Siońnia ŭ sudzie Partyzanskaha rajona Minska sudziać Aleha Hniedčyka.

Aleh Hniedčyk naradziŭsia ŭ 1986 hodzie. Skončyŭ budaŭničuju vučelniu, pracavaŭ na budoŭlach u Minsku i Maskvie. U 2003 — 2005 hadach za palityčnuju aktyŭnaść jak siabra «Maładoha frontu» jaho zatrymlivali i karali administracyjnymi aryštami. U 2006 hodzie adsiedzieŭ 12 sutak za ŭdzieł u namiotavym łahiery. Padčas prezidenckaj kampanii pracavaŭ u štabie Uładzimira Niaklajeva. Byŭ na płoščy 19 śniežnia. Zatrymali Aleha Hniedčyka 6 studzienia, 9 studzienia adpuścili. 25 sakavika jamu vystaŭlena abvinavačańnie va ŭdziele ŭ masavych biesparadkach.

19 śniežnia na płošču pajšoŭ śviadoma. Da nas pryjšoŭ jahony siabra Siarhiej. Majo maciarynskaje serca pradčuvała, što dabrom heta nie skončycca. Ja navat chacieła schavać abutak abodvuch, kab nie pajšli. Mianie strymała dačka Naścia… Paśla płoščy viarnuŭsia. Spadziavalisia, praniesła.

Ale ŭžo 6 studzienia 2011 da nas pryjšli milicyjanty, zatrymali Aleha pa padazreńni va ŭdziele ŭ masavych biesparadkach. Praŭda, 9 studzienia adpuścili. Znoŭ usio zacichła. A 25 sakavika znoŭ pryjšli. Mianie nie było doma, dzieci byli adny. Milicyjanty ledźvie nie vyłamali mietaličnyja dźviery… Adrazu ž jamu vystavili abvinavačańnie va ŭdziele ŭ masavych biesparadkach. Doma byŭ pieratrus, zabrali vinčestar ad kamputara.

Siabry Aleha dapamahajuć mnie ź pieradačami, padnosiać sumki, stajać u čarzie na «Vaładarcy». Dachodzić da marazmu: nijak nie mahu pieradać jamu abutak — Aleha ŭziali ŭ zimnich botach. Pryniesła tufli, krasoŭki — nie pryniali, maŭlaŭ, u abutku mietaličnyja supinatary, nielha…

U listach Aleh piša, što trymajecca, u jaho ŭsio ŭ paradku. Jon vielmi mužny, pryncypovy, adkazny čałaviek. I ŭ toj ža čas nadzvyčaj dobry, piaščotny, uvažlivy da blizkich…

Valancina Hniedčyk, maci Aleha

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?