BIEŁTA

BIEŁTA

«Lehitymnaść hetych vybaraŭ dla nas bolš važnaja, čym dla kaho inšaha ŭ śviecie»,
 — zajaviŭ kiraŭnik Biełarusi 2 listapada, adkryvajučy ŭ Minsku sustreču ź ministrami zamiežnych spraŭ FRH i Polščy Hida Viesterviele i Radasłavam Sikorskim. Ciapierašnija vybary, pavodle słoŭ Alaksandra Łukašenki, projduć «jašče bolš adkryta i demakratyčna, čym usie papiarednija».
«Nikoli ŭ našaj krainie nie było, kab parłamient i prezidenta vybirali niedemakratyčna,
 — zapeŭniŭ jon. — Hetyja vybary buduć demakratyčnymi,
bo vy hetaha chočacie.

Kali Jeŭropa pastaviła pad sumnieńnie našy vybary, to ja ŭžo adkryta skazaŭ: zapluščycie vočy na ŭsie parušeńni z boku apazicyi, a paśla vybaraŭ ja vam usio raskažu».

Pavodle słoŭ Łukašenki, Hiermanija i Polšča robiać vielmi šmat dla taho, kab byli dobryja adnosiny jak u Biełarusi z hetymi krainami, tak i ŭ Biełarusi ź Jeŭrasajuzam.

«Patencyjał našych mahčymaściaŭ vielizarny, ale nierealizavanych mahčymaściaŭ u nas značna bolš»,

— pierakanany kiraŭnik dziaržavy.

«I tyja kroki, jakija robiacca Jeŭrasajuzam, naprykład sankcyi i inšyja abmiežavańni, nie spryjajuć palapšeńniu adnosin», — dadaŭ jon.

Łukašenku taksama turbuje, što inicyjatyva ES «Uschodniaje partniorstva» «topčacca na miescy». «Było šmat nadziej, ale pakul jany nie realizavany. U nas jość što prapanavać Jeŭrasajuzu, i spadziajusia, što siońniašniaja sustreča aktyvizuje našy adnosiny», — zajaviŭ prezident.

U svaju čarhu Sikorski adznačyŭ: Polšča, jak susied Biełarusi i člen ES, zacikaŭlena ŭ tym, kab Biełaruś «prytrymlivałasia jeŭrapiejskich kaštoŭnaściaŭ». Pavodle jaho słoŭ, Polšča padtrymlivaje takija mety i zadačy Uschodniaha partniorstva, jak ekanamičnaja intehracyja i spraščeńnie vizavaha režymu. U jakaści prykładu jon paviedamiŭ, što Małdova nieŭzabavie atrymaje 2 młrd. jeŭra ŭ miežach Uschodniaha partniorstva.

«Liču, što palityčnyja mahčymaści buduć stvorany, i Biełaruś taksama zmoža vykarystać hetaje supracoŭnictva. Tamu chaču złavić vas na słovie adnosna svabodnych i demakratyčnych vybaraŭ», — skazaŭ polski ministr.

Jaho hiermanski kaleha Hida Viesterviele dadaŭ, što ES choča bačyć Biełaruś nie tolki «jak susieda, ale i jak dobraha partniora».

«My hatovy pahłybić naša ekanamičnaje supracoŭnictva, ale my taksama chočam, kab Biełaruś zachoŭvała pravy čałavieka, pryncypy demakratyi i viaršenstva zakonu», — skazaŭ kiraŭnik MZS FRH. Pavodle jaho słoŭ, ES uchvalaje i vysoka aceńvaje rašeńnie Biełarusi zaprasić mižnarodnych naziralnikaŭ na prezidenckija vybary.

«Vybary buduć źjaŭlacca testam, łakmusavaj papierkaj demakratyi ŭ Biełarusi», — zajaviŭ Viesterviele.

Jeŭrasajuz, padkreśliŭ jon, chacieŭ by, kab pradstaŭniki apazicyi atrymali dostup da ŚMI i mieli mahčymaść danieści da hramadstva svaje pohlady i prahramy.

Viesterviele taksama vykazaŭ nadzieju na toje, što mižnarodnyja naziralniki zmohuć svabodna znajomicca ź situacyjaj u krainie i paŭnavartasna nazirać za chodam vybaraŭ.

U adkaz na heta Łukašenka zajaviŭ: «Navat hałasy možacie paličyć, kali budzie žadańnie».

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?