Złučanyja Štaty Amieryki «spadziajucca ŭbačyć istotny prahres» u śfiery demakratyi i vykanańnia pravoŭ čałavieka ŭ Biełarusi. Pra heta havorycca ŭ sumiesnaj zajavie, pryniataj pa vynikach sustrečy dziaržsakratara ZŠA Chiłary Klintan i ministra zamiežnych spraŭ Siarhieja Martynava, što prajšła 1 śniežnia ŭ Astanie padčas samita ABSIE.

«Dla palapšeńnia dvuchbakovych adnosinaŭ ZŠA i Biełarusi pieršačarhovuju važnaść pa-raniejšamu maje prajaŭleńnie vialikaj pavahi da demakratyi i pravoŭ čałavieka, jakoje nieabchodna dla prahresu krainy i jaje hramadzian», — cytuje tekst zajavy pres-słužba MZS Biełarusi.

ZŠA, u pryvatnaści, spadziajucca na adpaviednaść vybaraŭ prezidenta Biełarusi mižnarodnym standartam. «U hetych adnosinach stanoŭčym krokam źjaŭlajecca rašeńnie Biełarusi nakiravać zaprašeńnie značnamu składu mižnarodnych naziralnikaŭ dla ažyćciaŭleńnia nazirańnia za praviadzieńniem vybaraŭ», — zaznačajecca ŭ zajavie.

Kiraŭniki źniešniepalityčnych viedamstvaŭ Biełarusi i ZŠA taksama paćvierdzili prychilnaść svaich krain da spravy jadziernaj biaśpieki i jadziernaha nieraspaŭsiudžańnia.

Biełaruś zajaviła pra namier likvidavać usie svaje zapasy vysokaŭzbahačanaha ŭranu da nastupnaha samita pa jadziernaj biaśpiecy, jaki projdzie ŭ 2012 hodzie.

Sa svajho boku ZŠA majuć namier akazać techničnuju i finansavuju dapamohu dla najchutčejšaha ažyćciaŭleńnia hetych mier.

«Pryniaŭšy hetaje rašeńnie, Biełaruś dałučajecca da Złučanych Štataŭ u mižnarodnych namahańniach pa pieravodzie jadziernych ustanovak na vykarystańnie nizkaŭzbahačanaha ŭranavaha paliva, što ŭ XXI stahodździ stanovicca suśvietnym standartam», — cytuje pryniaty dakumient MZS.

«Abodva baki abaviazalisia praciahnuć sumiesnuju pracu ŭ śfiery zabieśpiačeńnia jadziernaj biaśpieki, uklučajučy pavyšeńnie ŭzroŭniu biaśpieki ŭ Abjadnanym instytucie enierhietyčnych i jadziernych daśledavańniaŭ u Biełarusi». Martynaŭ i Klintan taksama abaviazalisia ŭmacoŭvać hłabalnaje supracoŭnictva ŭ śfiery mirnaha vykarystańnia jadziernaj enierhii ŭ adpaviednaści ź mižnarodnymi standartami i dadatkovymi dvuchbakovymi damoŭlenaściami, jakija mohuć być zaklučanyja pamiž Biełaruśsiu i ZŠA», — havorycca ŭ paviedamleńni źniešniepalityčnaha viedamstva Biełarusi.

«Biełaruś taksama abjaviła pra namier dyviersifikavać svajo enierhietyčnaje zabieśpiačeńnie šlacham budaŭnictva svajoj pieršaj AES hramadzianskaha pryznačeńnia, — paviedamlaje biełaruskaje MZS. — ZŠA padtrymlivajuć hetuju dziejnaść, jakaja ŭklučaje ŭ siabie spaborny praces prajektavańnia i budaŭnictva nadziejnaj i biaśpiečnaj stancyi, što dziejničaje ŭ adpaviednaści z harantyjami MAHATE. ZŠA taksama padtrymlivajuć namahańni Biełarusi pa najchutčejšaj realizacyi hetaha kamiercyjnaha prajekta».

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?