Staršynia Jeŭraparłamienta Ježy Buziek vystupiŭ ź inicyjatyvaj bajkotu biełaruskich spartoŭcaŭ na mižnarodnaj arenie. Padčas dyskusii pa Biełarusi na pasiedžańni ŭ Bruseli jeŭračynoŭnik padkreśliŭ, što dziela demakratyzacyi Biełarusi ŭsie srodki prymalnyja. Jak na takuju pierśpiektyvu reahujuć biełaruskija spartoŭcy?

Ježy Buziek prapanavaŭ vyklučyć Biełaruś ź mižnarodnych spartyŭnych mierapryjemstvaŭ, uklučna z Alimpijskimi hulniami i Kubkami śvietu. Z ulikam, što kiraŭnictva krainy ŭsio bolš padkreślivaje svoj spartovy ŭchił, a Alaksandar Łukašenka voś užo paŭtara dziasiatka hadoŭ uznačalvaje Nacyjanalny alimpijski kamitet, udar pa samalubstvu moža być nadzvyčaj adčuvalny.

Ciapier Biełaruś aktyŭna rychtujecca pryniać 78-y pa liku čempijanat śvietu ŭ chakiei. Anansujecca, što ŭ 2014 hodzie Minsk stanie sapraŭdnaj chakiejnaj stalicaj, a ŭzroŭniem arhanizacyi haspadary źbirajucca zaćmić usie raniejšyja forumy. Pa kolkaści ladovych pałacaŭ kraina sapraŭdy pretenduje na jeŭrapiejskaje pieršynstvo, adnak pry ciapierašniaj palityčnaj situacyi ŭsie namahańni mohuć pajści ŭ piasok.

Mižnarodny hrasmajstar, adzin z najlepšych savieckich i biełaruskich šachmatystaŭ Viktar Kuprejčyk z razumieńniem stavicca da nieabchodnaści ŭpłyvać na ciapierašnija ŭłady praz užyvańnie sankcyj — u tym liku i ŭ sporcie. Ale ličyć, što nielha źmiešvać u adzin kacioł usie spabornictvy: «Sankcyi, kaniečnie, patrebnyja, biez pytańniaŭ. Ale što tyčycca sportu, to, ahulnymi słovami, jon usio ž ličycca pa-za palitykaj. Praŭda, kali ŭziać z historyi, my ž viedajem: u 1980-ch byŭ bajkot Alimpijadaŭ, dvuchbakovy. I ŭ našych umovach heta budzie krok moža navat zvyšradykalny, choć u takoj sytuacyi ničoha vyklučać nielha. Tamu kali vybirać, to zabarona na Alimpijadu — heta, kaniečnie, zanadta. I tyja ž spartoŭcy ŭ lubym vypadku nie źviazanyja z padziejami ŭ Minsku.

A voś kali ŭziać čempijanat śvietu pa chakiei, to pryviazku znajści možna. Heta ŭžo inšaja sprava: što chacieli — toje i majem. Niechta nie choča takoj raźviazki, a niechta ž uparta hetaha damahajecca, i vy viedajecie chto. To bok,

ad Alimpijady, liču, adłučać nielha. Byŭ bajkot Maskvy, byŭ bajkot Łos-Andželesa, chopić. Usio ž ideja Mižnarodnaha alimpijskaha kamiteta — abjadnańnie kantynientaŭ, krainaŭ. A voś na łakalnym uzroŭni takoje dapuščalna, na moj pohlad. Admianić dla pačatku kaladny turnir na pryzy prezidenta — i ŭsio ŭ paradku budzie
…"

Adzin z najbolš paznavalnych biełaruskich chakieistaŭ za miažoj — Uładzimir Kopać, aŭtar pieramožnaj šajby ŭ matčy sa zbornaj Šviecyi, jakaja dazvoliła kamandzie Biełarusi zaniać 4-je miesca na Alimpijadzie ŭ Sołt-Łejk-Sici ličyć, što ŭ XXI stahodździ nijak nie vypadaje vyrašać palityčnyja pytańni praz sport: «Čapać chakiejny čempijanat śvietu, zamachvacca na toje, što Biełaruś čakała stolki hadoŭ, heta budzie prosta nonsens.

Spadziajusia, što ŭsio ž na čale takich strukturaŭ siadziać i prymajuć rašeńni ludzi, jakija myślać ćviaroza. A kali tak, to da hetaha nie dojdzie».

Pryzior Alimpijskich hulniaŭ, frystajlist Dźmitryj Daščynski hetaksama miarkuje, što

spartoŭcy mohuć paciarpieć niezasłužana — zastaŭšysia tolki ŭ biełaruskaj «abałoncy», atlety paprostu dehradujuć
. Pa jaho słovach, pretenzii da ŭładaŭ musiać pradjaŭlacca na palityčnym uzroŭni: «Krajem vucha čuŭ, što nas płanujuć abmiežavać ledźvie nie va ŭsich pierasoŭvańniach. Ale nie dumaju, što heta daść choć niejki efiekt. Abmiežavańni — nie vyjście, zaraz naadvarot, ludziam treba davać jak maha bolš svabody. Ja razumieju, kali ŭ jeŭrapiejskich strukturaŭ jość niezadavalnieńnie ŭładami, adnak jany sami musiać vyrašać hetyja pytańni. Pryčym tut zvyčajnyja ludzi, spartoŭcy, jakija ŭ balšyni svajoj nijakich adnosinaŭ da palityki nie majuć?

A datyčna sportu budzie ŭdar vielmi surjozny. Tamu što sport raźvivajecca tolki dziakujučy kankurencyi, udziełu ŭ mižnarodnych spabornictvach».

Šancaŭ na toje, što Biełaruś pazbavicca mižnarodnych kantaktaŭ u sporcie, niašmat.

Pradstaŭniki praktyčna ŭsich adyjoznych režymaŭ — ad Paŭnočnaj Karei da Kuby — niahledziačy na ekanamičnyja i palityčnyja sankcyi ŭ adnosinach da dyktataraŭ i ich atačeńnia, nie pazbaŭlenyja mahčymaści vystupać na važniejšych ŭsiaśvietnych spabornictvach.
Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?