Uviečary 3 śniežnia Biełaruski dziaržaŭny cyrk adčyniŭsia paśla ramontu.
"Akramia apornych ścien, u budynku cyrka ŭsio novaje", - raskazała mastacki kiraŭnik cyrka zasłužany dziejač mastactvaŭ Biełarusi akademik Nacyjanalnaj akademii cyrkavoha mastactva Rasii Taćciana Bandarčuk.
Pavodle jaje słoŭ, adzinaje, što zastałosia niaźmiennym - heta kolkaść hladzielnych miescaŭ (1650) i pamier manieža (dyjamietram 13 m, jak va ŭsim śviecie). Pieraŭtvareńni sapraŭdy ździŭlajuć, bo zamiest adnaho budynka ŭ cyrku stała try: kala asnoŭnaha korpusa pabudavany asobny korpus dla biletnych kas, a taksama repietycyjny 6-paviarchovy maniež. Dla letnich vystupleńniaŭ budaŭniki taksama praduhledzieli adkrytuju cyrkavuju placoŭku.
Zamiest adnaho manieža ŭ cyrku budzie čatyry. Dla koniej i drapiežnikaŭ - humovy, dla šoŭ na kańkach - ledziany, parkietny - dla tancaŭ i płastykavy - dla inšych efiektnych pradstaŭleńniaŭ. Płanujecca, što ŭsie čatyry areny zapracujuć na poŭnuju moc viasnoj--letam 2011 hoda. "Maniežy buduć schavanyja ŭ nižnim jarusie, i ŭ zaležnaści ad patreby adzin ź ich budzie padymacca ŭ zału", - raspaviała Taćciana Bandarčuk.
U cyrku stvoranyja kamfortnyja ŭmovy dla čatyrochnohich artystaŭ. Dla žyvioł pabudavali novy, vielmi zručny lift, koni ŭ stojłach mohuć nie tolki adpačyvać ležačy, ale navat špacyravać, u budynku repietycyjnaha manieža jość svaja vieterynarnaja klinika, hardierobnaja dla koniej, schoviščy piłavińnia, sałomy, kuchnia i duš dla žyvioł.
Pieršaje pradstaŭleńnie pačałosia jašče da treciaha zvanka: u cyrk viarnuŭsia numar z matacyklistam, jaki narazaje kruhi pa sietkavym cylindry. Pakolki numar składany pa vykanańni i techničnaj padrychtoŭcy, jaho vyvieli z asnoŭnaj prahramy.
Paśla było pradstaŭlenaje "Łas-Viehas-šou" z udziełam biełych tyhraŭ i lvoŭ. Numar z tyhrami i lvami padrychtavaŭ rumynskaja dresiroŭščyk Stefan Plešajanu. Numar hastralavaŭ u Italii, Hiermanii i Aŭstryi. Pa składzie žyvioł atrakcyjon źjaŭlajecca adzinym u śviecie.
