Padčas pieramovaŭ z uładami Biełarusi akramia prahmatyčnych ekanamična-palityčnych pytańniaŭ nieabchodna damahacca prahresu ŭ zachavańni pravoŭ čałavieka i demakratyčnych svabodaŭ. Pra heta idziecca ŭ zajavie šerahu mižnarodnych hramadskich i pravaabarončych arhanizacyj, raspaŭsiudžanaj napiaredadni vizitu ŭ Minsk ministraŭ zamiežnych spraŭ Polščy i Hiermanii.

Nahadajem, 2 listapada adbudziecca sumiesny vizit u Minsk kiraŭnikoŭ MZS Polščy i Hiermanii Radasłava Sikorskaha i Hida Vestervele, padčas jakoha zapłanavanyja ich stustečy jak z kiraŭnictvam Biełarusi, hetak i z kandydatami na prezidenta ad apazicyi i pradstaŭnikami hramadzianskaj supolnaści.

Aŭtary zvarotu, pad jakim padpisalisia arhanizacyja Belarus Watch (Litva), Libereco — Partniorstva ŭ imia pravoŭ čałavieka (Hiermanija), Biełaruski Dom pravoŭ čałavieka (Litva), «Hramadzianskaja Biełaruś» (Čechija) i Fundacyja Damoŭ pravoŭ čałavieka (Narviehija), vitajuć dyjałoh pamiž uładami Biełarusi i krainami Jeŭraźviazu, adnak źviartajuć uvahu na «pa-raniejšamu aktualnuju prablemu niedatrymańnia Biełaruśsiu asnoŭnych pravoŭ čałavieka».

«Zaklikajem pradstaŭnikoŭ uładaŭ Jeŭraźviazu źviarnuć uvahu na toje, što ŭ Biełarusi zaznajuć pieraśled palityčnyja apanienty ŭłady i niezaležnyja žurnalisty, pryvodziacca ŭ vykanańnie śmiarotnyja prysudy, nie zabiaśpiečanaja svaboda słova, schodaŭ i abjadnańniaŭ, — idziecca ŭ zajavie. — Uličvajučy, što vizity vysokapastaŭlenych jeŭrapiejskich palitykaŭ paśpiachova vykarystoŭvajucca ŭładami Biełarusi jak znak padtrymki zachodnich krain ciapierašniamu prezidentu Alaksandru Łukašenku napiaredadni majučych adbycca prezidenckich vybaraŭ, prosim, kab u chodzie kantaktaŭ z uładami na paradku dnia abaviazkova prysutničała tema kaštoŭnaściaŭ spraviadlivaści, demakratyi, čałaviečaj hodnaści».

Siarod pytańniaŭ, jakija, na dumku pravaabaroncaŭ, Vestervele i Sikorski pavinny ŭźniać na pieramovach u Minsku — «vyzvaleńnie palitźniavolenych (Mikałaja Aŭtuchoviča, Uładzimira Asipienki i inš.), spynieńnie kryminalnaha pieraśledu niezaležnych žurnalistaŭ, uviadzieńnie maratoryja i skasavańnie śmiarotnaha pakarańnia, skasavańnie artykuła 193.1 Kryminalnaha kodeksa, što praduhledžvaje pazbaŭleńnie voli za dziejnaść ad imia niezarehistravanaj arhanizacyi, praviadzieńnie volnych i spraviadlivych prezidenckich vybaraŭ.

Nahadajem, što napiaredadni vizitu Hida Vestervele zajaviŭ u intervju niamieckim ŚMI, što jany nie buduć umiešvacca ŭ pieradvybarnuju baraćbu, «adnak z usioj vyraznaściu damo zrazumieć, što my ź vialikaj zakłapočanaściu ŭsprymajem dziaržaŭnyja represii napiaredadni vybaraŭ». Pry hetym ministr dadaŭ, što pry ŭmovie vybaru Biełaruśsiu demakratyčnaha kursa stanie mahčymym jaje dalejšaje zbližeńnie ź Jeŭropaj.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?