Hramadzianin Tadžykistana Abdurazok Haforaŭ vyjhraŭ spravu suprać Rasii ŭ Jeŭrapiejskim sudzie pa pravach čałavieka. Sud pryznačyŭ jamu kampiensavańnie ŭ pamiery amal 22 tysiač jeŭra.
Abdurazok Haforaŭ u 2006 hodu byŭ aryštavany ŭ Chudžandie (na poŭnačy Tadžykistana). Jaho abvinavacili ŭ suviaziach ź isłamisckim rucham "Chizb ut-Tachryr", dziejnaść jakoha ŭ Tadžykistanie aficyjna zabaroniena. Pa słovach samoha Haforava, da isłamistaŭ jon dačynieńnia nie maje.
Paśla zatrymańnia Haforava, pa jaho słovach, źbivali i padviarhali katavańniam. Praź niekalki miesiacaŭ jamu atrymałasia biehčy z-pad varty (jak mienavita, nie ŭdakładniajecca). Paśla hetaha jon pakinuŭ Tadžykistan i prybyŭ u Rasiju.
U žniŭni 2008 hady Haforaŭ byŭ zatrymany ŭ Maskvie pa zapycie tadžykskich uład. Jon zapytaŭ u Rasii prytułak, ale atrymaŭ admovu.Hienieralnaja prakuratura RF pahadziłasia vydać jaho Tadžykistanu. Zatrymany sprabavaŭ abskardzić heta rašeńnie ŭ roznych instancyjach (u tym liku ŭ Viarchoŭnym sudzie RF), ale nie damohsia pośpiechu. Praŭda, da vydačy Haforava sprava ŭsio ž nie dajšło: ekstradycyju prypyniŭ Strasburhski sud.
JESPČ, razhledzieŭšy akaličnaść spravy, pryjšoŭ da vysnovy, što rasijski bok parušyŭ niekalki pałažeńniaŭ Jeŭrapiejskaj kanviencyi pra abaronu praŭ čałavieka. Pierš za ŭsio,
rasijskija ŭłady, jak kanstatuje sud, dali zhodu na ekstradycyju nasupierak tamu, što na radzimie hramadzianinu Tadžykistana pahražali katavańni(u rašeńni suda adznačajecca, što katavańni zatrymanych źjaŭlajucca ŭ respublicy raspaŭsiudžanaj praktykaj) .
Akramia taho, Haforava, pa infarmacyi JESPČ, trymali pad vartaj u Rasii daŭžej, čym dazvalaje rasijskaje zakanadaŭstva (u cełym jon pravioŭ u śledčym izalatary bolš za 20 miesiacaŭ).
Pa rašeńni suda Rasiju abaviazali vypłacić pazoŭniku kampiensacyju: 15 tysiač jeŭra za maralnuju škodu i jašče 6,8 tysiačy jeŭra za sudovyja vydatki.
