Inicyjatarambiełaruska-rasijskich pieramoŭ na vyšejšym uzroŭni 9 śniežnia ŭ Maskvie byŭ Dźmitryj Miadźviedzieŭ,
zajaviŭ Alaksandr Łukašenka, adkazvajučy 17 śniežnia na pytańni žurnalistaŭ pry naviedvańni hałoŭnaha schovišča Nacyjanalnaha banka.
«Prosta jak mužčyna pavioŭ siabie prezident Rasii,— skazaŭ Łukašenka. — Ja pryjechaŭ u Maskvu, praz paru hadzin patelefanavaŭ Miadźviedzieŭ i prapanavaŭ sustrecca i abmierkavać pytańni, jakija treba vyrašyć pierad pasiadžeńniami pa Mytnym sajuzie i Adzinaj ekanamičnaj prastory».
Pavodle słoŭ biełaruskaha kiraŭnika, abmierkavańnie prapanavanych pytańniaŭ na ŭzroŭni kiraŭnikoŭ dziaržaŭ nie płanavałasia, adnak nad imi pracavali bolš za miesiac śpiecyjalisty. «Napiaredadni atrymali infarmacyju, što ŭrady nie damovilisia, značyć, rašeńni pavinny prymać prezidenty, — adznačyŭ jon. —
Ja nikudy nie poŭzaŭ. Ale kali b navat mnie pryjšłosia zdacca, ja za čatyry miljarda ŭ hod hatovy.
Heta hrošy dla našaha naroda i dla našaj dziaržavy».
Łukašenka ŭdakładniŭ, što rasijski bok aceńvaje vyhadu dla Biełarusi ad dasiahnutych damoŭlenaściaŭ u 4 młrd dołaraŭ za hod. «Ale heta kali ŭ łob, a kali aceńvać praź biźnies i našy pradpryjemstvy, to heta budzie bolš», — ličyć jon.
Pavodle zajavy Łukašenki, u adpaviednaści z dasiahnutymi damoŭlenaściami Biełaruś atrymaje biaspošlinna nafty stolki, kolki nieabchodna. «Ale kali budziem pierapracoŭvać tolki rasijskuju naftu i zatym pradavać [naftapradukty], to budziem vyvaznyja pošliny dzialić z Rasijaj, — skazaŭ biełaruski kiraŭnik. —
Hetyja damoŭlenaści dajuć nam mahčymaść vykanać zapłanavanyja pakazčyki da 2013 hoda. Heta zruchi na ŭsich kirunkach».
Łukašenka padkreśliŭ, što dźvium krainam jašče nieabchodna damovicca pra ceny na haz. «Iduć ciažkija pieramovy, ale ŭ lubym vypadku ekanomika ŭ nastupnym hodzie prahladajecca lepš, čym my płanavali», — miarkuje jon.
Jak paviedamlałasia raniej, pavodle dasiahnutych damoŭlenaściaŭ Biełaruś, atrymlivajučy biaspošlinna rasijskuju naftu, pavinna pieraličvać u rasijski biudžet 100% ekspartnaj pošliny na naftapradukty, jakija ź jaje vypracoŭvajucca.
