Dva vydavieckija damy buduć stvorany ŭ Biełarusi na bazie respublikanskich haziet.
Ab hetym paviedamiŭ žurnalistam ministr infarmacyi Biełarusi Aleh Pralaskoŭski.

Hramadska-palityčnym hazietam niaprosta pazicyjanavać siabie na infarmacyjnym poli i znajści svajho čytača, ličyć ministr.

«Kraina nievialikaja, a respublikanskich haziet piać [„Savieckaja Biełarusija“, „Źviazda“, „Narodnaja hazieta“, „Respublika“, „Biełaruskaja niva“ — NN], u toj čas jak u vialikaj Rasii ŭsiaho adna ahulnafiederalnaja [dziaržaŭnaja] hazieta»,
— kanstatavaŭ jon [U Rasii sotni fiederalnych vydańniaŭ - ad «Kamsamołki» da «Novaj haziety», ale dziaržaŭnaja ŭ Rasii ŭsiaho adna, tady jak u Biełarusi ŚMI zastajucca amal pad kantrolem łukašenkaŭcaŭ, jakija i vydajuć absalutnuju bolšaść hramadska-palityčnych haziet. - NN]. Pry hetym ministr adznačyŭ, što tematyka materyjałaŭ, forma ich padačy mała adroźnivajucca ŭ vydańniaŭ. Ministr nie skryvaŭ, što niaprostaja ekanamičnaja situacyja stała zychodnym punktam u realizacyi idei stvareńnia miedyjachołdynhaŭ, adnak padkreśliŭ: «Sprava nie ŭ hrašach — sprava ŭ čytačy».

Aleh Pralaskoŭski adznačyŭ, što pryniata rašeńnie ab stvareńni dvuch vydavieckich damoŭ. Rabočaja hrupa, jakuju jon uznačaliŭ, pačała padrychtoŭčuju rabotu.

Adzin vydaviecki dom budzie stvorany na bazie čatyroch respublikanskich haziet. Ciapier viadziecca abjadnańnie jurydyčnych asob.

«Na pieršym etapie sami haziety zachavajucca. Aptymizujecca kiraŭnicki aparat», — rastłumačyŭ ministr. Jon nie vyklučyŭ, što kančatkovym vynikam abjadnańnia stanie vydańnie adnoj hramadska-palityčnaj haziety.

Havoračy ab druhim vydavieckim domie, Aleh Pralaskoŭski rastłumačyŭ, što jon budzie sfarmavany na bazie haziety «Źviazda» i redakcyjna-vydavieckaj ustanovy «Litaratura i mastactva». Kulturałahičnaja tematyka stanie hałoŭnym napramkam u haziecie i časopisach hetaha vydavieckaha doma.

Pavodle słoŭ Aleha Pralaskoŭskaha, płanujecca zaviaršyć raboty pa stvareńniu vydavieckich damoŭ da kanca 2012 hoda. Ministr pierakanany, što jakaść pieryjadyčnych vydańniaŭ i ich finansavyja mahčymaści tolki ŭzrastuć ad stvareńnia miedyjachołdynhaŭ. «Abjadnańnie haziet — heta zvyčajnaje žyćcio drukavanych vydańniaŭ. Uvieś śviet idzie pa šlachu stvareńnia takich bujnych damoŭ druku. Ź ich źjaŭleńniem uźnikaje mahčymaść redaktarskaha manieŭru: tvorčaha i finansavaha», — ličyć Aleh Pralaskoŭski.

Pierad stvarajemymi vydavieckimi damami Mininfarm maje namier pastavić jašče adnu važnuju zadaču — stvareńnie ŭłasnych mahutnych internet-resursaŭ.
Pavodle prahnozaŭ Aleha Pralaskoŭskaha, da 2020 hoda papiarovyja viersii haziet zžyvuć siabie, a voś ich internet-viersii buduć tolki raźvivacca.
«Što datyčyć rehijanalnych vydańniaŭ, to ja hłyboka pierakanany, što bolš za adnu abłasnych haziet nie treba», — skazaŭ jon.
Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?