Telekanał «Biełsat» prapanoŭvaje svaim hledačam zirnuć na ciapierašniuju situacyju ŭ Biełarusi skroź pryzmu minułych hadoŭ. Dakładniej, na jeŭrapiejska-biełaruskija stasunki. U novaj stužcy režysiora Leanida Mindlina «Jeŭrapiejski bal» kadry kanca 1990-ch čarhujucca z najnoŭšymi karcinkami biełaruskaj rečaisnaści.
Mindlin nazvaŭ svaju novuju pracu dakumientalnaju trahikamiedyjaj. A epihrafam da stužki abraŭ cytatu z Ŭiljama Šekśpira: «Minułaje było prałoham». Tak, novaja hienieracyja biełarusaŭ, mahčyma, i nie pamiataje ŭsich niuansaŭ stasunkaŭ Biełarusi i Zachadu. Mindlin ža, karystajučysia svaim unikalnym videaarchivam, stvaraje poŭnuju karcinu taho, z čaho pačynałasia hulnia Alaksandra Łukašenki ź jeŭrapiejcami, i jak apošnija znoŭ trapili ŭ tuju ž biełaruskuju pastku.
U filmie bahata kamientaroŭ taho času – samich ambasadaraŭ, siońniašniaj analityki ad viadučych palitykaŭ Biełarusi: Andrej Sańnikaŭ, Piotra Sadoŭski, Stanisłaŭ Šuškievič… Voś pośpiechi maładoj biełaruskaj dypłamatyi: novyja ambasady ŭ Jeŭropie, vizit prezidenta ZŠA Biła Klintana ŭ Biełaruś, udzieł u mižnarodnych kanfierencyjach… A voś – błakada Drazdoŭ, rezkija i nachabnyja zajavy novaha haspadara Biełarusi, refierendum 1996 h.
Listapad 2010 h. byŭ kulminacyjaj nadziejaŭ na demakratyčnyja źmieny ŭ Biełarusi. Padčas vizitu ministraŭ zamiežnych spravaŭ Niamieččyny i Polščy Łukašenka paćvierdziŭ namier raźvivać stasunki ź JEZ.
A potym byli vybary i Płošča, noč bieź miłasernaści. Jeŭrapiejski bal pačynaŭsia ŭ Vialikim teatry, a zavieršyŭsia ŭ śledčym izalatary KDB.
Premjera dakumientalnaha filmu «Jeŭrapiejski bal» na telekanale «Biełsat» 4 lutaha, u piatnicu, a 21.40.
Paŭtory ŭ subotu a 11.20, paniadziełak 7 lutaha a 19.00 i ŭ aŭtorak 8 lutaha a 8.40 i a 13.10
Na pačatku nastupnaha tydnia film možna budzie hladzieć onłajn u radziele «Dakumientalnyja filmy».
