Spadkajemcy Džerama Devida Selindžera dali dazvoł na publikacyju praciahu jaho znakamitaha ramana «Nad prorvaj u žycie» va ŭsich krainach śvietu, akramia ZŠA i Kanady, piša The Guardian.
U ZŠA i Kanadzie raman zabaranili da publikacyi da zakančeńnia terminu achovy aŭtarskich pravoŭ.
Praciah pad nazvaj «Praz 60 hadoŭ: idučy skroź žyta» (60 Years Later: Coming Through the Rye) byŭ napisany šviedskim aŭtaram Fredrykam Kołcinham (pad psieŭdanimam Džon Devid Kalifornija). Pa siužecie pastareły Chołden Kołfiłd źbiahaje z prytułku dla sastarełych i adpraŭlajecca ŭ Ńju-Jork. Adnym ź piersanažaŭ ramana vystupaje sam Selindžer.
Ab isnavańni hetaj knihi stała viadoma ŭ mai 2009 hoda. Nieŭzabavie jana była apublikavanaja ŭ Vialikabrytanii i ŭ Šviecyi, adnak užo ŭ červieni Selindžer padaŭ u sud z namieram zabaranić publikacyju sikvieła, jaki jon nazvaŭ «banalnym i paviarchoŭnym płahijatam». Sud prypyniŭ publikacyju knihi, ale paśla śmierci piśmieńnika ŭ studzieni 2010 hoda šviedy praciahnuli pieramovy ź jaho naščadkami.
U vyniku im udałosia dasiahnuć pahadnieńnia, padrabiaznaści jakoha nie raskryvajucca. Viadoma tolki, što šviedskamu vydaŭcu zabaranili zhadvać u knizie Chołdena Kołfiłda, raman «Nad prorvaj u žycie», a taksama pryśviačać knihu Selindžeru. Pa słovach Kołcinha, publikacyjaj jaho ramana ŭžo zacikavilisia vydaŭcy ŭ šaści krainach.
Brytanskija krytyki ŭ svaich recenzijach na raman syšlisia ŭ mierkavańni, što hetaja kniha ŭjaŭlaje saboj «fan-fikšn» i «biaskryŭdnaje hłupstva».
