Mižsiezońnie moža adznačycca pierajezdam niekatorych biełaruskich futbalistaŭ — pieravažna lidaraŭ kamand — u inšyja čempijanaty. I dobra, kali jany praciahnuć karjeru ŭ bolš mocnych kłubach. Adnak voka na biełarusaŭ pakłali sieradniaki i aŭtsajdary Polščy, Rasii i inšych nie samych rejtynhavych futbolnych krain.

 U Poznani na matč "Lech" - "Juvientus" u 15-cihradusny maroz pryjšli 41 tys. hledačoŭ, fota Lecha

U Poznani na matč "Lech" - "Juvientus" u 15-cihradusny maroz pryjšli 41 tys. hledačoŭ, fota Lecha

Popyt na biełaruskich futbalistaŭ pavysiŭsia paśla ŭdałaha vystupleńnia kłubaŭ u jeŭrakubkach i pieramožnamu šeściu zbornaj u adboračnym cykle. Kožny z udzielnikaŭ mižnarodnych spabornictvaŭ dadaŭ svaju łyžku ŭ ahulny kacioł prestyžu. Palaki i rasijcy, što byli adviarnulisia ad biełaruskich futbalistaŭ, iznoŭ pra ich uspomnili. Apamiatalisia ŭkraincy, čechi, słavaki — usie, u kaho ŭ futbole krucicca dastatkova hrošaj. A cikaviać ich pierš za ŭsio hulcy da 27 hadoŭ.

Hałoŭnaja i samaja važkaja pieravaha zamiežnych kłubaŭ — zarpłata. Asabliva heta datyčyć Rasii ź jaje burnymi finansavymi patokami.

Pa słovach forvarda Vitala Bułyhi, jaki daŭno lehijanierstvuje pa prastorach uschodniaj susiedki,

siaredni dachod hulcoŭ u rasijskich kłubach pieršaj lihi — 10–15 tysiač dalaraŭ u miesiac.

Zrešty, «Kubań», jakaja pa vynikach minułaha siezonu viarnułasia ŭ prem'jer-lihu, moža zapłacić stolki navat dubloru. A napadnik hetaha kłuba, futbalist zbornaj Rumynii Hieorhie Bukur atrymlivaje kala 50 tysiač jeŭra. Ab prem'jer-lizie vialikaha sensu havaryć niama. Tudy biełarusaŭ nie vielmi i kličuć, bo ŭ Rasii ciapier moda na znakamitych zamiežnikaŭ. Vyklučeńnie — Siarhiej Kiślak, jakoha jašče letam pradali ŭ «Rubin».

Biełarus budzie atrymlivać u kazanskim kłubie prykładna 30 tysiač dalaraŭ u miesiac. I heta nie samyja vialikija hrošy.

Stoli zarobkaŭ niama, tamu «Rubin» moža płacić dobramu hulcu niekalki miljonaŭ za hod. Niadaŭna kazancy prapanavali forvardu zbornaj Uruhvaja Dyjeha Farłanu 6 młn «zialonych» u hod, ale łacinaamierykaniec admoviŭsia.

Ukraina ni ŭ čym nie choča sastupać Rasii, adpaviedna, niekatoryja kłuby płaciać vielmi vialikija hrošy. Pra zarpłaty ŭkrainskich futbalistaŭ raskazaŭ futbolny ahient Andrej Kabuš:

— Va Ukrainie jość niekalki viadučych kłubaŭ — «Dynama», «Šachcior», «Dniepr», «Mietalist».

Tam siarednija zarpłaty — 20–25 tysiač dalaraŭ,

choć jość futbalisty, jakija atrymlivajuć zvyš miljona. Ale jość kłuby bolš słabyja ŭ finansavym płanie, jany nie ŭvachodziać u lik lidaraŭ. Tam zarpłata ŭ rajonie 10 tysiač dalaraŭ, i navat samyja mocnyja hulcy nie atrymlivajuć bolš za 15 tysiač.

Adnak za mocnyja ŭkrainskija kłuby biełaruskija futbalisty daŭno nie hulajuć, tamu spyniacca padrabiazna na ich niama sensu. Chiba što kijeŭskaje «Dynama» zaprosić kaho-niebudź z BATE paśla hulni ŭ adkaz.

U Polščy sumy, viadoma, mienšyja, ale ŭsio roŭna pieraŭzychodziać biełaruskija.

Da prykładu, sieradniak pieršaj polskaj lihi kłub «Pohań» (Pahonia — pa-bieł.), u jaki na dniach jeździŭ na prahlad eks-dniaproviecDźmitryj Turlin, moža prapanavać zarpłatu ŭ pamiery 5 tysiač jeŭra.

A kłuby «ekstraklasy» całkam mohuć padniać płanku da 10 tysiač jeŭra.

Takija ličby fihurujuć u «Lechii», «Krakovii». Ab staŭkach ŭ Polščy raskazaŭ mahiloviec Alaksandr Byčanok, jaki niadaŭna pabyvaŭ na prahladzie ŭ adnoj ź miascovych kamand. I kali my dzivimsia z taho, što Sazankoŭ

pierachodzić z kamandy lidara biełaruskaha pieršynstva ŭ polskuju kamandu-sieradniak, to varta prosta zirnuć na zarpłatu jak na adnu z pryčyn.

Napadnik «Šachciora» Dźmitryj Kamaroŭski tłumačyć, čamu jon choča hulać u toj ža Polščy:

— 

Bo heta Jeŭropa. Tam inšyja pohlady, inšaje staŭleńnie da futboła i ludziej. Inšyja pohlady ŭ kiraŭnikoŭ kłubaŭ. Ludzi pa-inšamu chodziać na stadyjony, tam novyja areny. U vyniku atrymlivaje zadavalnieńnie i futbalist, i hladač. Heta samaje hałoŭnaje.

Rasijcy, viadoma, mohuć prapanavać bolš hrošaj. Ale ŭ ich byvaje tak, što siońnia kamanda na kani, a zaŭtra nie dasiahnuła dobrych vynikaŭ i zbankrutavała. Polšča ŭ hetym płanie cyvilizavaniejšaja. Usio, što na papiery prapisana, toje i atrymaješ.

Aktyvizavalisia i češskija kłuby. Napeŭna, šmat u čym dziakujučy pamiatnaj letniaj pieramozie «Dniapra» nad «Banikam». Słavacki lehijanier «Niomana» Maryjan Słuka, jakija papoŭniŭ haradzienskuju kamandu na finišy siezonu, raskazvaje:

— Uzrovień futboła ŭ Čechii i Słavakii prykładna taki ž, jak u Biełarusi, zatoje finansavaja situacyja ŭ vašym čempijanacie lepšaja. Tamtejšyja kłuby ŭ bolšaści svajoj nie mohuć prapanavać takija ž umovy, jak u vas.

Śćviardžajučy heta, słavak krychu chitravaŭ.

Siaredniaja ličba ŭ Hambrynus-lizie (Čechija) — 5–7 tysiač jeŭra.

Pra heta raskazaŭ usio toj ža Dźmitryj Turlin, jaki atrymaŭ prapanovu ad adnaho z kłubaŭ (jak bačym, mnohija futbalisty «Dniapra», jakija stali svabodnymi ahientami, karystajucca popytam). Tamu zastajecca tolki zdahadvacca, jakija ŭmovy Słuku prapanavali ŭ «Niomanie» i čamu jon nie pahadziŭsia na čatyry najaŭnych prapanovy ad słavackich i češskich kłubaŭ. Taksama ab mahčymaściach češskich kłubaŭ niadaŭna raskazvaŭ Vital Trubiła, jaki adznačyŭ, što jany mohuć płacić zvyš 10 tysiač dalaraŭ za miesiac.

Słavackija kłuby taksama vyrašyli pakazać siabie surjoznymi hulcami na tranśfiernym rynku i prykupić adnaho-dvuch biełarusaŭ.

Tam siaredniaja zarpłata — 3–4 tysiačy jeŭra.

Adnak jość infarmacyja, što adzin sa słavackich kłubaŭ na minułym tydni prapanavaŭ biełaruskamu futbalistu kantrakt na 100 tysiač dalaraŭ u hod.

A što majem my i što našy kłuby mohuć prapanavać?

Čaściej za ŭsio — niasvoječasova vypłačvany zarobak u pamiery 2–4 tysiač dalaraŭ.

«Tarpieda», bresckim «Dynama», «Niomanie», «Dniapry», «Viciebsku» padčas siezonu hrošy, byvała, zatrymlivali na miesiac i bolš.

Tolki try kłuby vyhadna hladziacca ŭ paraŭnańni z astatnimi — BATE, «Šachcior» i «Dynama-Minsk».

Zrešty, u Salihorsku zarobkaŭ u 10 tysiač dalaraŭ nichto nie bačyŭ, a staličny kłub sa svaimi hrašyma prosta tak nie rasstajecca. Spytajcie luboha futbalista «Dynama» ŭ pryvatnaj hutarcy, jak spravy ź finansami, i jon adkaža, što premijalnyja za Lihu Jeŭropy ŭ vyniku byli značna mienšyja za mierkavanyja, a kali hulec pakidaŭ kamandu, to taksama niedaličvaŭsia značnaj sumy, vyznačanaj kantraktam.

Siońnia pieršaja i druhaja liha Polščy mohuć svabodna źmiaścić cełuju kamandu biełaruskich futbalistaŭ dobraha ŭzroŭniu.

Hetyja hulcy ŭzmocniać kłuby i atrymajuć u dva-try razy bolš vysokuju zarpłatu. Kali niechta ŭspomnić ab pierśpiektyvach i ambicyjach, to ŭ «Viciebsku» abo «Tarpieda» ich stolki ž, kolki i ŭ polskich kłubach pieršaj lihi.

Viadoma, nie tolki hrošy vyznačajuć vybar hulcoŭ. Jość jašče niekalki pryčyn.

Usie krainy na zachad ad Biełarusi ŭ nas asacyjujucca ź Jeŭropaj, a bolšaść futbalistaŭ nie admaŭlajuć, što chočuć hulać u jeŭrapiejskich čempijanatach.

Infrastruktura ŭ tych ža polskich kamandach na paradak lepšaja, čym u bolšaści biełaruskich. Tam bolšyja stadyjony, prastorniejšyja raździavałki, kamfartabielniejšyja aŭtobusy. Dyk čamu b niežanatamu hulcu nie puścicca ŭ jeŭrapiejskuju «pryhodu»? Voś i atrymlivajecca, što na radzimie biełaruskich futbalistaŭ mohuć utrymać siamja, niežadańnie vučyć movu i ŭ niekatorych vypadkach — addanaść kłubu.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?