Što ciapier pavinna rabić apazicyja? Adkazvaje dyrektar Biełaruskaha instytuta stratehičnych daśledavańniaŭ Vital Silicki.
— 19 śniežnia adbyŭsia pahrom, ale nie razhrom apazicyi. Raźvićcio padziejaŭ paśla 19 śniežnia (jak i palityčnaja dynamika na praciahu hoda) daje padstavy mierkavać, što palityčnaja apazicyja budzie zdolnaja adradzicca navat niahledziačy na represii — dla jaje ŭ biełaruskim hramadstvie paprostu isnuje sacyjalnaja baza. Ale pierad usim niezaležnym hramadstvam zaraz stajać u pieršuju čarhu hramadskija i pravaabarončyja, a nie palityčnyja zadačy. Važna damahčysia niezaležnaha rasśledavańnia padziejaŭ 19 śniežnia i całkam apraŭdać tych, chto trapiŭ za kraty, u vačach biełaruskaha hramadstva i mižnarodnaj supolnaści, akazać dapamohu paciarpiełym.
Spantannaja čałaviečaja salidarnaść vyšturchoŭvaje novych lidaraŭ i śviedčyć patencyjał hramadzianskaj supolnaści ŭ Biełarusi.
Važna, kab palityčnaja apazicyja ŭ pieršuju čarhu ŭśviadomiła siabie mienavita jak palityčnaha pradstaŭnika hetych pracesaŭ, upisvałasia i dapamahała im. Zaraz nie čas na niejkija arhanizacyjnyja vysnovy ci novyja kanfihuracyi.
Za čas palityčnaj kampanii 2010 hoda demakratyčny ruch u Biełarusi kančatkova aformiŭsia jak sietkavaja struktura, jakaja nie ŭłazić u ramki partyjnych brendaŭ i štučnych kaalicyj.
Hałoŭnaje — kaardynacyja dziejnaści i salidarnaść jak na miascovym, tak i na nacyjanalnym uzroŭni.
