Kiraŭnik viedamstva kanclera Hiermanii adkazaŭ na pytańni «Našaj Nivy»: «Kali prezident Łukašenka nie zrušycca sa svajoj pazicyi, to paŭstanie nieabchodnaść abmiarkoŭvać dadatkovyja kroki».
Heta vyklikała zdumleńnie analitykaŭ: čamu Minsk, niby admysłova, pajšoŭ na hetyja kroki?
U svaju čarhu, Hiermanija z prychilnicy dyjałohu ź Minskam pierajšła na pazicyju padtrymki sankcyj suprać łukašenkaŭcaŭ.
31 studzienia Jeŭrasajuz takija sankcyi ŭvioŭ. Bolš za toje, jeŭrapiejskija dypłamaty nie chavajuć, što ŭ vypadku raspravy z palitviaźniami ci intensifikacyi represij suprać hramadzianskaj supolnaści sankcyi buduć uzmocnieny.
«Naša Niva» paprasiła kiraŭnika viedamstva kanclera Hiermanii Ronalda Pafału adkazać na niekalki pytańniaŭ adnosna biahučaj situacyi.Pafała maje vialiki ŭpłyŭ na farmavańnie biełaruskaj palityki Hiermanii. Jon i asabista zaanhažavany ŭ biełaruskaje pytańnie, bo naviedvaŭ Minsk jašče da taho, jak zaniaŭ pasadu, ekvivalentnuju biełaruskamu kiraŭniku Administracyi prezidenta.
Pytańni zadavalisia i adkazy pryjšli praz elektronnuju poštu.
— Rada ministraŭ ES nakłała na łukašenkaŭcaŭ vizavyja sankcyi, ale, nasupierak zakliku Jeŭraparłamienta, u rašeńni nie zhadvajecca pra ekanamičnyja miery. Čamu Jeŭrasajuz nie zachacieŭ nakłaści ekanamičnyja sankcyi na łukašenkaŭcaŭ? Ci jon nie moh?
— Dazvolcie spačatku skazać niekalki słoŭ z nahody situacyi ŭ Biełarusi.
Padziei 19 śniežnia trahičnyja. Trahičnyja dla tych ludziej, jakija atrymali traŭmy i byli aryštavanyja, i trahičnyja dla ŭsioj krainy.
U dadzienaj situacyi Jeŭrapiejski Sajuz maje dźvie mety — z adnaho boku, šlacham prymianieńnia sankcyj da pradstaŭnikoŭ režymu jon źbirajecca pakazać, što abrany šlach represij i dyktatury — pamyłkovy. Tamu ES 31 studzienia 2011 hoda abviaściŭ pra abmiežavańnie pajezdak i błakavańnie aktyvaŭ u adnosinach da 157 asob. Ad šerahu raniej zapłanavanych kantaktaŭ z uradam z pryčyny situacyi, što skłałasia, nam pryjšłosia admovicca.
Z druhoha boku, my źbirajemsia pašyryć našu padtrymku dla hramadzianskaj supolnaści.
My chočam padtrymać siły svabody, chočam pavialičyć kolkaść kantaktaŭ.Bo ŭ adnym ja asabista pierakanany: Biełaruś — kraina jeŭrapiejskaja, jakuju nielha navieki adchilić ad viaršenstva zakona, ad pavahi da pravoŭ čałavieka i demakratyi.
Kankretna heta aznačaje, što treba naroščvać i dyfierencyjavać padtrymku i spraščać dostup da vizaŭ. Pa hetych pytańniach my dasiahnuli surjoznaha prahresu na kanfierencyi donaraŭ, jakaja prajšła 2 lutaha ŭ Polščy.
Hiermanija ŭ hetym hodzie nadaść biełaruskaj hramadzianskaj supolnaści dapamohu ŭ pamiery 6,6 młn jeŭra.Za košt hetych srodkaŭ finansujucca, siarod inšaha, stypiendyi, pavyšeńnie kvalifikacyi žurnalistaŭ i prajekty pa sadziejničańni demakratyi i viaršenstvu prava. Akramia taho, Hiermanija budzie biaspłatna vydavać nacyjanalnyja vizy. Naroŭni z hetym, Fiederalny ŭrad dabivajecca taho, kab i šenhienskija vizy dla pradstaŭnikoŭ biełaruskaj hramadzianskaj supolnaści afarmlalisia ŭ bolšym abjomie i biez spahnańnia zvyčajnych zboraŭ.
— Sankcyi pryniatyja. Što dalej?
Hałoŭnym našym patrabavańniem zastajecca vyzvaleńnie palityčnych źniavolenych. U ramkach ES my vyrašyli z usioj paśladoŭnaściu damahacca hetaj mety. Mahu Vas zapeŭnić, što ja, taksama z ulikam šmatlikich kantaktaŭ ź ludźmi, jakija niepasredna trapili pad represii, nie budu asłablać svaich namahańniaŭ.
Jak ja ŭžo namiakaŭ: kali prezident Łukašenka nie zrušyć sa svajoj pazicyi, to paŭstanie nieabchodnaść abmiarkoŭvać dadatkovyja kroki.
Majucca na ŭvazie i razhladajucca
Adnaho, adnak, nie paźbiehnuć: u ciapierašnich abstavinach užo zaraz kožny patencyjny inviestar budzie staranna abdumvać pytańnie, ci varta jamu ŭ dadzienaj situacyi inviestavać u Biełaruś.
— Jakim budzie Vaša asabistaje pasłańnie Vašamu kalehu, spadaru Makieju?
Moj zaklik da jaho nastupny: uniasicie svoj układ u vyzvaleńnie palityčnych źniavolenych.
Zajmańnie ŭładnych pazicyj u aŭtarytarnym uradzie zaŭsiody źviazana ź vialikaj dolaj asabistaj adkaznaści.
