Biełarusy Sankt-Pieciarburha rychtujuć da vydańnia muzyčny dysk pad nazvaj «Pieciarburhski sšytak».

Na dysku budzie 12 piesień biełaruskaha kampazitara z Sankt-Pieciarburha Iryny Bazylovaj na słovy Jakuba Kołasa, Anatola Kirviela, Pietrusia Broŭki, Łarysy Hienijuš, Jaŭhienii Janiščyc dy inšych biełaruskich paetaŭ.

Inicyjataram zapisu dyska byŭ siabra Vialikaj Rady MHA «ZBS «Baćkaŭščyna», historyk, doktar fiłałahičnych navuk, zahadčyk adździeła redkaj knihi Rasijskaj Nacyjanalnaj (Publičnaj) biblijateki Mikoła Nikałajeŭ. Jon taksama źjaŭlajecca aŭtaram knihi «Biełaruski Pieciarburh», siarod hierojaŭ jakoj jość i Iryna Bazylova.

«Paśla zakančeńnia knihi “Biełaruski Pieciarburh” zachaciełasia pasprabavać aktyvizavać tvorčy patencyjał jaje hierojaŭ, — adznačaje Mikoła Nikałajeŭ.

Na siońniašni dzień užo hatovy piłotny dysk, na im zapisana 7 piesień. Prajekt całkam (u kolkasci 12 tvoraŭ) płanujecca prezientavać 15 červienia padčas jubilejnaj, 20-j mižnarodnaj kanfierencyi «Sankt-Pieciarburh i biełaruskaja kultura».

Prajekt «Pieciarburhski sšytak» źjaŭlajecca častkaj vialikaha prajektu pad nazvaj «Biełaruski Pieciarburh», jaki raspracoŭvaje Mikoła Nikałajeŭ.
Jon uznačalvaje Asacyjacyju biełarusistaŭ Pieciarburha, kudy ŭvachodziać mastaki, śpievaki, paety i h.d. U miežach prajektu vydajucca knihi biełaruskich piśmieńnikaŭ Sankt-Pieciarburha, ładziacca vystavy mastakoŭ, pravodziacca ekskursii pa «biełaruskim» Pieciarburhu.

«U ramkach hetaha vialikaha kulturnaha prajekta my zadumali zrabić dysk maich piesień, jakija ja pisała na praciahu 10 hadoŭ, — raspaviadaje Iryna Bazylova. — Kaniešnie, tudy ŭvajšli daleka nie ŭsie piesni — adbirali najbolš liryčnyja, piesni, u jakich śpiavajecca pra kachańnie, luboŭ da Radzimy».

U zapisie «Pieciarburhskaha sšytka» ŭziali ŭdzieł bolš za 10 śpievakoŭ.

«Vykanaŭcy — heta śpievaki, rodam ź Biełarusi,
jakija, jak praviła, skončyli vyšejšyja muzyčnyja ŭstanovy ŭ Piciery, dzie i zastalisia, — havoryć Iryna Bazylova. —
Praktyčna ŭsie jany łaŭreaty mižnarodnych konkursaŭ, viadomyja u Piciery vykanaŭcy, pracujuć u opiernych teatrach, kapele, viaduć solnuju kancertnuju dziejnaść. Chaciełasia b, kab jany nie zabyli svaju Radzimu, i kab Radzima viedała pra svaich śpievakoŭ i hanaryłasia ich dasiahnieńniami.
Płanujem razvivać hety prajekt, rabić kancerty na roznych placoŭkach Biełarusi i zamiežža».

Prapanujem vašaj ŭvazie niekalki piesień prajekta:

Da sustrečy. Sł Ja. Janiščyc, vykonvaje Viatłana Harbačova

Pachnie čabor. Sł. P. Broŭki, vykonvaje Kirył Žarovin

Daviedka

Iryna Bazylova — kandydat mastactvaznaŭstva, vykładčyk staražytnych carkoŭnych śpievaŭ, kampazitar.

Skončyła Minskuju muzyčnuju vučelniu (1998), Sankt-Pieciarburhskuju dziaržaŭnuju kansiervatoryju (adździaleńnie staražytnaruskaha śpieŭnaha mastactva — 2003, aśpirantura — 2008), fakultet historyi Jeŭrapiejskaha ŭniviersiteta ŭ Sankt-Pieciarburhu (2007).

Zajmajecca vyvučeńniem baročnaj muzyki VKŁ. Supracoŭničaje z mnohimi charavymi kalektyvami Biełarusi, Ukrainy, Polščy, Rasii. Piša hictaryčnuju pracu pa Vilni padčas Patopu (1655-1661). Pracuje vykładčykam muzyčna-tearetyčnych dyscyplin Sankt-Pieciarburhskaha instytuta Relihijaznaŭstva i Carkoŭnych Mastactvaŭ.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?