Ahułam na hety momant, za sutki paśla našaha zvarotu, da nas źviarnulisia z prapanovami roznaj dapamohi 142 čałavieki. Biahučaja patreba «Našaj Nivy» ŭ kamputarach zadavolenaja.Redakcyja pracuje nad viartańniem u narmalny technałahičny režym – nakolki jon mahčymy ŭ hetaj situacyi.
Pakul kamputaraŭ bolš nie treba. Adnak, mahčyma, u bližejšyja dni źjaviacca novyja patreby ŭ nas ci našych kaleh. Tady budziem źviartacca znoŭ. I, kali łaska, pamiatajcie pra patreby našych kaleh u rehijonach, a taksama dziejačoŭ apazicyi i kultury ŭ rehijonach. Im byvaje najciažej, nam tut u Minsku lahčej, u vialikaj hramadzie.
Patreba ŭ hrošach zaŭsiodnaja. Chto jašče choča dapamahčy vychadu «Našaj Nivy», chaj robić hrašovyja achviaravańni. Čarhovy raz dziakujem ŭsim tym, chto achviaruje dziesiacinu ci tryccacinu ad svaich prybytkaŭ na patreby niezaležnaha hramadstva i «Našaj Nivy» ŭ pryvatnaści.
Jak pieraličvać hrošy – čytajcie tut.
Zaŭtra «Naša Niva» maje padać zajavu ŭ KDB z prośbaj viarnuć techniku, vyniatuju ŭ časie pieratrusaŭ 28 śniežnia.
Situacyja ŭ krainie zastajecca niapeŭnaj, mahčymy novyja akcyi zastrašvańnia. Ale źviartaje ŭvahu najpierš niebyvałaja salidarnaść niezaležnaha hramadstva. Pavodle infarmacyi «Našaj Nivy», ahulnaja suma srodkaŭ, sabranych dla patreb zatrymanych i aryštavanych, pa roznych linijach, na hety momant pieravysiła ŭžo 300 miljonaŭ rubloŭ.
Jak kažuć tyja, chto vyjšaŭ z turmaŭ, pieradačy im prynosili zusim nieznajomyja im ludzi, i ŭ tych pieradačach było ŭsio nieabchodnaje.
Dziakuj za hety hod, dziakuj za hetuju imhniennuju dapamohu. U Biełarusi naradžajecca hramadzianskaja nacyja. Słovy staroha biełaruskaha himna siońnia ŭsprymajucca jak praroctva: «U kryvavych mukach my narodzim žyćcio Baćkoŭščyny svajoj».
Usiaho dobraha Vam! Ščaślivaha Novaha hoda!
