńni vykankamaŭ, jakija ŭviali šmat abmiežavańniaŭ pa miescach dla zboru podpisaŭ, pierahledžanyja albo pierahladajucca», — padkreśliła Jarmošyna.

Jana zapeŭniła, što abmiežavańni pry zbory podpisaŭ buduć minimalnymi. U pryvatnaści, pavodle słoŭ kiraŭnika CVK, zbor podpisaŭ dazvoleny ŭ padziemnych pierachodach, kala budynkaŭ vakzałaŭ, bazaraŭ, handlovych centraŭ.

U Minsku abmiežavańni buduć ustanoŭlenyja na troch płoščach — Kastryčnickaj, Niezaležnaści i Pieramohi. Nielha budzie źbirać podpisy na adlehłaści bližej za 200 mietraŭ ad budynkaŭ Administracyi prezidenta, Nacyjanalnaha schodu Respubliki Biełaruś, Savieta ministraŭ i teleradyjocentra, a taksama 50 mietraŭ ad budynkaŭ, dzie raźmiaščajucca inšyja orhany ŭłady (prakuratura, sudy i h.d.).

Dla rehistracyi kandydatam u prezidenty inicyjatyŭnaj hrupie nieabchodna sabrać nie mienš za 100 tysiač podpisaŭ u jaho padtrymku.

Źbirać podpisy buduć 17 inicyjatyŭnych hrup pretendentaŭ na pasadu kiraŭnika dziaržavy:

— inžyniera-budaŭnika Piatra Barysava (u inicyjatyŭnaj hrupie 11 čałaviek);

— lidara Libieralna-demakratyčnaj partyi Siarhieja Hajdukieviča (10.443);

— pieršaha namieśnika staršyni Biełaruskaj partyi «Zialonyja» Juryja Hłušakova (244);

— biespracoŭnaha Siarhieja Ivanova (129);

— namieśnika staršyni Partyi BNF Ryhora Kastusiova (1.306);

— zahadčyka łabaratoryi abstalavańnia jadziernych enierhietyčnych ustanovak Abjadnanaha instytuta enierhietyčnych i jadziernych daśledavańniaŭ «Sosny» Ivana Kulikova (107);

— dziejnaha prezidenta Alaksandra Łukašenki (8.403);

— staršyni arhkamiteta pa stvareńni sajuza «Za madernizacyju» Alesia Michaleviča (1.795);

— lidara hramadzianskaj kampanii «Havary praŭdu!» Uładzimira Niaklajeva (3.271);

— indyvidualnaha pradprymalnika ź Viciebska Uładzimira Pravalskaha (187);

— sustaršyni arhkamiteta pa stvareńni partyi «Biełaruskaja chryścijanskaja demakratyja» Vitala Rymašeŭskaha (1.700);

— namieśnika staršyni Abjadnanaj hramadzianskaj partyi Jarasłava Ramančuka (1.465);

— načalnika siektara źniešnieekanamičnaj dziejnaści AAT «Viciebski płodaaharodninny kambinat» Siarhieja Ryžova (123);

— lidara kampanii «Jeŭrapiejskaja Biełaruś» Andreja Sańnikava (2.003);

— lidara arhkamiteta pa stvareńni Biełaruskaj sacyjał-demakratyčnaj partyi (Narodnaja Hramada) Mikałaja Statkieviča (1.547);

— staršyni rady Asacyjacyi małoha i siaredniaha pradprymalnictva Viktara Ciareščanki (1.301);

— dyrektara TDA «Tryvium» Dźmitryja Usa (1.354).

Praktyčna ŭsie pretendenty na pasadu prezidenta zajavili, što ich inicyjatyŭnyja hrupy ŭ stanie sabrać nieabchodnuju kolkaść podpisaŭ.

Pavodle mierkavańnia palitołahaŭ, najbolšyja šancy sabrać 100 tysiač podpisaŭ u tych pretendentaŭ na post prezidenta, čyje inicyjatyŭnyja hrupy naličvajuć bolš za 1,5 tysiačy čałaviek.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?