Firma Baldinini zajaviła, što biełaruskaje «Marka» samavolna kapijuje ich pradukcyju.

Ab sumiesnym abutkovym prajekcie viciebskaj kampanii «Marka» i italjanskaj Baldinini było zajaŭlena kala hoda tamu. Havorka išła ab vypusku ŭ Biełarusi bolš tannych anałahaŭ viadomaj italjanskaj marki. Pieršyja boty ŭžo źjavilisia ŭ kramach, kali italjanskija partniory raptam zajavili, što da prajektu nie majuć dačynieńnia, a biełarusy samavolna kapijujuć ich pradukcyju. Takuju pazicyju ahučyŭ dniami kiraŭnik kampanii Džymi Bałdzinini, jaki prylataŭ u Minsk.

Hienieralny dyrektar STAA «Marka» Mikałaj Martynaŭ zapeŭniŭ, što supracoŭnictva z Baldinini aformlena ŭ poŭnaj adpaviednaści z zakanadaŭstvam: byli padpisanyja asnoŭnaja damova i dadatak, u jakim prapisanyja ŭsie ŭmovy supracoŭnictva, u tym liku prava na vypusk u Biełarusi nieabmiežavanaj kolkaści par abutku. Naturalna, havorka išła ab vypusku pradukcyi nie pad markaj Baldinini, a pad inšaj markaj — «Brava».

«Pasłuhi italjanskaj kampanii apłačanyja ŭ poŭnym abjomie», — padkreśliŭ Martynaŭ. Jon adznačyŭ, što

za kalekcyju adnaho siezonu (vosień-zima 2010–2011) zapłacili 150 tysiač jeŭra
i ŭsie dakumienty ŭ paradku. Dadatkovym pahadnieńniem da kantraktu ad 9 sakavika 2010 praduhledžana, što Baldinini pastaŭlaje biełaruskamu boku raspracavanyja im madeli abutku, raskroj, čarciažy, kałodki i ŭzory hetych madelaŭ zhodna sa śpiecyfikacyjaj, a kampanija «San-Marka» (uvachodzić u chołdynh «Marka») moža ich vykarystoŭvać dla ŭłasnaj vytvorčaści abutku, vyrablenaj na asnovie pastaŭlenych madelaŭ sa svaim tavarnym znakam. Havorka idzie ab vytvorčaści dadzienych madelaŭ biez abmiežavańnia času, kolkaści i terytoryi. Ź italjanskaha boku podpis pad dakumientam pastaviŭ Džymi Bałdzinini.

Pry hetym kiraŭnik kampanii Baldinini

Džymi Bałdzinini zajaviŭ, što nijakich piśmovych damoŭlenaściaŭ pamiž bakami nie było, i jon ličyć abutak, jaki vyrablajecca kampanijaj «Marka» pad brendam «Brava», padrobkaj pad Baldinini. «Kopija, ale niakiepskaja», — prakamientavaŭ italjaniec. Pry hetym jon adznačyŭ, što nijakich sudovych razhladaŭ inicyjavać nie źbirajecca.

Što ž prymusiła italjancaŭ admovicca ad supracoŭnictva, pierśpiektyvy jakoha tak aptymistyčna abmiarkoŭvalisia na sustrečy z prem'jer-ministram Biełarusi Siarhiejem Sidorskim hod tamu?

«Napeŭna, nas pačynajuć bajacca — abutak dakładna paŭtaraje italjanskuju marku, ale jaje košt — da 5 razoŭ nižejšy.
Źjaŭlajecca kankurencyja. My pakazali pradukcyju na niekalkich vystavach u Maskvie, pajšli prodažy, i italjanskija partniory vyrašyli ad prajektu adharadzicca», — ličyć Mikałaj Martynaŭ.

Jon raskazaŭ, što pieršaja abutkovaja krama «Brava» ŭžo dziejničaje ŭ Viciebsku, niekalki firmiennych siekcyj adkryta ŭ Minsku. Usiaho ŭ 2010 hodzie miarkujecca vypuścić 40 tysiač par abutku pad markaj «Brava», ź ich u Biełarusi budzie realizavana 60–65%, astatniaje — u Rasii, Ukrainie, rychtujecca taksama adkryćcio kramy ŭ Ryzie.

A voś italjancaŭ biełaruskija kramy nie ŭrazili. Džymi Bałdzinini panarakaŭ na toje, što «ŭ Minsku pahladzieŭ niekalki abutkovych kramaŭ, i jany adstajuć ad italjanskich na 50 hadoŭ». Pry hetym jon upeŭnieny, što škody italjanskaj kampanii biełaruskija vytvorcy nie naniasuć. «Dla Biełarusi jany małajcy, dla nasielnictva krainy jany pracujuć narmalna. Ale abutak, zroblena „Marka“, — usiaho tolki padrobka. Heta nie firmovy abutak Baldinini», — ličyć jon.

STAA «Marka» źjaŭlajecca adnym z najbujniejšych vytvorcaŭ abutku ŭ Biełarusi. U jaho skład uvachodziać kala dziasiatku pradpryjemstvaŭ, u tym liku try fabryki pa vytvorčaści abutku. Pa vynikach 2009 hoda kampanija vypuściła 3,5 młn par abutku, što na 452 tys. par abutku bolš, čym u 2008 hodzie.

Kampanija Baldinini stvoranaja ŭ 1910 hodzie ŭ horadzie San Maŭra Paskali (Italija), dzie da hetaha času znachodziacca jaje asnoŭnyja vytvorčyja płoščy. Vypuskaje vysakajakasny elitny skurany abutak siaredniaj i najvyšejšaj cenavaj katehoryi i aksesuary. Na rynkach SND i Uschodniaj Jeŭropy stvoranaja monabrendavaja tavarapravodnaja sietka Baldinini.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?