Vysokapastaŭleny niamiecki palityk, kiraŭnik viedamstva fiederalnaha kanclera Hiermanii i fiederalny ministr pa śpiecyjalnych daručeńniach Ronald Pafała adchilaje lubuju mahčymaść supracoŭnictva z «režymam» u Biełarusi, jaki «padaŭlaje svabodnaje vyražeńnie palityčnaj voli ŭ krainie, aryštoŭvaje kandydataŭ u prezidenty ŭ dzień hałasavańnia i pryvodzić u vykanańnie ŭ vyšejšaj stupieni sumnieŭnyja śmiarotnyja prysudy». Pra heta havorycca ŭ artykule, apublikavanym u niamieckaj haziecie Frankfurter Allgemeine.

Pafała bačyć prezidenta Biełarusi čałaviekam, jaki «falsifikuje vybary, kidaje ŭ turmu advažnych krytykaŭ režymu i sprabuje złamać ich fizična i maralna». Jon nahadvaje, što ŭ krainie «zabaranili pravodzić navat biaskryŭdnyja fłešmoby, nie kažučy ŭžo pra niezaležnyja apytańni nasielnictva».

Pavodle słoŭ Pafały, parłamienckija vybary ŭ Biełarusi 23 vieraśnia, «vidavočna, projduć va ŭžo znajomaj maniery: pradstaŭnikoŭ apazicyi znoŭ nie dapuściać u skład vybarkamaŭ, niezaležnyja partyi adchilać pad lubymi padstavami». «Tak, usiaho dva tydni tamu ŭdzielničać u vybarach było zabaroniena dźvium partyjam. Lidar adnoj ź ich, Mikałaj Statkievič, adbyvaje turemnaje pakarańnie pa palityčnych matyvach, a druhi, Aleś Michalevič, byŭ vymušany šukać prystanišča ŭ ES», — piša niamiecki palityk.

«U hetych umovach luboje dvuchbakovaje supracoŭnictva tolki ŭzmacniła b pazicyi režymu.
I choć krytyki spraviadliva ŭkazvajuć na toje, što Jeŭropa moža nazaŭždy stracić Biełaruś, bo pry Alaksandry Łukašenku kraina admoviłasia ad značnaj častki svajho ekanamičnaha suvierenitetu na karyść Rasii, ES vybiraje procilehły šlach», — zajaŭlaje Pafała.

Pavodle jaho słoŭ, u Hiermanii i Brusieli majuć namier i dalej prytrymlivacca režymu ćviordych sankcyj u dačynieńni da vyšejšych biełaruskich čynoŭnikaŭ — u formie vizavych zabaron, błakiravańnia rachunkaŭ i zbrojevaha embarha — i adnačasova naładžvać dyjałoh z hramadzianskaj supolnaściu, ablahčać kantakty pamiž žycharami Biełarusi i ES. Pry hetym «moładzi daduć mahčymaść vučycca va „ŭniviersitecie ŭ vyhnańni“ (EHU), śpiecyjalna adkrytym na terytoryi Litvy, ci ŭ inšych svabodnych univiersitetach Jeŭropy».

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?