Sotni abanentaŭ mabilnych aperataraŭ VELCOM, MTS i Life vyklikajuć na dopyty ŭ milicyju, u KDB, kab tyja patłumačyli, što jany rabili ŭviečary 19 śniežnia na Kastryčnickaj płoščy i płoščy Niezaležnaści
— maŭlaŭ, ichnyja mabilniki «zasiekli» ŭ miescach praviadzieńnia akcyjaj pratestu. Ci «zdavali» mabilnyja aperatary svaich abanentaŭ?

Paśla vychadu čarhovaha prapahandysckaha filma Biełaruskaha telebačańnia «Płošča. Žalezam pa škle» ŭ mnohich uładalnikaŭ sotavych telefonaŭ byŭ šok: mabilniki tatalna prasłuchoŭvajucca. Pryčym, nia tolki ŭ apazycyjnych palitykaŭ, kandydataŭ u prezydenty. A tut jašče narod stali vyklikać na dopyty z pytańniem: «Dzie vy byli 19 śniežnia i što rabili na płoščy?». Presavy sakratar «Maładoj Biełarusi» Cimafiej Drančuk na minułym tydni sam byŭ na dopycie, a na hetym tydni va Frunzenskaje RUUS vyklikali niekalki jahonych siabroŭ:

Cimafiej Drančuk

«Adzin moj znajomy byŭ na dopycie pazaŭčora, i śledčy jamu pryznaŭsia, što ŭ jaho śpis z sotni čałaviek, u jahonaha kalehi z dvuchsot. I śledčyja musiać kožnaha abaviazkova vyklikać, dapytać, skłaści pratakoł dopytu, to bok aformić heta aficyjna».

Aperatary mabilnaj suviazi śćviardžajuć, što jany ni pry čym. Pradstaŭnica kampanii VELCOM na ŭmovach ananimnaści takim čynam adkazała na pytańnie Radyjo Svaboda, što budzie, kali vystavić pretenzii da mabilnaha aperatara ŭ «zdačy» svaich abanentaŭ:

Tut mabilny aperatar absalutna ni pry čym. Tut zusim inšyja, bolš vysokija siły. I my ni paŭpłyvać na heta nia možam, ni pieraškodzić — ničoha

«Biessensoŭna vystaŭlać pretenzii, tamu što tak i adkažuć: maŭlaŭ, da nas takija zapyty nie pastupali. I heta budzie praŭda. My hetaha nie rabili, tam inšyja schiemy pracavali. U ich usio svajo. Tut usio pa-inšamu. Tut mabilny aperatar absalutna ni pry čym. Tut zusim inšyja, bolš vysokija siły. I my ni paŭpłyvać na heta nia možam, ni pieraškodzić — ničoha».

Juryst kampanii sotavaj suviazi MTS Dźmitryj Chodas padčas našaj hutarki niekalki razoŭ spasyłaŭsia mienavita na rasiejski dośvied, akcentujučy ŭvahu: MTS — aperatar rasiejski:

«Nie tamu što ja niešta chavaju, ja sapraŭdy nia viedaju, jak hetyja źviestki trapili adpaviedna da tych, chto pytaŭsia… Heta pravaachoŭnyja orhany, ja pravilna razumieju?».

Karespandentka: «Tak, kaniečnie».

«Prosta nia viedaju. Ja nia dumaju nasamreč, što tut aperatar vas „zdaje“. Prosta pa rasiejskamu dośviedu viedaju: realna takaja mahčymaść u pravaachoŭnych orhanaŭ jość — samastojna, biez udziełu aperatara ŭsio heta rabić. Naturalna, z sankcyi. Kali jość sankcyi adpaviednaha orhana, hetym zajmajucca mienavita specyjalisty pravaachoŭnaha orhana. Ale nijak nie aperatar».

Navat kali sotavy telefon i «zasiekli» ŭ adpaviedny čas 19 śniežnia ŭ rajonie masavych akcyjaŭ, heta ni pra što jašče nia śviedčyć. Ni što čałaviek udzielničaŭ u akcyi, ni što jon fizyčna znachodziŭsia pablizu, śćviardžaje Cimafiej Drančuk:

Realna takaja mahčymaść u pravaachoŭnych orhanaŭ jość — samastojna, biez udziełu aperatara ŭsio heta rabić

«Ja ź inšaj praktyki, jašče niekalki hadoŭ tamu, viedaju, što jość takaja asablivaść pracy sotavych kampanij. Abanent, jaki znachodzicca ŭ peŭnym miescy, moža być dałučany da dziasiatka sotavych vyšak. Kali abanent znachodzicca, da prykładu, na Kastryčnickaj płoščy, jon moža być dałučany da soty, jakaja znachodzicca blizu płoščy Niezaležnaści, blizu vakzału, blizu vulicy Kirava, Płoščy Pieramohi i hetak dalej. Tamu heta absalutna nie źjaŭlajecca dokazam».

Na dopyty i razmovy vyklikajuć taksama i ludziej, jakija kantaktujuć u sacyjalnych sietkach, u Skype, ICQ. Padčas masavych pieratrusaŭ šmat kamputaraŭ było kanfiskavana ŭ redakcyjach niedziaržaŭnych ŚMI, u žurnalistaŭ, aktyvistaŭ hramadzkich, pravaabarončych arhanizacyj. Cimafiej Drančuk kaža:

" Niekatoryja kamputary byli «ŭskrytyja», i na padstavie razmovaŭ z subiasiednikami tych surazmoŭcaŭ taksama vyklikajuć na dopyty, kab daviedacca, pra što i navošta jany razmaŭlali z žurnalistami, pradstaŭnikami hramadzkich arhanizacyj».

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?