U pačatku sakavika vice-premjer Anatol Tozik na kalehii Minachovy zdaroŭja prapanavaŭ uvieści simvaličnuju płatu za naviedvańnie palikliniki. Na jaho dumku, płata 5000 rubloŭ za pryjom dapamoža skaracić čerhi. Čynoŭnik padkreśliŭ, što biełarusy ŭdvaja čaściej naviedvajuć palikliniki, čym našy susiedzi. U nas siaredniestatystyčny hramadzianin chodzić u palikliniku až 13 razoŭ za hod!

Inicyjatyva Tozika vyklikała nieadnaznačnuju reakcyju. Adny ideju padtrymali — maŭlaŭ, u čerhach nasamreč šmat vypadkovych ludziej. Inšyja nahadvajuć, što Kanstytucyja harantuje biaspłatnuju miedycynu. «Palikliniki isnujuć na našy padatki, dyk što, my bu-dziem płacić dvojčy?» — aburajucca jany.

«Adpraŭlać miedykaŭ za miažu»

Rozhałas ad prapanovy pra płatny pryjom pakinuŭ u ciani inšyja važnyja inicyjatyvy, ahučanyja na toj kalehii. A miž inšym vice-premjer šmat kazaŭ taksama pra nieabchodnaść užyvańnia pieradavoha dośviedu ŭ ajčynnaj miedycynie.

«Treba maksimum uvahi ŭdzialić abmułatorna-palikliničnamu źvianu i ŭčastkovym daktaram: ja maju na ŭvazie i ich zarobki, i status, i ŭmovy pracy, i pracoŭnyja miescy. Davajcie bolš intensiŭna raźvivać instytut pamočnika doktara. U Jeŭropie davoli aktyŭna vykarystoŭvajecca kansultavańnie pacyjentaŭ pa telefonie. Čamu b nam nie zapazyčyć takuju praktyku? Tym bolš što z hetaj zadačaj całkam moža spravicca i siaredni miedycynski piersanał. Treba ŭźnimać status i aŭtarytet siaredniaha miedycynskaha piersanału», — cytuje vice-premjera «Źviazda».

«I nie varta bajacca adpraŭlać maładych ludziej na stažyroŭku ci pracu za miažu — u surjoznyja kampanii, kliniki i ŭniviersitety. My pavinny ŭsio karysnaje, što jość za miažoj, ciahnuć u svaju krainu », — dadaŭ Anatol Tozik.

«Miedyki — adny z samych bahatych»

Chto moža stać prykładam? U ZŠA sistema miedycyny całkam pryvatnaja, nam heta pieraniać ciažka.

A voś u Kanadzie achova zdaroŭja padobnaja da našaj, finansujecca dziaržavaj. Bolšaść miedycynskich pasłuh tut biaspłatnaja dla ŭsich žycharoŭ.
Zarobak miedyki atrymlivajuć ź biudžetu, i pry hetym prafiesija lekara tut adna z samych vysokaapłatnych.

Pra asablivaści kanadskaj miedycyny karespandentu «NN» raskazała byłaja supracoŭnica redakcyi Vijaleta Kavalova, jakaja emihravała ŭ Kanadu ŭ pačatku 2000-ch. Jana pracuje sakratarom u hramadskim centry zdaroŭja, tamu dobra viedaje asablivaści sistemy.

U kožnaj kanadskaj siamji, jak praviła, jość svoj doktar.

Tut dobra raźvity instytut učastkovych terapieŭtaŭ. Žychary atrymlivajuć admysłovuju kartku zdaroŭja. Trapić na lačeńnie ŭ balnicu tut niemahčyma biez nakiravańnia, jak i ŭ Biełarusi. Ale paliklinik tut amal niama,
a nakiravańnie vypisvaje vaš siamiejny doktar. Dla hetaha jamu telefanuješ i zapisvaješsia na pryjom. Raz na hod uładalniki kartki zdaroŭja majuć prava na kompleksny, hruntoŭny ahlad u svajho doktara.

Jak znajści sabie siamiejnaha doktara? Pracuje admysłovy sajt, dzie vy možacie vybrać sabie doktara, zychodziačy z samych roznych kryteraŭ: ad adlehłaści jahonaha doma da vašaha žytła, ad taho, ci razmaŭlaje jon na zrazumiełych vam movach i h.d.

Svaje prablemy

U Kanadzie deficyt vuzkich śpiecyjalistaŭ. I patrapić da takich daktaroŭ možna, pačakaŭšy nie adzin tydzień u čarzie. U Biełarusi ŭ takim vypadku možna pajści ŭ płatny miedcentr. U Kanadzie ž takich niama, tamu tut čas ad času ŭźnikajuć dyskusii nakont nieabchodnaści stvareńnia płatnych centraŭ. Praciŭniki takoj idei kažuć, što heta moža razburyć pryncyp roŭnaha dostupu da miedycyny niezaležna ad uzroŭniu dabrabytu.

Što rabić, kali vaš siamiejny doktar zaniaty, a vam nieabchodny terminovy miedahlad?

Vy možacie pajści ŭ admysłovuju kliniku — walk-in clinic.
Tut nie treba papiaredniaha zapisu, vam daviadziecca čakać u ahulnaj čarzie, a absłuhoŭvać vas budzie dziažurny doktar.

Upor na dyjahnostyku

U Kanadzie nadajecca małaja ŭvaha fizijaterapii, ale pry hetym na vysokim uzroŭni znachodzicca dyjahnostyka. U hetym miascovym miedykam dapamahaje sučasnaje abstalavańnie i dobraja adukacyja. Prestyž tutejšych lekaraŭ nadzvyčaj vysoki, jak i ich zarobak. I tut adsutničaje takaja źjava, jak chabarnictva ci absłuhoŭvańnie pa znajomstvie.

Było b pamyłkaj kazać, što miedycyna ŭ Kanadzie całkam biaspłatnaja.

Pasłuhi stamatołaha tut płatnyja, jak i akulista pa spaŭnieńni pacyjentu 18 hadoŭ.
Daviadziecca płacić i za masaž. Adnak i tut jość palohki: dziaržsłužboŭcy i supracoŭniki bujnych karparacyj majuć tak zvanyja bieniefity — źnižki na płatnyja miedycynskija pasłuhi. Voś niadaŭna muž Vijalety byŭ zvolnieny z bujnoha zavoda i razam z pracaj straciŭ bieniefity.

Vialiki zarobak dla miedykaŭ — adziny recept dla pavyšeńnia jakaści miedycyny i skaračeńnia čerhaŭ u paliklinikach, pierakananaja kanadskaja biełaruska Vijaleta Kavalova.

***

Płata za pryjom doktara piarečyć Kanstytucyi?

Kanstytucyja Biełarusi harantuje hramadzianam krainy prava na achovu zdaroŭja, uklučajučy biaspłatnaje lačeńnie ŭ dziaržaŭnych miedustanovach. Pravaabaronca Valancin Stefanovič miarkuje, što vyjściem było b pašyreńnie praktyki miedycynskaha strachavańnia, ale z zachavańniem biaspłatnaha lekavańnia nieabaronienych katehoryj nasielnictva.

***

«Budučynia za strachavoj miedycynaj»

Ziemlamier z Hrodna Alaksandr Bazar dzielicca vopytam: supracoŭniki ich pradpryjemstva druhi hod lečacca za košt strachoŭki.

Alaksandr Bazar pracuje ŭ biudžetnaj arhanizacyi. Dva hady tamu ich kalektyŭ zaklučyŭ damovu z «Biełdziaržstracham» nakont akazańnia miedycynskich pasłuh pa strachoŭcy. Zhodna z damovaj, arhanizacyja pieraličvaje strachavoj kampanii peŭnuju sumu ŭ raźliku na kožnaha supracoŭnika arhanizacyi.

Jak heta pracuje? Vy zachacieli abśledavacca ci padlačycca? Telefanujecie ahientu i nazyvajecie svoj dyjahnaz. Praź niekatory čas toj paviedamlaje vam, što ŭ adnoj z balnic horada jość volnaje miesca i vam treba ŭ vyznačany čas być tam. I nijakich čerhaŭ u paliklinikach da terapieŭta, nijakich analizaŭ i fluarahrafii. Bolš za toje, pacyjenty pa strachoŭcy absłuhoŭvajucca pa-za čarhoj i ŭ samoj balnicy.

Daktary najpierš zacikaŭlenyja ŭ takich pacyjentach, bo ŭ balnicu pieraličvajuć hrošy za kožnaha takoha klijenta.

Na abśledavańnie ŭ balnicy vydzialajecca peŭnaja suma. I kali vy jaje za adzin vizit nie vyčarpali, možacie raźličvać na dadatkovaje naviedvańnie lakarni. Za hetyja hrošy možna apłacić bolš kamfortnuju pałatu z televizaram i ladoŭniaj.

Akramia taho, uładalniki strachoŭki raz na hod atrymlivajuć hrašovuju kampiensacyju na leki ci na lačeńnie zuboŭ (pa žadańni). Pry hetym nieabchodna pierasłać u strachavuju kampaniju recept ź piačatkaj i ček z apteki.

Kali surjoznych prablem sa zdaroŭjem u vas niama, možna patracić svaju strachoŭku na masaž dy inšyja prafiłaktyčnyja pracedury.

«U svoj čas strachavy ahient pierakanaŭ nas, što budučynia za strachavoj miedycynaj. I prapanavaŭ nam razam vučycca žyć pa-novamu». Za dva hady, adznačaje naš čytač, jakaść i asartymient pasłuh istotna vyraśli. Pa słovach hrodzienskich miedykaŭ, padobnuju praktyku pačali prymianiać mnohija inšyja biudžetnyja arhanizacyi horada.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?