U Minsku prezientavali knihu «Biełaruskaje zamiežža». Jana vyjšła ŭ dziaržaŭnym vydaviectvie «Biełaruskaja encykłapiedyja».
Natalla Hołubieva.
Lilija Ananič.
Uładzimir Ščasny.
Što heta — śviadomy zvarot čynoŭnikaŭ da prablemaŭ biełaruskaj dyjaspary ci ŭsiaho tolki inicyjatyva asobnych zacikaŭlenych daśledčykaŭ?
Inicyjatar prajekta — namieśnica načalnika ŭpraŭleńnia sacyjalna-kulturnaj śfiery aparata Savieta ministraŭ, kandydat histaryčnych navuk Natalla Hołubieva. Jana napisała i šerah tekstaŭ. Siarod aŭtaraŭ — Natalla Hardzijenka, Mikoła Nikałajeŭ, Alaksiej Kaŭka, Aleś Karlukievič, Lavon Jurevič.
U knizie ŭ ścisłaj formie raspaviadajecca ab biełarusach u Rasii, Bałtyi, Małdovie, Vialikabrytanii, ZŠA, Kanadzie, Arhiencinie, Aŭstralii, Kazachstanie, Polščy. Asobny raździeł pryśviečany ŭradžencam našaj krainy ŭ Izraili.
«Naša histaryčnaja kaštoŭnaść — heta biełarusy, jakija žyvuć nie tolki na radzimie, ale i biełarusy, jakimi hanarycca ŭvieś śviet», — adznačyła namieśnica ministra infarmacyi Lilija Ananič. Jan ŭpeŭniena, što «kniha budzie zapatrabavanaja na našych šmatlikich mižnarodnych knižnych imprezach. Nam nie chapaje vydańniaŭ takoha kštałtu, kab praz knihu pakazvać bahaćcie našaj Biełarusi». Ł. Ananič nazvała vydańnie sacyjalna značnym, adznačyła, što vychad jaho padtrymlivaje dziaržava.
«Takija knižki pazbaŭlajuć nas ad kompleksu niepaŭnavartaści»,
— ličyć staršynia Nacyjanalnaj kamisii pa spravach JUNESKA, pasoł pa asablivych daručeńniach MZS Uładzimir Ščasny. Na jaho dumku, samaśćviardžacca varta za košt uradžencaŭ Biełarusi, jakija atrymali pryznańnie ŭ śviecie. Ale časta jany biełarusami siabie nie ličyli. A svaje dasiahnieńni źviazvali ź inšymi krainami.
Praŭda,
pad takuju katehoryju nijak nie padpadaje paetka Natalla Arsieńnieva, pra jakuju ŭ adpaviednym artykule, pryśviečanym biełarusam ZŠA, nie zhadana ani słovam. Aŭtar raździeła, Aleh Hardzijenka, śviedčyć, što imia Arsieńnievaj stajała tam pieršym. Taksama, pavodle jaho słovaŭ, na etapie redahavańnia ŭ vydaviectvie z knihi vykraślili imia Staršyni Rady BNR Ivonki Surviły.
Praca nad knihaj viałasia dva hady. Vyjšła jana pa-biełarusku z paralelnym pierakładam na rasijskuju.
Dla tych, chto zachoča pahłybicca ŭ prablemy biełaruskaha zamiežža, drukujecca biblijahrafija vydańniaŭ pa hetaj temie. Asobny raździeł skłali ahlady dakumientaŭ, što zachoŭvajucca ŭ archivach krainy.
U dadatku źmieščanyja niekatoryja archiŭnyja materyjały. Heta «Zajava biełaruskich palityčnych dziejačaŭ prezidentu Litoŭskaj Respubliki ab biełaruska-litoŭskich uzajemaadnosinach» (1923), «Dakładnaja zapiska Narkamata zamiežnych spraŭ BSSR u Narkamat zamiežnych spraŭ RSFSR i Kamintern ab pracy siarod biełaruskaj emihracyi ŭ Amierycy» (1923), «Biełaruskija pytańni za kardonam. Pastanova Centralnaha kamiteta KP(b)B» (1924) i inš.
Inšyja dziaržaŭnyja struktury śledam za Ministerstvam kultury pačali źviartacca da biełarusaŭ zamiežža. Toje, ab čym tak daŭno havaryła sama dyjaspara, pačynaje spraŭdžvacca.
