U studzieni—žniŭni ŭ Biełarusi pradadziena 37,6 młrd dalaraŭ, a kuplena 41,3 młrd. Heta robić źmienu finansavaj palityki niepaźbiežnaściu.
U studzieni—žniŭni na ŭsich siehmientach valutnaha rynku Biełarusi było pradadziena 37,6 młrd dalaraŭ, a kuplena 41,3 młrd. Takim čynam, pa vynikach vaśmi miesiacaŭ skłaŭsia čysty popyt na zamiežnuju valutu ŭ pamiery 3,7 młrd dalaraŭ. Prykmietna, što pa vynikach siami miesiacaŭ deficyt składaŭ 2,8 młrd. Značyć, u žniŭni deficyt biahučaha rachunku rezka ros.
Praciahły čas popyt na dalary i jeŭra na Biełaruskaj valutna-fondavaj biržy (BFVB) stabilna pieravyšaje prapanovu. Hety dysbałans zrazumieły. Apošnija hady kraina ekspartuje mienš, čym impartuje. Roźnicu pakryvali zamiežnyja kredyty i srodki ad pryvatyzacyi dziaržaŭnaj majomaści.
Pad vosień deficyt biahučaha rachunku ŭzros anamalna.
Heta možna źviazać z pavyšeńniem raschodaŭ dziaržavy ŭ suviazi z administratyŭnym rostam zarobkaŭ da 500 dalaraŭ — pad vybary.
Jak paviedamili ŭ Nacbanku, dysbałans skłaŭsia ŭ asnoŭnym za košt kupli valuty subjektami haspadarańnia,tady jak u devalvacyjnym 2009 hodzie valutu aktyŭna skuplali i ludzi.
Pavodle źviestak Nacbanka, asnoŭny abjom kupli zamiežnaj valuty pradpryjemstvami byŭ nakiravany na nastupnyja mety: pahašeńnie kredytaŭ (4,9 młrd z dolaj u ahulnym abjomie 37,8%); zakupka syraviny i materyjałaŭ (2,6 młrd z dolaj u ahulnym abjomie 20,2%); zakupka abstalavańnia i kamplektujučych (1,7 młrd z dolaj u ahulnym abjomie 12,7%); apłata paliva (1,6 młrd z dolaj u ahulnym abjomie 12,5%).
Miž tym źnižeńnie devalvacyjnych čakańniaŭ, a taksama vysokija pracentnyja staŭki ŭ bankach pa depazitach u nacyjanalnaj valucie pryviali da stanoŭčaha salda na rynku valutnaj hatoŭki. U studzieni—žniŭni fizičnyja asoby pradali na 62,3 młn dołaraŭ bolš, čym kupili, tady jak u taki ž pieryjad 2009 hoda na čystaj asnovie było kuplena valuty na sumu 918,2 młn dołaraŭ.
Staršynia praŭleńnia Nacbanka Piotr Prakapovič ličyć deficyt, jaki raźvivajecca na ŭnutranym valutnym rynku, dysbałans popytu i prapanovy adnym z najbolš prablemnych pytańniaŭ dla bankaŭskaj sistemy i ekanomiki krainy. Pra heta jon, u pryvatnaści, zajaŭlaŭ 27 žniŭnia padčas dakłada prezidentu.
Ekśpierty čakajuć, što da kanca hoda pieravyšeńnie popytu na valutu z boku subjektaŭ haspadarańnia nad jaje prapanovaj budzie ŭzrastać. Heta źviazana jak ź siezonnymi vahańniami impartu, tak i z rostam u pačatku nastupnaha hoda cenaŭ na rasijski haz minimum na 10%.
Čakany ŭ suviazi z hetym dalejšy rost deficytu valuty pryviadzie da jašče bolšaha cisku na zołatavalutnyja reziervy. Bo mienavita za košt ich Nacbank vymušany kampiensavać deficyt zamiežnaj valuty, zaznačajuć analityki.
Na piku finansavaha kryzisu ŭ 2008 hodzie deficyt biahučaha rachunku dasiahaŭ maštabaŭ, suvymiernych ź ciapierašnimi.
Heta robić źmienu finansavaj palityki niepaźbiežnaściu. Pytańnie tolki ŭ časie.Možna čakać pryniaćcia ad uładaŭ niejkich nadzvyčajnych mieraŭ dla adnaŭleńnia stabilnaści.
Heta moža być pačatak novych pieramovaŭ ź Mižnarodnym valutnym fondam abo pryvatyzacyja adnaho z bujnych dziaržaŭnych pradpryjemstvaŭ naftachimii ci «Biełaruśkalija». Abo — što najmienš imavierna — značnaj devalvacyi rubla. Choć maštab prablemy staŭ taki, što i hetaha apošniaha varyjanta užo niamožna vyklučać.
