Viktar Ciareščanka, kandydat u prezidenty Respubliki Biełaruś, zajaviŭ, što nieviadomyja surjozna paškodzili jaho aŭtamabil.Pavodle słovaŭ kandydata, paškodžańni tarmaznoj sistemy i sistemy spracoŭvańnia padušak biaśpieki mahli mieć samyja drennyja nastupstvy.
Voś što Viktar Ciareščanka raspavioŭ «Našaj Nivie»: «Ja paprasiŭ svaju davieranuju asobu Alaksieja zamianić alivu ŭ aŭtamabili, jakim zvyčajna karystajusia («Dodž Karavan» 2008 hoda vypusku). Pierad zamienaj alivy aŭto, jak zaŭždy, pravieryli sistemaj kampjutarnaj dyjahnostyki. Vyjavilisia paškodžańni sistemy błakavańnia tarmazoŭ i padušak biaśpieki. Akazałasia, paškodžańni byli miechaničnyja, zroblenyja z prymianieńniem hrubaj fizičnaj siły».
Viktar Ciareščanka źviazvaje hety vypadak z uvahaj śpiecsłužbaŭ da svajoj asoby:
«Prykładna miesiac tamu heta pačałosia. Za maimi pieramiaščeńniami sočać, telefony prasłuchoŭvajuć, skajp zabłakavali. Dachodzić da aniekdatyčnych vypadkaŭ, kali ŭ chałodnaje nadvorje adzin itoj-ža čałaviek prahulvajecca pad maimi voknami ź dziciačaj kalaskaj ciaham vaśmi hadzin zapar».
Adnačasovaje paškodžańnie tarmazoŭ i padušak biaśpieki moža stać pryčynaj avaryi z trahičnymi nastupstvami.
Viktar Ciareščanka vyrašyŭ uzmacnić kantrol za asabistymi kiroŭcami. «U mianie ich dva. I ja siońnia ž ich zvolniu. Nie mahu bolš daviarać hetym ludziam. Za apošnija dni mašynu ŭskryvali dvojčy. Pasiarod biełaha dnia. Z sałona ničoha nie źnikła, adnak ciapier zrazumieła, što pracavali nie prostyja zładziei», — kaža kandydat.
Sp. Ciareščanka admoviŭsia dać «Našaj Nivie» kantakty kiroŭcaŭ, kab atrymać udakładnieńni ab charaktary paškodžańniaŭ, ci servisnaha centra, u jakim pravodziłasia dyjahnostyka. Kandydat u prezidenty spasłaŭsia na nieabchodnaść praviadzieńnia słužbovaha rasśledavańnia spravy.
