Były ministr sielskaj haspadarki i davieranaja asoba kandydata ŭ prezidenty Uładzimira Niaklajeva Vasil Lavonaŭ źviarnuŭsia da Alaksandra Łukašenki z adkrytym listom.U svaim zvarocie, jaki nadrukavała «Narodnaja vola», Lavonaŭ zhadvaje pra złačynstvy režymu Łukašenki i zaklikaje jaho admovicca ad pasady padčas Usiebiełaruskaha schodu.
Lavonaŭ piša, što heta ŭžo druhi jahony list da kiraŭnika dziaržavy. Pieršy byŭ dasłany z turmy. Adznačaje, što abaviazany raskazać ludziam praŭdu ab režymie Łukašenki, bo tyja, chto moh by heta zrabić, źniščanyja «eskadronami śmierci». «I ja havaru hetuju praŭdu. I biełaruskamu narodu… I vam», — piša Lavonaŭ.
U svaim adkrytym liście były ministr sielskaj haspadarki abvinavačvaje Łukašenku ŭ niapravilnym kiravańni krainaj na praciahu ŭsich šasnaccaci hadoŭ. Jon źviazvaje ŭsie pośpiechi, dasiahnutyja ŭ hety čas, z dapamohaj Rasii.
«Rasija pierastaje apłačvać vašu zahannuju palityku ŭ haspadarcy. Zamieny hetaj ščodraj rasijskaj dušy niama. Što dalej. Šukać zamienu? Ale dzie možna znajści takuju chalavu?», —pytajecca V.Lavonaŭ u Łukašenki.
Šmat uvahi nadajecca ŭ liście spravam źnikłych palitykaŭ. Vasil Lavonaŭ raskazvaje, jak u Miensku ledźvie nie adbyŭsia ŭzbrojeny kanflikt pamiž roznymi śpiecsłužbami, a taksama vinavacić Łukašenku ŭ žadańni adstojvać uładu navat koštam čałaviečych žyćciaŭ.
Zaviaršajecca zvarot Lavonava da Łukašenki prapanovaj syści z pasady. «Na budučym Usienarodnym schodzie paprasicie prabačeńnia ŭ ludziej za svaje pamyłki. Paviercie, što jany darujuć vam. Darujuć i tym, chto addana vykonvaŭ usie vašy ukazańni», — piša Lavonaŭ. Były ministr sielskaj haspadarki taksama prosić Łukašenku zrabić toje, što jamu paraiŭ Uładzimir Niaklajeŭ (admovicca ad udziełu ŭ vybarach i dazvolić biełarusam sustreć Novy hod ź inšym prezidentam).
«Ustańcie na kaleni (ale da Maskvy na kaleniach nie paŭzicie) i padziakujcie Rasii za toje, što jana ŭ ciažkija hady praciahnuła ruku dapamohi, — zaklikaje Łukašenku Lavonaŭ. — I paprasicie ŭ Rasii palityčny prytułak dla vas i ŭsioj vašaj siamji».
