Biełaruski svabodny teatr i brytanskaja pravaabarončaja arhanizacyja Index on Censorship apublikavali na internet-staroncy zoneofsilence.org pietycyju, adrasavanuju nastupnamu prezidentu Respubliki Biełaruś, z zaklikam pavažać asnoŭnyja pravy čałavieka i skasavać represiŭnyja zakony, jakija ich parušajuć.
Pietycyju padpisali były prezident Čechii Vacłaŭ Havał, dyrektary brytanskich teatraŭ Almeida Majkł Atenbora, Young Vic — Devid Łan, Royal Court — Daminik Kuk, Nacyjanalnaha teatra — Nikałas Chiutnier; aktory ser Jen Makielen (vykanaŭca roli Hendalfa va "Uładary piarścionkaŭ") i Džeremi Ajrans, Ema Tompsan, Džud Łoŭ i Sijena Miler, Sem Uest i Majkł Šyn; dramaturhi ser Tom Stopard i Alaksandra Vud, Majkł Frejn i Łora Uejd...
Nie zastalisia ŭbaku i muzyki: siarod padpisantaŭ — lidar hrupy Pet Shop Boys Nił Tenant i ŭładalnik «Oskara» za muzyku da filma «Žyćcio pryŭkrasnaje» italjanski kampazitar Nikało Pjavani. Siarod ludziej mastactva, jakija pastavili svoj podpis pad pietycyjaj, možna ŭbačyć i imiony viadomych dziejačaŭ kino — uładalnika «Załatoha hłobusa» kinarežysiora Styviena Dołdry abo pradusara ŭsich filmaŭ epapiei «Hary Poter» Devida Chiejmana. Ałan Rykman, jaki syhraŭ u ich prafiesara Snejpa, taksama pastaviŭ svoj podpis.
Taksama pad pietycyjaj padpisalisia režysiory Styvien Śpiłbierh i Poł Hrynhras, a taksama zorka «Seksu ŭ vialikim horadzie» Kim Ketrał.
Hłabalnaja artystyčnaja kampanija salidarnaści ź Biełaruśsiu była raspačataja Biełaruskim svabodnym teatram u 2007 hodzie,kali brytanski dramaturh Tom Stopard, prezident Čechii Vacłaŭ Havał i lidar hurta The Rolling Stones Mik Džahier źviarnulisia da biełarusaŭ sa svaimi videazvarotami, padtrymaŭšy ich na šlachu da svabody. Za try hady kampaniju salidarnaści padtrymali sotni tvorčych asobaŭ u dziasiatkach krain śvietu.
Nižej pryvodzicca tekst pietycyi:
«Biełaruś — adna z samych niesvabodnych krainaŭ. U Biełarusi, što staić nižej za Iran pa ŭzroŭni svabody presy, nižej za Zimbabve pa ŭzroŭni zachavańnia pravoŭ čałavieka,źnikli bieź viestak ci pamierli pry zahadkavych abstavinach apazicyjnyja lidary, a moładzievyja aktyvisty cierpiać pastajanny cisk za svaju dziejnaść. Dziasiatkam tysiač žycharoŭ Biełarusi admoŭlena ŭ pravie vyjezdu z krainy. Jeŭrapiejskija lidary, takija jak Silvia Bierłuskoni, i biznesoŭcy, jakija viaduć spravy ź biełaruskim režymam, zakryvajuć vočy na złoŭžyvańni ŭładaŭ, kirujučysia tolki svaimi finansavymi intaresami. Hramadskija dziejačy i pravaabaroncy, niezaležnyja žurnalisty i dziejačy mastactva razam z usioj prahresiŭnaj Biełaruśsiu ciaham doŭhaha času vystupali suprać žorstkaj cenzury i represij, skiravanych na padaŭleńnie asnoŭnych svabodaŭ hramadzian i bazavaje prava čałavieka na svabodu vykazvańnia.
My, nižejpadpisanyja, upeŭnienyja, što ciapierašniaja situacyja ŭ Biełarusi — heta hańba Jeŭropy.
Bieručy pad uvahu vybary, jakija projduć u Biełarusi 19 śniežnia, my zaklikajem nastupnaha prezidenta Respubliki Biełaruś pavažać asnoŭnyja pravy čałavieka i skasavać represiŭnyja zakony, jakija ich parušajuć».
