Prakuratura Minskaj vobłaści admoviła ŭ raspačynańni kryminalnaj spravy pa fakcie hibieli žurnalista Aleha Biabienina.
Jak paviedamili ŭ prakuratury Minskaj vobłaści, pravierka pa hetym fakcie zavieršana. Zhodna z zaklučeńniem, śmierć adbyłasia ŭ vyniku samahubstva. Zavieršany ŭsie nieabchodnyja ekśpiertyzy.
Jany, u pryvatnaści, paćvierdzili, što ŭ momant śmierci Biabienin byŭ u stanie mocnaha ałkaholnaha apjanieńnia.
Materyjały pravierki adpraŭleny nahladnamu prakuroru Minskaj vobłaści.
Cieła Aleha Biabienina, zasnavalnika i kiraŭnika papularnaha sajta www.charter97.org, było znojdziena ŭ piatli 3 vieraśnia ŭ jaho zaharadnym domie ŭ vioscy Piarchurava Dziaržynskaha rajona Minskaj vobłaści.
Da pravierki akaličnaściaŭ śmierci žurnalista pryciahvalisia ekśpierty ABSIE. U padrychtavanym imi zaklučeńni skazana: vyniki ŭskryćcia i rečavyja dokazy, sabranyja na miescy zdareńnia, «jasna śviedčać, što pryčynaj śmierci stała samazabojstva praz paviešańnie». «Acenka i analiz ekśpiertaŭ takija, što na padstavie dokazaŭ i dastupnaj dla ich infarmacyi jany pryjšli da vysnovy, što niama pryčyn dumać, što Biabienina paviesili paśla śmierci», — havorycca ŭ paviedamleńni ABSIE.
Mnohija kalehi i siabry žurnalista, u tym liku kandydat u prezidenty Biełarusi, lidar kampanii «Jeŭrapiejskaja Biełaruś» Andrej Sańnikaŭ, u čyju kamandu ŭvachodziŭ Biabienin, ź viersijaj samazabojstva nie zhodnyja.
Na dumku Sańnikava, čakać abjektyŭnaha rasśledavańnia hibieli žurnalista pry ciapierašniaj uładzie biessensoŭna. «Biełaruskija ŭłady śmierć Biabienina pieratvaryli ŭ palityčnuju hulniu ź Jeŭropaj. Ekśpiertaŭ ABSIE, jakija pryjazdžali dla acenki rasśledavańnia, jany prosta vykarystali. I ni śledstva, ni ekśpierty ABSIE nie raźviejali našych sumnieńniaŭ u tym, što Biabienin byŭ zabity, a nie skončyŭ žyćcio samahubstvam. Naadvarot, jany tolki ŭzmacnili našy padazreńni», — zajaviŭ kandydat u prezidenty.
Sańnikaŭ maje namier zajmacca rasśledavańniem śmierci Biabienina. «Heta moj abaviazak, i ja ŭpeŭnieny, što rasśledavańnie budzie praviedziena», — padkreśliŭ palityk.
