Hazieta «SB. Biełaruś siehodnia» pad rubrykaj «Rassakrečana» apublikavała vielizarny pa mierkach hetaha vydańnia artykuł pad nazvaj «Za kulisami adnoj zmovy».

U artykule pad vyhladam rasśledavańnia pryviedzienaja čarada niepaćvierdžanych nijakimi dakumientami «faktaŭ» i nibyta najaŭnych u zapisie dyjałohaŭ lidaraŭ apazicyi. U pryvatnaści, nie nazyvajučy imionaŭ, kalektyŭny aŭtar artykuła pryvodzić vytrymki z pratakołu dopytu «vysokapastaŭlenaha funkcyjaniera HP».

Pa kamientar my źviarnulisia da Andreja Dźmitryjeva, jaki ŭ adsutnaść Niaklajeva źjaŭlajecca faktyčnym kiraŭnikom kampanii «Havary praŭdu».

— Całkam zrazumieła, što artykuł u «SB» — heta praciah filma «Płošča. Žalezam pa škle». I raźličana na zusim nieinfarmavanuju publiku.

Ja nie chaču nikoha z čytačoŭ hetaj haziety pakryŭdzić, ale bolšaść ź ich nie mohuć ni pravieryć, ni paćvierdzić, ni choć by supastavić niejkija dadzienyja abo prasačyć łohiku padziej.
Usie, chto choć trochi razumieje situacyju ŭnutry apazicyi, dobra paśmiajalisia, čytajučy hety artykuł. Dumaju, niekatoryja donary papiarchnulisia, daviedaŭšysia, što jany padtrymlivali Niaklajeva.
Artykuł u asnoŭnym skiravany suprać kampanii «Havary praŭdu» i Niaklajeva asabista, i vydatna rastłumačana, čamu tak, prosta ŭ artykule: «Stvoranaja mahutnaja struktura».

Hutarka «supracoŭnika» orhanaŭ i niejkaha «funkcyjaniera» — kali jon jość nasamreč, čamu ž jaho nie pakazali ŭ filmie? Kali b ludzi mahli čuć hałasy i intanacyi sapraŭdy kankretnych ludziej, heta mieła b vahu. I kali ŭžo tam cytavali razmovy až da chatnich adrasoŭ, to takuju «bombu» treba dakładna zapuskać u efir. Ale nadrukavany na papiery — biez usialakich dokazaŭ sapraŭdnaści — heta prosta sproba zhańbić lidaraŭ kampanii «Havary praŭdu» i ŭ pryvatnaści vystavić zdradnikam asabista mianie, bo namiok na asobu mifičnaha «funkcyjaniera» całkam prazrysty.

Ja źbirajusia padać u sud na hazietu za abrazu honaru i hodnaści mianie i lidaraŭ kampanii «Havary praŭdu», choć nie vieru, što ŭ biełaruskija sudy naohuł možna źviartacca ludziam, jakija majuć choć addalena adroznaje ad aficyjnaj linii mierkavańnie: sudy całkam kantralujucca ŭładaj.

Siońnia stała zrazumieła, čamu mianie adpuścili na časovuju svabodu — kab zhańbić i zrabić zdradnikam u vačach hramadstva, u asiarodździ apazicyi i navat unutry našaj kamandy.
Taja chvala salidarnaści prostych hramadzian, aktyvistaŭ, palitykaŭ, jakaja jość ciapier, vidavočna nie padabajecca ŭładam, i zaraz zadača znoŭ usich pasvaryć, padzialić. Jak kažuć, padzialaj i ŭładar. Heta, jak im zdajecca, lohki sposab pasvaryć nas, pasiejać niedavier, čutki i plotki — usio heta — kab my nie mahli dziejničać razam. Ja ŭpeŭnieny ŭ kamandzie, u kalehach, u ludziach. Ciapier luboje takoje dziejańnie ŭłady vyklikaje tolki adno procidziejańnie — jašče bolšuju zhurtavanaść.

Mahčyma, usia hetaja čarada «tvorčych» vypadaŭ z boku ŭłady (i film, i artykuł, jaki padadzienaja jak sieryjał — «Praciah budzie…») — niejkaja artpadrychtoŭka da 31 studzienia, kab pasvaryć jeŭrapiejskich palitykaŭ z našymi, maŭlaŭ, daviarać im nielha.

Ale całkam vierahodna, što hetyja padziei nie źviazanyja i aficyjnyja ŚMI prosta dziejničajuć pa zahadzia pradumanym płanie, jaki hruntujecca na zapałochvańni i ckavańni.
Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?