8 sakavika dziaržsakratar ZŠA Chiłary Klintan uručyć 10 premij za mužnaść žančynam roznych nacyjanalnaściaŭ i ŭzrostaŭ.
Upieršyniu ŭ historyi mižnarodnaj prestyžnaj premii, jakaja isnuje z 2007 hodu j za čas isnavańnia jakoj było ŭznaharodžana 38 žančyn, premiju buduć uručać biełaruscy – 20-hadovaj namieśnicy staršyni "Maładoha Frontu" Naście Pałažancy, paviedamlaje sajt MF.
Uručeńnie premii adbudziecca ŭ Mižnarodny žanočy dzień u prysutnaści mnohich vysokich čynoŭnikaŭ ZŠA i z udziełam admysłovaha hościa cyrymonii – pieršaj łedzi Złučanych Štataŭ Mišel Abamy.
Z-za padpiski pra niavyjezd Nasta Pałažanka asabista nia zmoža prysutničać u Vašynhtonie, ale premija budzie pieradadziena ŭ Miensk i ŭručana joj va ŭračystaj abstanoŭcy. Pra datu j čas cyrymonii ŭ Miensku budzie paviedamlena paźniej. U Vašynhtonie publična začytajuć pramovu Nasty Pałažanki.
“Ja ź vialikim ździŭleńniem daznałasia pra hetuju premiju. Kali ja ŭśviadomiła sam fakt uzroŭniu dadzienaj uznaharody, kaniešnie, ja była ŭściešana. Uściešana, u pieršuju čarhu, nia ŭvahaju da svajoj asoby, a ŭvahaju da našaj sytuacyi i prablemy. Bo padobnaja premija mnie – heta ŭznaharoda dla kožnaha maładafrontaŭca, dla kožnaha chłopca ci dziaŭčyny, jakija marać być u svabodnaj, dabrasłaŭlonaj Boham Biełarusi i achviarujuć saboju dziela hetaha”, – havoryć Nasta Pałažanka.
Nasta Pałažanka źjaŭlajecca adnoj z abvinavačanych pa artykule 293 KK «Masavyja biesparadki». Jaje aryštavali 20 śniežnia va ŭłasnaj kvatery. Amal dva miesiacy jana znachodziłasia ŭ SIZA KDB. 17 lutaha jaje vypuścili pad padpisku ab niavyjeździe.
