U adnym z načnych kłubaŭ prajšła viečarynka pad nazvaj «Putin Party. Chaču premjera».
Videa lifenews.ru
Fotarepartaž z «Putin Party»
U noč na 7 sakavika ŭ maskoŭskim načnym kłubie «Raj» prajšła viečarynka pad nazvaj «Putin Party. Choču priemjera». Afišy i raściažki z rekłamaj mierapryjemstva, pryśviečanaha 8 sakavika, źjavilisia na vulicach rasijskaj stalicy za tydzień. Pres-słužba premjer-ministra Uładzimira Pucina adreahavała na vykarystańnie ŭ naźvie viečaryny proźvišča kiraŭnika ŭrada i paabiacała prakansultavacca ź jurystami, paviedamlajuć rasijskija ŚMI. Ale faktyčna arhanizataram nichto nie pieraškodziŭ pravieści anansavanaje mierapryjemstva pad zajaŭlenaj nazvaj. Pa ich słovach, nazvu i temu viečaryny vybrali naviednicy kłuba, jakim prapanavali prahałasavać za lepšaha mužčynu. Vybirać treba było pamiž Brusam Uilisam, Če Hievaram i Devidam Bekchemam.
Jak vyjaviłasia, u tuju noč chacieli premjera kala 1500 čałaviek. Byli i zamiežnyja hości.
Udzielnikam viečaryny razdavali tablički z nadpisam «Vova, ja s toboj», a nad scenaj łunaŭ transparant, jaki śćviardžaŭ, što «Biez Vovy …ujevo».
Heta nie pieršy pikantny skandał vakoł imia rasijskaha premjera. Letaś šerah vypusknic Maskoŭskaha dziaržaŭnaha univiersiteta źnialisia napaŭaholenymi dla skandalnaha kalendara z eratyčnymi pryznańniami na adras Pucina. Na čas «Putin Party» staronkami hetaha kalendara ŭpryhožyli interjer kłuba «Raj», a jaho madeli naviedali viečarynu asabista.
Na prapucinski kalandar inšyja studentki žurfaku MDU adkazali alternatyŭnym prajektam. U Siecivie źjaviŭsia novy kalandar, hieraini jakoha zadavał Pucinu niazručnyja pytańni.
«Putin Party» rasijskija błohiery, zvažajučy na faktyčnaje biaździejańnie ŭładaŭ, nazvali pieradvybarčaj akcyjaj Pucina, skiravanaj na moładź.
