Niahledziačy na pryniatyja ŭ Vybarčy kodeks Biełarusi papraŭki, u zakanadaŭstvie zachoŭvajucca «šerah surjoznych prablem».
Pra heta havorycca ŭ pieršaj pramiežkavaj spravazdačy doŭhaterminovaj misii naziralnikaŭ BDIPČ ABSIE. Tekst dakumienta apublikavany na sajcie arhanizacyi.
Siarod takich prablem ekśpierty nazyvajuć
«praźmiernuju rolu prezidenta pry pryznačeńni členaŭ Centralnaj vybarčaj kamisii; niedastatkovuju prazrystaść pracedury vyłučeńnia i pryznačeńnia členaŭ terytaryjalnych i ŭčastkovych vybarčych kamisij; adsutnaść detalizavanaj pracedury padliku biuleteniaŭ; niedachop dakładnaha apisańnia pravoŭ naziralnikaŭ; adsutnaść patrabavańnia apieratyŭnaha abnarodavańnia papiarednich i kančatkovych vynikaŭ padliku hałasoŭ».
U spravazdačy zaznačajecca, što 5 listapada CVK pryniała pastanovu, jakaja dazvalaje palityčnym partyjam i hramadskim abjadnańniam nakiroŭvać naziralnikaŭ va ŭčastkovyja kamisii. «Jašče adna pastanova praduhledžvaje, što naziralnikam nieabchodna dać „realnuju mahčymaść sačyć za padlikam hałasoŭ“, ale detalovyja instrukcyi adnosna vykanańnia hetaj pastanovy jašče pavinny być raspracavany CVK», — havorycca ŭ dakumiencie.
Ekśpierty BDIPČ ABSIE taksama zaznačajuć, što ŭ jakaści kandydataŭ na pasadu prezidenta Biełarusi zarehistravany 10 čałaviek. «Kandydaty adznačajuć, što ŭ paraŭnańni z papiarednimi kampanijami rehistracyja prachodziła ŭ lepšych umovach. Pracedura zboru podpisaŭ taksama prachodziła biez asablivych prablem, chacia pracedura ich pravierki nie była da kanca transparentnaj», — skazana ŭ spravazdačy.
Vybarčaja kampanija ŭ Biełarusi prachodzić «strymana i spakojna, a niekalki mitynhaŭ, uklučajučy niedazvolenuju akcyju ŭ Minsku (mitynh na Kastryčnickaj płoščy 24 listapada. — BiełaPAN.), prajšli bieź incydentaŭ», — kanstatujuć naziralniki misii.
U dakumiencie taksama zaznačajecca, što dziaržaŭnaje telebačańnie dahetul vykonvała praduhledžanaje zakanadaŭstvam patrabavańnie ab davańni kandydatam u prezidenty mahčymaści vystupleńnia ŭ pramym efiry. «Niekatoryja kandydaty vykarystali takuju mahčymaść dla rezkaj krytyki ŭłady, — havorycca ŭ spravazdačy. — U adpaviednaści z papraŭkami ŭ Vybarčy kodeks buduć taksama praviedzieny teledebaty kandydataŭ u prezidenty ŭ pramym efiry».
Razam z tym, padkreślivajuć naziralniki, dziaržaŭnyja tele- i radyjokanały «nie prajavili cikavaści da kampanij kandydataŭ u prezidenty, jany sfakusavalisia ŭ asnoŭnym na dziejnaści CVK i dziejnaha prezidenta». U spravazdačy taksama ŭkazana na toje, što nie byli pakazany vystupleńni kandydataŭ padčas ich rehistracyi ŭ Centrvybarkamie.
Misija doŭhaterminovych naziralnikaŭ BDIPČ ABSIE pad kiraŭnictvam Hierta Chinrycha Arensa pačała pracavać 15 listapada. Zaraz u Biełarusi pracujuć 54 doŭhaterminovyja naziralniki BDIPČ. Aprača taho, u dzień vybaraŭ budzie pracavać misija karotkaterminovych naziralnikaŭ z 400 čałaviek pad kiraŭnictvam člena brytanskaj delehacyi ŭ Parłamienckaj asamblei ABSIE Toni Łojda.
