Na pradpryjemstvach abapirajucca na papiarednija vysnovy pra pryčyny vybuchu na «Pinskdrevie».

«My pakul nie majem vynikaŭ aficyjnaha rasśledavańnia, tamu kirujemsia papiarednimi vysnovami pra pryčyny vybuchu. A mienavita — prablemy ź vientylacyjaj i ŭtvareńniem u vyniku hetaha pažara- i vybuchaniebiaśpiečnaj kancentracyi pyłu», — paviedamiŭ inžynier pa technicy biaśpieki Lidskaj meblevaj fabryki Siarhiej Aŭramienka. Jon kaža, što na jahonym pradpryjemstvie apieratyŭna adreahavali na nadzvyčajnuju situacyju ŭ Pinsku. «Na nastupny ž dzień ja vydaŭ zahad pra pazapłanavuju pravierku sistemy vientylacyi i instruktažy piersanału. Reakcyja na pinski vybuch była mahutnaja, my ž rodnasnaje pradpryjemstva», — patłumačyŭ inžynier pa TB. Na lidskaj fabrycy pravieryli jak ahulnuju sistemu vientylacyju, tak i łakalnyja sistemy aśpiracyi kala kožnaha stanka. Pradpryjemstva ŭkamplektavanaje ŭ asnoŭnym novym abstalavańniem, tamu prablem z nakapleńniem pyłu amal niama. Ale jość jašče takija ŭčastki, dzie patrebnaja asablivaja pilnaść. Siarhiej Michajłavič raskazaŭ, jak asabista kantraluje pracu prybiralščyc u takich miescach.

«Zarobki ŭ ich nievysokija, tamu mnohija lanujucca. To ja nie daju im padmiatać padłohu, pakul vadoj nie papyrskajuć, kab pył nie ŭzdymali. Sam biaru płastykavuju plašku, prabivaju ćvikom dzirki ŭ korku i addaju prybiralščycam. Dy jašče prasaču, kab vykarystoŭvali».

Pazapłanavuju pravierku pracoŭnych miescaŭ i hienieralnuju pryborku vientylacyjnaj sistemy zładziŭ «Homieldreŭ». Na homielskaj fabrycy taksama kiravalisia papiaredniaj viersijaj zdareńnia ŭ Pinsku. Instruktažy i ahlad pracoŭnych miescaŭ praviali i na «Mahiloŭdrevie», paviedamili ŭ ideałahičnym adździele pradpryjemstva.

Nahadajem, što 25 kastryčnika na pradpryjemstvie «Pinskdreŭ-DSP» prahučali dva vybuchi. Pavodle aficyjnaj infarmacyi, u vyniku zdareńnia 2 čałavieki zahinuli na miescy, 12 čałaviek pamierli paźniej u špitalach. Jašče 6 čałaviek u ciažkim stanie znachodziacca ŭ balnicach Bresta i Minska. Pa fakcie zdareńnia raspačataja kryminalnaja sprava.

***

Siemjam achviaraŭ na «Pinskdrevie» možna dapamahčy hrašyma

U Pinsku adkryli dabračynny rachunak, na jaki možna pieraličvać srodki dla siemjaŭ zahinuŭšych i paciarpiełym ad vybuchu na «Pinskdrevie» 25 kastryčnika 2010 h. Heta stała mahčymym dziakujučy sumiesnym namahańniam carkvy śviatoj vielikamučanicy Varvary i Pinskaha haradskoha savieta deputataŭSrodki, jakija pastupiać na rachunak, buduć raźmiarkoŭvacca harsavietam sumiesna ź Pinskaj jeparchijaj pamiž siemjami zahinuŭšych i paciarpiełych.

«Pryjorbank», CBU 506, h.Pinsk

Kod 153001749

UNN 200320085

r/r 3015520162218

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?