Staršakłaśniki Łohinaŭ i Napajuk vytryvali nialudskija ździeki, navat pasadku ŭ psichbalnicu. U vyniku Viarchoŭny Sud apraŭdaŭ ich. Ale śledčy pajšoŭ na pavyšeńnie! Piša baćka adnaho sa školnikaŭ.
Prajšło dvaccać miesiacaŭ z taho momantu, kali ŭ Viciebsku la abłasnoj balnicy byŭ znojdzieny trup hramadzianina Sidarava z mnostvam kołata-rezanych ran, udaraŭ i pierałomaŭ.
U hetaj ciomnaj spravie ź pieršaha dnia prahladałasia zamova vyšejstajačych čynoŭnikaŭ na terminovaje raskryćcio hetaha złačynstva luboj canoj. Achviaraj hetaj zamovy stali troje dziaciej (usie ź niapoŭnych siemjaŭ): A. Łohinaŭ, A. Aŭčaroŭ, A. Napajuk. Zatym z A. Aŭčarova było źniataje abvinavačańnie.
Z momantu ich zatrymańnia byli sucelnyja hrubyja parušeńni zakona. Dzieci byli zatrymanyja na padstavie pakazańniaŭ 15-hadovaj dvojčy sudzimaj A. Sulimavaj, jakaja napiaredadni taksama była zatrymanaja za kradziež. Tut i byŭ razyhrany śpiektakl. Jak u filmach pra milicyju. A. Sulimavaj abiacajuć nie pryciahvać jaje da adkaznaści, kali jana daść iłžyvyja pakazańni suprać dziaciej.
Hałoŭnaja śviedka była «na kručku»
Z prysudu Mahiloŭskaha abłasnoha suda: «Z najaŭnaha ŭ materyjałach dadzienaj kryminalnaj spravy chadajnictva ad 15 vieraśnia 2009 hoda za № 4 / 5346 (a.s. 171) bačna, što ČVAD načalnika Pieršamajskaha RAUS h. Viciebska Sarokin S.A. paviedamlaje na imia staršyni suda Pieršamajskaha rajona h. Viciebska, što ŭ ciapierašni momant Sulimava A.A. źjaŭlajecca asnoŭnym śviedkam pa kryminalnaj spravie pa fakcie zabojstva Sidarava D.A. i aktyŭna spryjaje rasśledavańniu. U suviazi z vyšejpadadzienym Pieršamajski RAUS h. Viciebska «chadajničaje pierad sudom uličyć fakt sudziejańnia Sulimavaj orhanam unutranych spravaŭ pry rasśledavańni asabliva ciažkaha złačynstva pry vyniasieńni prysudu».
Prysudam suda Pieršamajskaha rajona h. Viciebska ad 30 vieraśnia 2009 Sulimava A.A. na padstavie č.1 art. 205 KK z užyvańniem art. 77 KK była asudžanaja na hod i 6 miesiacaŭ pazbaŭleńnia voli z adterminoŭkaj vykanańnia pakarańnia na hod. Pry hetym na Sulimavu A.A. byli ŭskładzienyja abaviazki, kantrol za vykanańniem jakich Sulimavaj A.A. u siłu art.177 UVK uskładzienyja na kryminalna¬vykanaŭčuju inśpiekcyju pa miescy jaje žycharstva, heta značyć na nazvanuju inśpiekcyju Pieršamajskaha RAUS h. Viciebska.
Heta značyć, što pakazańni pa spravie ab zabojstvie Sidarava D.A. niepaŭnahadovaja śviedka Sulimava A.A. pačała davać tolki paśla taho, jak sama trapiła ŭ pole zroku pravaachoŭnych orhanaŭ jak padazravanaja ŭ kradziažy mabilnaha telefona i až da zakančeńnia času adterminoŭki pakarańnia Sulimava A.A. znachodziłasia ŭ zaležnym ad supracoŭnikaŭ Pieršamajskaha RAUS h. Viciebska stanoviščy».
U kamieru padsadžvali adpietych zekaŭ
U svaju čarhu,
rabotniki pravaachoŭnych orhanaŭ Pieršamajskaha RAUS, kiravanyja kryvažernym majoram H. Citovym (jakomu naplavać na ŭsio — bo jon bieź piaci chvilin piensijanier), užyvajuć uvieś arsienał katavańniaŭ, źbivańniaŭ i prynižeńniaŭ z metaj vybić pryznalnyja pakazańni ŭ dziaciej.Im udajecca vybić hetyja pakazańni ad A. Aŭčarova i A. Napajuka, a voś A. Łohinaŭ vyjaviŭsia mocnym areškam, jaki ni razu na praciahu ŭsiaho papiaredniaha śledstva (a jano doŭžyłasia amal hod) nie abhavaryŭ svaich siabroŭ i nie ŭziaŭ na siabie vinu za złačynstva.
Kiraŭniki śledčaj bryhady Ju. Ščaćko i A. Taŭtyn rabili ŭsio, kab złamać 16-hadovaha chłapčuka. Spačatku kamieru ŭ SIZA Viciebska, a zatym Minska pa niekalki razoŭ na dzień naviedvali apieratyŭniki, zatym u kamieru padsadzili dvuch adpietych recydyvistaŭ i zabojcaŭ. Meta była adna — prymusić A. Łohinava dać pryznalnyja pakazańni.
Na miesiac u Navinki
Taksama Ščaćko zaciahvaŭ śledstva. Za pieršyja try miesiacy (66 rabočych dzion) A. Łohinaŭ byŭ dapytany śledčym Ščaćko adzin raz. Nastupnyja dva miesiacy (studzień—luty 2010) nie było nivodnaha dopytu. Na pytańnie maci A. Łohinava Natalli Viktaraŭny, čamu zaciahvajecca śledstva, Ščaćko adkazaŭ: «Ja dumaŭ, što za hety čas Łohinaŭ daść inšyja pakazańni». A pakolki hetaha nie zdaryłasia,
śledčy niezakonna nakiroŭvaje A. Łohinava na stacyjanarnaje abśledavańnie ŭ lakarniu «Navinki». (Nakiravańnie na stacyjanarnaje lačeńnie (abśledavańnie), pavodle pastanovy Plenuma (Prezidyuma) Viarchoŭnaha Suda RB, niepaŭnaletnich dziaciej ažyćciaŭlajecca ŭ vyklučnych vypadkach: kali dzicia znachodzicca na ŭliku ŭ psichanieŭrałahičnym dyspansiery abo kali jość sumnievy ŭ jaho psichičnym i razumovym raźvićci).
Dla dasiahnieńnia złačynnaj mety śledčy Ščaćko zaciahvaje adpraŭku dakumientaŭ na A. Łohinava ŭ Navinki. Asabistaja sprava była atrymanaja daktarami praz 22 kalandarnyja dni, a vypiska z PND h. Viciebska — jašče praz tydzień. Takim čynam, 29 kalandarnych dzion A. Łohinaŭ znachodziŭsia ŭ «sanatoryi Navinki» biez dakumientaŭ, u ciesnym kantakcie z sapraŭdnymi varjatami i zabojcami. (Paśla Navinak, praź dzień, A. Łohinaŭ byŭ nakiravany śledčym Ščaćko na abśledavańnie na palihrafie, što zvyčajna robicca ŭ pieršyja dni abo tydni rasśledavańnia, a nie praz vosiem miesiacaŭ, dy jašče paśla Navinak, kali dzicia znachodziłasia ŭ ciažkim fizičnym i psichałahičnym stanie).
Ja jak baćka hanarusia synam, jaki zmoh vytryvać takoje vyprabavańnie i nie złamaŭsia. Čytajučy listy ź SIZA, ja ździŭlaŭsia jaho stojkaści — usie jany pačynalisia i zaviaršalisia adnymi i tymi ž słovami:
«Tata, nie chvalujsia, usio budzie dobra, bieražy zdaroŭje, heta dla ciabie hałoŭnaje...» Ni ŭ adnym ź dziasiatkaŭ listoŭ Alaksandra ja nie ŭbačyŭ adčaju. Jon, naadvarot, zaŭsiody padtrymlivaŭ nas, baćkoŭ, znachodziačysia ŭ asiarodździ adpietych zekaŭ, zabojcaŭ i recydyvistaŭ. Tolki adnojčy, viarnuŭšysia z «sanatoryja Navinki», jon napisaŭ: «Tata, Navinki — heta žudasna».
Ja nie kryvažerny čałaviek, ale vielmi chacieŭ by, kab hałoŭnych fihurantaŭ hetaj brudnaj spravy — śledčych Ju. Ščaćko i A. Taŭtyna — nakiravali choć by na tydzień u «sanatoryj Navinki», kab jany adčuli ŭsie pryjemnaści «adpačynku» ŭ hetaj ustanovie. A jašče chaciełasia b, kab ich pavadzili pa kabinietach i łabaratoryjach achoŭniki na łancužku, jak ščaniukoŭ, što naškodzili.
Adkul u śledčaha stolki nianaviści?
Na pytańnie, jak hetuju akaličnaść rasceńvaje namieśnik hałoŭnaha ekśpierta RB Kuźmičoŭ, jon adkazaŭ: «Heta ciažkaje złačynstva, bo kali čałaviek nakiroŭvajecca na lačeńnie navat u sanatoryj ci dom adpačynku, jon abaviazany mieć miedycynskuju kartu».
Uźnikaje pytańnie,
adkul u takoha maładoha śledčaha Ščaćko stolki nianaviści, žorstkaści ŭ dačynieńni da prostych ludziej i navat dziaciej. Chiba mohuć takija ludzi pracavać u orhanach prakuratury?Nielha nie zaŭvažyć, što za ŭvieś čas papiaredniaha śledstva (12 miesiacaŭ), mnie, baćku, nie było dazvolena nivodnaha spatkańnia z synam.
Kali b vy viedali, kolki pustych pastanovaŭ było pryniata śledčym Ščaćko, kolki było ŭ kožnym radku hetaj «pierapiski» nianaviści i złości, da nas, baćkoŭ A. Łohinava, jakoha nie zmoh śledčy Ju. Ščaćko złamać ni maralna, ni psichałahična, ni fizična.
Kala sotni skarhaŭ i chadajnictvaŭ było napisana nami, baćkami troch niepaŭnaletnich dziaciej, Łohinava A., Napajuka A., Aŭčarova A., i ni na adno nie było atrymana arhumientavanaha, abjektyŭnaha adkazu.
Na pryjomie ŭ Vasileviča
U Hienieralnaj prakuratury była stvoranaja cełaja bryhada pa adpiskach na našy skarhi i zajavy. Uznačaliŭ jaje namieśnik hienieralnaha prakurora Konan (darečy, taksama viciablanin, jak i Ščaćko). My, baćki Łohinava, Aŭčarova, Napajuka, dvojčy sprabavali trapić na pryjom da V. Konana. Na pieršuju našu zajavu atrymali niaŭciamny adkaz, ź jakoha zrazumieli, što z nami nie chočuć sustrakacca, a na druhuju zajavu my naohuł adkazu nie atrymali. Darečy, jak i jašče na niekalki našych skarhaŭ i chadajnictvaŭ na imia Hienprakurora.Adpiskami na našy skarhi, chadajnictvy i zajavy zajmalisia vysokapastaŭlenyja, vysokaapłatnyja rabotniki Hienprakuratury Konan U.A., Kazačenka A.H., Zuj I.K., Siaŭruk I.H., Ščaćko Ju.A., Kuźmič V. Ł., Kryvaščoki V.M., Staraścina N.I., a taksama Pieršamajskaj i abłasnoj prakuratury horada Viciebska: Sidarovič A.V., Taŭtyn A.P., Cyvinski A.V., Čadziuk A.V., Nieściarenka A.M., Jahoraŭ V.U., Dysko H.I., Zabaŭski V.A., Makiajonak A.V. Kali praanalizavać usie adkazy, stvarajecca ŭražańnie, što ŭsie jany napisanyja adnoj asobaj pad dyktoŭku i nabranyja na adnym i tym ža kampjutary, z toj roźnicaj, što mianialisia miescami abzacy i podpisy. Nichto nie ŭnikaŭ u spravu i nie čytaŭ jaje. Usie brali «intervju» ŭ Ščaćko i rapartavali: «Usio zakonna, abjektyŭna i z ulikam kryminalna¬pracesualnaha kodeksa».
U anarchii, jakaja tvorycca ŭ Hienieralnaj prakuratury, my pierakanalisia, pabyvaŭšy na asabistym pryjomie ŭ hienieralnaha prakurora R. Vasileviča. Amal hadzinu doŭžyłasia hutarka z hienieralnym prakuroram, u jakoha my prasili adnaho: spynić hetaje złačynstva i vałakitu z boku śledčaj hrupy i chutčej pieradać spravu ŭ sud.
Adnak pra nas i našy skarhi zabylisia, i my nie atrymali nivodnaha adkazu za podpisam hienprakurora. Vidać, Ryhor Alaksiejevič paličyŭ nas za ludziej druhoha abo treciaha hatunku, dyk navošta ž jamu hublać čas na drobiazi.
Drobiaźziu hetaje złačynstva paličyŭ i kuratar spravy U. Konan, jaki navat nie pračytaŭ nivodnaha toma hetaj brudnaj spravy i ŭ toj ža dzień nakiravaŭ jaje ŭ Viarchoŭny Sud.
Viestka ab tym, što rašeńniem Viarchoŭnaha Suda razhlad našaj spravy nakiravany ŭ Mahiloŭski abłasny sud, była dla nas, baćkoŭ abvinavačanych dziaciej, šokam. My pisali listy z prośbaj pieranieści pasiadžeńnie ŭ Viciebsk, chaj navat heta buduć vyjaznyja pasiadžeńni Mahiloŭskaha suda. Za 12 miesiacaŭ my, baćki, byli pryhniečanyja maralna, fizična i materyjalna. Viedajučy ab nievinavataści našych dziaciej, my nie mieli prava davać im padstavu dla paniki, my byli abaviazanyja padtrymlivać ich va ŭsim. Jak ni było ciažka, dvojčy ŭ tydzień my vazili pieradačy ŭ SIZA Minska, naniali minskich advakataŭ. I choć nikomu z baćkoŭ nie dali nivodnaha spatkańnia, my zrabili ŭsio, kab dzieci viedali, što my nie sumniavajemsia ŭ ich nievinavataści i budziem zmahacca za ich da kanca.
Nul pracentaŭ dokazaŭ pry stapracentnym alibi
Na žal, a moža być, i na ščaście, našy prośby nie byli pačutyja Viarchoŭnym Sudom, i 22 červienia 2010 adbyłosia pieršaje pasiadžeńnie Mahiloŭskaha abłasnoha suda.Nizki pakłon usim vam za padtrymku našych dziaciej, bo, upeŭnienyja ŭ nievinavataści svaich vychavancaŭ, jany nieadnarazova źviartalisia va ŭsie instancyi z prośbaj vyzvalić dziaciej, dać im mahčymaść vučycca. Ale na žal, jak i my, baćki, piedahahičny kalektyŭ taksama nie byŭ pačuty.Na im prysutničała kala 40 čałaviek z boku abvinavačanych dziaciej: adnakłaśniki, siabry, kłasny kiraŭnik i nastaŭniki himnazii, svajaki. Ciažka było bačyć, jak nievinavatych uvodzili ŭ zału ŭ kajdankach, jak złačyncaŭ, i jak jany razhublena hladzieli ŭ vočy ŭsim znajomym praz kraty. Adno nas radavała: našy dzieci žyvyja i choć pryhniečanyja, ale nie złamanyja.
Nielha nie skazać słovy vializnaj padziaki dyrektaru 7-j himnazii, u jakoj vučylisia Łohinaŭ i Napajuk, Volzie Maksimovič, zavuču Łarysie Vavilčankavaj, namieśniku dyrektara pa vychavaŭčaj pracy Łosievaj Irynie, sacyjalnamu piedahohu Fakinoj Irynie, kłasnamu kiraŭniku Panasiku Hieorhiju i inšym za ich pryncypovaść i prafiesijanalizm, jakija jany prajavili padčas papiaredniaha śledstva i sudovaha pracesu. Bo tolki im, dy i asobnym vučniam himnazii viadoma, jaki presinh pieražyli za 17 kašmarnych miesiacaŭ z boku rabotnikaŭ Pieršamajskaha RAUS i prakuratury.
Taksama chočacca vykazać słovy ščyraj padziaki našym advakatam Ale Lizura i Alenie Puhačovaj, pravaabaroncu Paŭłu Levinavu, jaki byŭ na ŭsich sudovych pasiadžeńniach.
Za piać miesiacaŭ suda było zasłuchana bolš za 70 śviedkaŭ, i čym bližejšy byŭ finał, tym bolš vidavočnym rabiłasia toje, što sprava niaŭmieła sfabrykavanaja pravaachoŭnymi orhanami z udziełam Hienieralnaj prakuratury.
Nul pracentaŭ dokazaŭ vinavataści dziaciej pry stapracentnym ich alibi — taki vynik 27 pasiadžeńniaŭ Mahiloŭskaj sudovaj kalehii pad staršyniavańniem sudździ Jafremava A.P. Adhetul i adpaviedny prysud: «Vyzvalić nieadkładna ŭ zale suda A. Łohinava i A. Napajuka za niedakazanaściu ich udziełu ŭ ździajśnieńni hetaha złačynstva».
Śledčaja hrupa padtasoŭ1ała
Siońnia, uspaminajučy toj dzień, 29 listapada 2010 hoda, kali byŭ vyniesieny apraŭdalny vierdykt, niemahčyma nie zadać pytańnie boku abvinavačańnia, u pryvatnaści, prakuroru Mahiloŭskaj abłasnoj prakuratury A. Ihlikavaj. Jak Vy mahli prasić dla nievinavatych dziaciej 14 hadoŭ pazbaŭleńnia voli, Vy ž byli na ŭsich pasiadžeńniach suda, dzie bokam abvinavačańnia nie było pradstaŭlena nivodnaha naŭprostaha i navat uskosnaha dokazu, ni matyvu, ni instrumienta, ni ekśpiertyzy zabojstva? A było, pačynajučy z momantu zatrymańnia i da apošniaha dnia papiaredniaha śledstva, hrubaje parušeńnie zakona z boku Vašych kalehaŭ — Sidaroviča, Taŭtyna, Ščaćko, Konana, Kazačenki, Cyvinskaha i inšych. Jak Vy, žančyna, pajšli na ŭhodu sa svaim sumleńniem, niaŭžo ŭ Vas niama svaich dziaciej?
Siońnia ŭžo stała faktam, što śledčaja hrupa na čale ź Ju. Ščaćko zajmałasia padtasoŭkaj faktaŭ, času i telefonnych razmovaŭ, vykarystoŭvajučy ŭ svaich intaresach pakazańni viciebskich ekśpiertaŭ, vyniki jakich byli abvierhnutyja paŭtornymi ekśpiertyzami HMSE Minska.Tak, u pieršaj pastanovie ab aryšcie dziaciej byŭ pakazany čas ździajśnieńnia zabojstva 13.00, u nastupnych pastanovach — ad 14.00 da 16.00, ad 15.00 da 17.00 i 18.00 uklučna.
Akramia taho, padčas śledstva śviedak pahrozami prymušali davać zahadzia iłžyvyja pakazańni suprać dziaciej, ab čym nieadnarazova havaryłasia ŭ sudzie.
Zahadzia iłžyvyja pakazańni davali ŭ sudzie i čaćviora rabotnikaŭ Pieršamajskaha RAUS h. Viciebska: H. Citoŭ, A. Šeŭčyk, I. Hubin, H. Łavicki, što vyklikała asudžeńnie i śmiech prysutnych u zale. Akramia chłuśni, jany vyvučyli jašče dźvie frazy: «Nie viedaju» i «Nie pamiataju». Takim čynam, toj, chto pavinien niaŭchilna vykonvać zakony, ich biespakarana parušaŭ.
U chodzie sudovych pasiadžeńniaŭ byli vyjaŭlenyja fakty falsifikacyi pakazańniaŭ śviedak.
Dzieciam davali čytać pakazańni na manitory, a zatym źmianiali pakazańni i prymušali padpisvać papiery, nie dajučy paŭtorna pračytać.(Na što maci A. Aŭčarova pisała skarhu hienieralnamu prakuroru R. Vasileviču).
Z telefonnych razdrukovak kvaternaha telefona Łohinava byli vyklučanyja dva telefonnyja zvanki. Adzin u 16.08, druhi ŭ 16.35, jakija lišni raz paćvierdzili toje, što A. Łohinaŭ u hety čas znachodziŭsia z bratam i maci doma.
Było ździejśnienaje ničym nie prykrytaje žorstkaje złačynstva orhanami ŭnutranych spravaŭ, prakuraturaj i sudmiedekśpiertami suprać ni ŭ čym nie vinavatych niepaŭnahadovych dziaciej, jakija byli zatrymanyja niezakonna i znachodzilisia pad śledstvam i sudom bolš za 17 miesiacaŭ.
Hałoŭnaj śviedkaj jakoha nibyta była ciapier užo 16¬hadovaja dvojčy sudzimaja złačynca A. Sulimava, jakaja šmat razoŭ mianiała svaje pakazańni na papiarednim śledstvie (i nichto nie sumniavaŭsia ŭ jaje iłžyvych śviedčańniach), a taksama pamianiała ich i ŭ sudzie.
Asnoŭnymi śviedkami taksama byli try zakaraniełyja złačyncy i recydyvisty, u pasłužnym śpisie jakich — ciažkija złačynstvy, zabojstvy i nie adzin dziasiatak łahieraŭ i turmaŭ.
Za hetym złačynstvam, akramia pieraličanych vyšej prakurorskich rabotnikaŭ, staić bolš za dziasiatak vysokapastaŭlenych i vysokaapłatnych čynoŭnikaŭ Pieršamajskaha RAUS i UUS horada Viciebska: Citoŭ H.D., Karčeŭski A.M., Hubin I.M., Łavicki H.V., Šeŭčyk A.P., Sarokin S.A., Pietersan O.O., Hilko I.A., Šylin A.M., Šaškin V.V., Bołdyšaŭ S.V. i Hrekaŭ A.P.
Ščaćko — načalnikam, Citova — na piensiju
Asobnyja ŭdzielniki hetaj spravy, jakija źbivali i katavali našych dziaciej, atrymali pavyšeńnie (Ju. Ščaćko pryznačany načalnikam adździeła Viciebskaj abłprakuratury), premii za hetaje złačynstva, a kryvažerny major Citoŭ H. z ušanavańniami byŭ adpraŭleny na piensiju. A kolki dziaržaŭnych hrošaj vydatkoŭvałasia biezvynikova: na kamandzirovačnyja vydatki, prasłuchoŭku telefonnych razmovaŭ, vonkavaje nazirańnie, achovu iłžeśviedki (złačyncy Sulimavaj). A vynik varty žalu — złačyniec nie znojdzieny.Vyklikaje ździŭleńnie pazicyja Hienieralnaj prakuratury, va ŭsich dziejańniach rabotnikaŭ jakoj, ad rajonnaha ŭzroŭniu da najvyšejšaha, prahladajecca kruhavaja paruka. Nie mahu nie zavastryć uvahu na vystupie ŭ Viarchoŭnym sudzie 18 lutaha 2011 hoda pry razhladzie kasacyjnych skarhaŭ A. Ihlikavaj i paciarpiełaj Sidaravaj dziaržaŭnaha abvinavaŭcy Cimafiejeva D., jaki, u adroźnieńnie ad abvinavaŭcy Ihlikavaj, sa spravaj nie aznajomiŭsia. Inakš čym možna rastłumačyć jaho vypady ŭ adras kalehii Mahiloŭskaha abłasnoha suda ab tym, što nie byli pravieranyja vyniki ekśpiertyzaŭ. Choć vyniki ekśpiertyzaŭ byli pierapravieranyja HSME h. Minska i na sudzie davaŭ tłumačeńni namieśnik hałoŭnaha ekśpierta RB Kuźmičoŭ. Darečy, praz heta sudovaje pasiadžeńnie było prypynienaje amal na 7 tydniaŭ. Čas zabojstva D. Cimafiejeŭ užo čamuści mierkavana nazvaŭ 13.30 (pa viersii Ihlikavaj, 16.00 — 17.00, Sulimavaj — 15.00 — 16.00), ale zatoje ź jakim zachapleńniem jon apraŭdvaŭ złačynnyja dziejańni pracaŭnikoŭ Pieršamajskaha RAUS, uzakońvajučy fizičny i psichałahičny cisk na našych dziaciej padčas papiaredniaha rasśledavańnia, a ź jakim zamiłavańniem jon vynies svoj vierdykt: «Prysud Mahiloŭskaha abłasnoha suda skasavać, A. Łohinava i A. Napajuka terminova ŭziać pad vartu...» Va ŭsich prysutnych u zale zdaryŭsia šok. Tolki dziaržaŭny abvinavaŭca D. Cimafiejeŭ u pałkoŭnickich pahonach łunaŭ u abłokach, adnak niadoŭha ciahnułasia hetaja ejfaryja.Nizki pakłon sudovaj kalehii Mahiloŭskaha abłasnoha suda ŭ składzie staršyni A.P. Jafremava, narodnych zasiadalnikaŭ Ciuzikava A.M. i Pusikava B.I., jakija nie pajšli na ŭhodu z sumleńniem.
25 lutaha 2011 hoda sudovaja kalehija Viarchoŭnaha Suda pad staršynstvam sudździ M.I. Hiermienčuka, a taksama sudździaŭ V.A. Łajeŭskaha i V.D. Kryvoj pakinuli prysud Mahiloŭskaj sudovaj kalehii bieź źmieny(bieź źmieny taksama pakinutyja i pryvatnyja pastanovy ŭ adras pravaachoŭnych orhanaŭ i śledčaj hrupy prakuratury), z momantu abviaščeńnia jakoha jon ustupiŭ u siłu. Našy dzieci nie vinavatyja, i miescy ŭ kamiery vakantnyja!
***
Jak paviedamiŭ «NN» baćka Alaksandra Łohinava Chačatur Chačaturan, jon źbirajecca padavać u sud na iłžeśviedku A.Sulimavu, i Ju.Ščaćko, i A.Taŭtyna.
***
Z apoviedu Alaksandra Łohinava:Zatym pasadzili na kresła, stali bić pa hałavie dałoniami. Usio heta supravadžałasia patrabavańniami pryznacca… Paśla hetaha pratrymali ŭ boksie kala 2 hadzin, zatym u kabiniecie kahości z kiraŭnictva było skazana: «Zaraz zaviaziom na Dźvinu, voźmiem za nohi i patrymajem u vadzie».«Zaviali ŭ kabiniet №19 (tam jość štory), było piać čałaviek, začynili dźviery na kluč (abo zaščapku), spačatku pakłali na padłohu, adzin ź ich dastaŭ pistalet, prystaviŭ da łba, zasunuli pistalet u rot, kryčali, kab pryznavaŭsia. Potym padniali z padłohi, pakłali na stoł žyvatom uniz, adzin uziaŭ adkrutku i pačaŭ krucić pierad vačyma sa słovami: «Zaraz zasunu, kudy treba».
