Andrej Sańnikaŭ asabista zaklikaŭ ludziej raśpisvacca za siabie.
Addać svoj podpis za Sańnikava chacieli mnohija.
Jury Čavusaŭ (sprava) źbiraje podpisy za Ryhora Kastusiova.
Spadarynia pra Ramančuka: «Niešta jon nadta chudy».
30 vieraśnia pačaŭsia etap zboru podpisaŭ u padtrymku vyłučeńnia kandydataŭ u prezidenty Biełarusi. Sabrać nieabchodnuju kolkaść płanujuć 17 kandydataŭ.Zrešty, užo zaraz vidavočna, što daloka nie ŭsie spraviacca z hetaj nialohkaj spravaj.
Na bližejšy miesiac pikiety ŭ horadzie, a taksama abychod aktyvistami kampanij kvateraŭ stanie zvykłaj źjavaj. Užo ŭ pieršy dzień častka kandydataŭ aktyŭna ŭziałasia za pracu.
Blizu rynku Kamaroŭka było zaŭvažana try pikiety pa zbory podpisaŭ. La «Impulsu», niahledziačy na doždž, raźmiaściłasia kamanda Andreja Sańnikava.Sam kaardynatar «Jeŭrapiejskaj Biełarusi» taksama znachodziŭsia tut. Maładyja ludzi zaklikali minakoŭ pastavić svoj aŭtohraf za kandydata i vialikaja kolkaść z radaściu heta rabiła.
Pašpartnyja źviestki pierapisvali try dziaŭčyny, ale i hetaha časam było mała. Navat čerhi nievialikija vystrojvalisia.
Źviarnuła ŭvahu na toje, što absalutna nie chacieli padpisvacca maładyja dziaŭčaty, a voś ludzi starejšaha pakaleńnia padychodzić da zborščykaŭ śmialej.U niekatorych nie było z saboj pašpartoŭ, abiacali pryjści zaŭtra.
Udavałasia ŭhavorvać navat tych ludziej, što spačatku admaŭlalisia padpisvacca. Prastajaŭšy tak bolš za hadzinu, chucieńka sabralisia i źjechali ŭ inšaje miesca. Siońnia płanujuć źbirać taksama na Akademii navuk i stancyi mietro «Puškinskaj».
Zdajecca, što kamanda Sańnikava abrała dla zboru vielmi zručnaje miesca. A voś hrupy Kastusiova i Ramančuka stali ŭ padziemnym pierachodzie, pobač ź ciotkami, što pradajuć viazanyja škarpetki.
U pikiecie za Kastusiova ŭdzielničali dva čałavieki. Adzin ź jakich — viadomy juryst Jury Čavusaŭ.
Ludzi choć i padychodzili da stendu, ale nie raśpisvalisia. Adny kazali, što hatovyja addać svoj hołas tolki Łukašenku, inšyja — Paźniaku. Šmat z kim byli haračyja dyskusii na miažy svarki.
Pobač raźmiaściŭsia i Jarasłaŭ Ramančuk. Jaho hrupa była bolš šmatlikaja za beenefaŭskuju. Kožny mieŭ na sabie žoŭtuju cišotku z aficyjnaj emblemaj kandydata.
Hałoŭnaj pretenzijaj da Ramančuka stałasia toje, što jon… «taki chudzieńki». Tolki pry mnie dvoje patencyjnych vybarcaŭ vykazali takija mierkavańni. Podpis praz heta nie pastavili.
Inšyja kandydaty, peŭna, abrali sabie druhija miescy. Heta tolki pieršy dzień zaciažnoha marafonu pa zbory 100 tysiač podpisaŭ.
