Da mahčymaści praviadzieńnia ŭ Biełarusi ŭ 2011 padatkovaj amnistyi «cienievaha» biznesu mnohija pradprymalniki apryjory staviacca ź niedavieram. Ale kamu jana patrebnaja?

Pra płany pa praviadzieńni ŭ 2010 takoj amnistyi havorycca ŭ prajekcie dyrektyvy pa libieralizacyi ekanamičnaj dziejnaści. Hetym «prystrełačnym» dakumientam uradu pradpisvajecca «da 1 lipienia 2011 unieści na razhlad kiraŭnika dziaržavy prajekt narmatyŭnaha pravavoha akta ab uviadzieńni ŭ Respublicy Biełaruś padatkovaj amnistyi ŭ dačynieńni da asobaŭ, hatovych siabie reabilitavać šlacham lehalizacyi svaich prybytkaŭ».

Ale ci šmat u krainie biznesaŭ, jakija marać ab reabilitacyi? Na kaho nacelenaja amnistyja? Što jana moža dać?

Niezaležny ekanamist Siarhiej Čały:

— Padčas abmierkavańnia takoj amnistyi adrazu ŭźnikaje dva pytańni:

ci nie zrobiacca razhałošanyja ŭ vyniku jaje źviestki padstavaj dla pieraśledu ŭ pierśpiektyvie i ci tak šmat u Biełarusi cienievych stanaŭ?
Jakraz u Biełarusi, zhodna ź mižnarodnymi rejtynhami, «cienievyja» stany — nie raspaŭsiudžanaja źjava. Ale kali jany isnujuć, to ŭ biznesu pavinien być vialiki kredyt davieru dziaržavie, kab ryzyknuć i skarystacca amnistyjaj. A značyć, hetaja miera dobraja, ale jana chutčej dla pryhažości, čym dla realnaha vykarystańnia. Raniej takaja amnistyja abviaščałasia ŭ Rasii, ale ja niejak nie bačyŭ asablivych pośpiechaŭ ad jaje abviaščeńnia. Mnie zdajecca, značna bolšy efiekt mohuć prynieści miery doŭhaterminovaha charaktaru, jakija stymulujuć biznes. Naprykład, spraščeńnie padatkaabkładańnia. A amnistyja — heta razavaja miera. Navat kali amnistyja «cienievaha» biznesu adbudziecca, to što potym?

Niezaležny ekanamist Michaił Zaleski:

— Da takoj amnistyi dastasoŭny i zakon hihijeny — ruka ruku myje.

Hetaja amnistyja budzie dla svatoŭ, kumoŭ, to bok dla samich siabie.
Chto treba, toj jaje vynikami i skarystajecca. I pra heta nichto nie daviedajecca. Bo nichto, naprykład, praz «Savieckuju Biełaruś» nie paviedamić, kolki toj ci inšy amnistavaŭ hrošaj. A astatnija, u kaho niama svatoŭ i kumoŭ, dyk jany ž, pa-pieršaje, nie durnyja, jany viedajuć, što nie ŭsim usio možna. A pa-druhoje, u ich i hrošaj «cienievych» niama. Na moj pohlad, 90 adsotkaŭ biełaruskaha biznesu, jaki nie maje patrebnych suviaziaŭ, maje ŭsiaho 10 adsotkaŭ kapitału, jaki treba lehalizavać.

Staršynia Minskaha staličnaha sajuza pradprymalnikaŭ i pracadaŭcaŭ Uładzimir Karahin:

— Naohuł, u Biełarusi treba ŭžyvać samy šyroki śpiektr amnistyj.
Mnohija biznesoŭcy kaliści, u pačatku svajoj dziejnaści, rabili pamyłki. Heta značyć, bolšaść choča amnistyi. Patrebnaja i amnistyja kapitału ŭ cełym. Kab ludzi, jakija vyvieli hrošy za miežy krainy, mahli ich siudy viarnuć u vyhladzie inviestycyj. Viadoma, u Biełarusi vielmi vialiki niedavier da ŭłady z punktu hledžańnia harantyj nievykarystańnia vynikaŭ amnistyi na škodu biznesu. Ale isnuje pazityŭny dośvied takich amnistyj u Jeŭropie. Nie my pieršyja. I, jak pakazvaje praktyka, takija amnistyi spryjajuć libieralizacyi.
Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?